Rayon Sports yavuze amafaranga yagurishije rutahizamu Ismaila Diarra

Yanditswe na Manzi Rema Jules
Kuya 4 Kanama 2018 saa 08:42
Yasuwe :
0 0

Rayon Sports yahishuye ko yishyuwe ibihumbi 30 by’amadorali ya Amerika, ni ukuvuga miliyoni zirenga 25 z’amafaranga y’u Rwanda, kugira ngo irekure rutahizamu Ismaila Diarra yerekeze muri CA Bordj Bou Arréridj yo mu cyiciro cya mbere muri Algeria.

Kuwa Gatatu w’iki cyumweru nibwo Ismaila Diarra yasinye amasezerano y’imyaka itatu muri CA Bordj Bou Arréridj yo mu cyiciro cya mbere muri Algeria, yamushimye nyuma yo kwigaragaza mu mikino ibiri yahuje Rayon Sports na USM Alger, aho yatsinze ibitego bibiri byose iyi kipe yari ihagarariye u Rwanda yabashije kwinjiza.

Umunyamabanga mukuru w’iyi kipe, Itangishaka King Bernard, kuri uyu wa Gatanu yatangaje ko CA Bordj Bou Arréridj yishyuye ibihumbi 30 by’amadorali ya Amerika, iyi kipe ngo ikaba yari yanifuje gutwara Christ Mbondi ariko ntibyakunda.

Yagize ati “Abakinnyi benshi baba bafite amakipe abashaka. Twagiye muri Algeria asa n’uwarangije kuvugana n’iriya kipe. Si we gusa kuko na Christ baramushakaga. Twe mu masezerano dusinyana n’abakinnyi tubemerera ko igihe babona amahirwe twabarekura. Na Diarra ni ko byagenze, twarebye ibyo iriya kipe ishaka kumuha tubona tutamubuza amahirwe.”

Avuga ko ku mafaranga bagurishije Diarra hari andi ibihumbi bitanu by’amadolari CA Bordj Bou Arréridj izabishyura nyuma.

Itangishaka avuga ko bitewe n’uko ikipe yatakaje abakinnyi benshi uyu mwaka, bashaka kujya ku isoko bakongera kugura abandi by’umwihariko abanyamahanga kandi bashoboye ku buryo bazaziba icyuho cy’abagiye.

Mu bandi bakinnyi basohotse muri Rayon Sports harimo rutahizamu Shaban Hussein Tchabalala wagiye muri Afurika y’Epfo, Nahimana Shassir wagiye muri Oman, Ndayishimiye Eric Bakame wirukanywe kubera imyitwarire, Kwizera Pierrot wamaze kwemeza ko atazongera kuyikinira, Usengimana Faustin wagiye muri Qatar n’abandi bari ku muryango usohoka barimo Muhire Kevin, Mutsinzi Ange Jimmy na Manishimwe Djabel.

Ismaila Diarra wamaze kugurwa ibihumbi 30 by'amadorali yagarutse mu Rwanda gutwara ibye yahasize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza