Sibomana Patrick yagarutse mu Rwanda yakirizwa imfura ye yavutse adahari

Yanditswe na Dusabimana Aimable
Kuya 6 Kanama 2018 saa 01:59
Yasuwe :
1 0

Sibomana Patrick ‘Pappy’ wari umaze umwaka akina mu ikipe ya Shakhtyor Soligorsk yo mu cyiciro cya mbere muri Belarus, yagarutse mu Rwanda yakirizwa ibyishimo by’imfura umugore we yibarutse adahari.

Yerekeje muri Belarus muri Kanama 2017 nyuma y’amezi atatu yari amaze yambikanye impeta y’urudashira na Uwase Housnat ku ya 20 Gicurasi 2017 barambagizanyije imyaka itanu. Umugore we yibarutse imfura ku itariki ya 1 Gashyantare 2018, nyuma y’igihe gito umugabo we ageze muri icyo gihugu.

Uyu rutahizamu yagarutse mu Rwanda azanywe n’impamvu zirimo kuba hafi y’umuryango we nyuma yo kugerageza gushakira umugore we ibyangombwa ngo amusange muri icyo gihugu babe hamwe ariko ntibikunde.

Pappy yageze ku Kibuga mpuzamahanga cy’Indege cya Kigali mu ijoro ryo ku Cyumweru rishyira kuri uyu wa Mbere, tariki 6 Kanama 2018. Yakiriwe n’inshuti ye Iradukunda Jean Bertrand n’umuvandimwe we ndetse n’umugore we n’umwana w’imfura yibarutse adahari agaragaza akanyamuneza ko kumubona bwa mbere.

Yabwiye itangazamakuru ko afite ibyishimo byo kugaruka ku ivuko, ati “Nishimiye kugaruka mu Rwanda no kubona umuryango wanjye, umugore wanjye n’umwana wanjye ntari narigeze mbona kuva yavuka. Nje mu kiruhuko gito […] Nari maze iminsi mbabwira ko nshaka kureba umuryango wanjye barandekura ndaza.”

Yaherukaga gutangariza IGIHE ko akimara kubona amasezerano y’imyaka itatu muri Shakhtyor Soligorsk byari byamushimishije kuba agize indi ntambwe atera ariko nyuma akaza kubona bimuhangayikishije kuba yaba muri Belarus atari kumwe n’umuryango we ari na cyo cyatumye atangira gutekereza ku cyemezo cyo kuhava.

Yanavuze ko asize umwuka mwiza mu ikipe akinamo kuko bahinduye umutoza cyane ko ngo abakinnyi baturuka muri Afurika biba bitaboroheye ntibiyumvwemo cyane n’abo baba babagenzura. Uwo bafite ubu uhamaze amezi ane akaba yaratsinzwe umukino umwe gusa wabaye mu mpera z’icyumweru gishize wo muri Europa League.

Yaciye amarenga ko hari n’igihe atasubira muri Beralus

Sibomana Pappy avuga ko hari amakipe yo mu Rwanda yatangiye kumwifuza arimo APR FC yahoze akinira na Rayon Sports ariko yifuza ko n’ubundi yazayakinira igihe gito, nyuma akazongera gushaka uko yasubira i Burayi ariko mu bihugu yabana n’umuryango we.

Yagize ati “Nibishoboka umwaka utaha sinzaba nkikinayo ariko kugeza ubu ndacyari umukinnyi wa Shakhtyor Soligorsk nzasubirayo tariki 12 Kanama ubwo kuri 13 nimumbona inaha muzamenye ko ntazasubirayo.”

Yavuze ko kuba yakinira amakipe atwara ibikombe mu Rwanda atari ‘ibintu bibi’ akomoza kuri APR FC na Rayon Sports bagiranye ibiganiro ariko ntibafate umwanzuro kuko icyemezo cya nyuma kizaturuka ku mujyanama ureberere inyungu ze.

Sibomana yazamukiye mu makipe y’abana i Gikondo ahava yerekeza mu Isonga FC mbere yo kujya muri APR FC, ikipe yamubereye ikiraro kimugeza muri Belarus. Uyu mukinnyi akina asatira izamu ariko anyuze mu mpande.

Sibomana Pappy n'abamwakiriye ku kibuga cy'indege
Sibomana Pappy yagarutse mu Rwanda yakirizwa imfura ye yavutse adahari
Uyu rutahizamu yaciye amarenga ko hari igihe atasubira muri Beralus
Yakiriwe n'inshuti ze
Yari afite akanyamuneza ko kongera kubonana n'umuryango we

Amafoto: Kagabo Canisius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza