Uruzingo ruri mu banyarwanda bakina umupira w’amaguru ruturuka he?

Yanditswe na Manzi Rema Jules
Kuya 3 Kanama 2018 saa 12:57
Yasuwe :
0 0

Ni inzozi za buri mukinnyi by’umwihariko abo ku mugabane wa Afurika, kujya gukina i Burayi n’ahandi bateye imbere yaba mu mikino n’amikoro yabahindurira ubuzima. Gusa bisaba byinshi kugera kuri izi nzozi, by’akarusho kuzibyaza umusaruro bikaba akabando k’iminsi.

Ingero ni nyinshi z’abavukiye mu byaro bya Afurika, Amerika y’Epfo n’ahandi bakabije inzozi bikabahindurira ubuzima, ubw’imiryango yabo, aho bavuka ndetse bikarenga bikagera no ku rwego rw’igihugu. Amashuri ya Didier Drogba muri Côte d’Ivoire, amahoteli ya Cristiano Ronaldo n’abandi benshi, ni ingero z’ifatika z’ababyaje umusaruro amaguru yabo.

Nonese ko abana bose bavukira amezi icyenda ndetse amateka akerekana ko benshi babayeho nabi kurusha abo mu Rwanda, kuki bigoye kubona ingero nk’izi z’abanyarwanda, kuki se n’ababonye amahirwe make yo gukabya inzozi, hafi ya bose bakayatera inyoni, abandi bagakuramo akabo karenge batararenga umutaru?.

Ubwo Haruna Niyonzima, yerekezaga muri Tanzania, Jacques Tuyisenge muri Kenya na Nirisarike Salomon mu Bubiligi ndetse bakarambayo, abakunda umupira w’amaguru batangiye kwiruhutsa bati ‘uruzingo rwahezaga abakinnyi bacu mu gihugu rurazinguwe’.

Ntibyatinze abandi bakinnyi barimo Iranzi Jean Claude, Mugiraneza Jean Baptiste Migi, Ombolenga Fitina, Kalisa Rachid, Bashunga Abouba, batera intambwe yerekeza gukina hanze y’u Rwanda. Gusa ngo uwarose nabi burinda bucya kuko bidatinze batumye abanyarwanda bongera gukubita agatima kuri rwa ruzingo, kuko batarambyeyo.

Rusheshangoga Michel na Danny Usengimana bari bamaze umwaka umwe muri Tanzania, Sibonama Patrick wari umaze umwaka muri Belarus, Emery Bayisenge muri Algeria, bose bikomeje kwanga ndetse bamwe bari mu nzira zigaruka gushaka amakipe muri shampiyona y’u Rwanda, buri wese yifuza kurenga urwego rwayo yaba mu bushobozi n’imiterere.

Uwazana ingingo y’ubushobozi buke bw’abanyarwanda ntiyabyumva kimwe na benshi kuko bagenzi babo b’abanyamahanga barusha kwitwara neza mu kibuga, bava muri shampiyona y’u Rwanda bakitwara neza mu mahanga ndetse bamwe bakaba badatinya kuvuga ko ari ikiraro banyuraho basingira amahirwe y’ubuzima.

Vuba aha cyane Umunya-Mali, Moussa Camara wakiniye Rayon Sports, yerekeje muri Ismailia yo mu Misiri ndetse uyu mwaka akaba yaraguzwe na Mo Bejaia yo mu cyiciro cya mbere muri Algeria, Ismaila Diarra, werekeje muri Algeria, Shaban Hussein Tchabalala, werekeje muri Baroka FC yo muri Afurika y’Epfo n’abandi.

Abanyarwanda bazira iki?

Uwavuga ko abakinnyi b’Abanyarwanda batabona amahirwe yo kujya gukina muri Shampiyona zikomeye kandi zihemba akayabo kahindura ubuzima bwabo, yaba abeshye. Ingero zirahari z’abayabonye ariko bayapfusha ubusa, babyiganira kugaruka gukina mu gihugu.

Ubushobozi barabufite, umushahara bahembwa ni mwinshi, imibereho irenze iyo mu Rwanda ndetse na shampiyona baba bagiyemo zabafasha gutera indi ntambwe ariko siko bigenda. Ese abakinnyi b’abanyarwanda bazira iki?

Mu kiganiro yagiranye na IGIHE, Gakumba Patrick, Umunyarwanda umaze kwandika izina rikomeye mu kugurisha abakinnyi mu Karere ka Afurika y’Iburasirazuba ndetse benshi mu banyarwanda ni we wabashakiye amakipe hanze, avuga uruzingo ruboshye abakinnyi b’abanyarwanda.

Gakumba avuga ko ikibazo gikomeye abakinnyi b’Abanyarwanda bagira ari uko batiha intego ahubwo bagahora bashaka ubuzima bworoshye.

Ati “Maze imyaka myinshi nkorana n’abakinnyi, kenshi mubona ngurisha ab’abanyamahanga ariko si uko ntakishimira no gufasha abana ba hano iwacu mu Rwanda gutera imbere. Reka nguhe urugero, nafashije Iranzi kujya muri Zesco United muri Zambia, ikipe ikomeye ubu iri gukina amatsinda ya CAF Champions League, ntibyamunaniye akagaruka? Ejo bundi natwaye Bashunga Abouba muri Bandari FC, ubu ntiyagarutse muri Rayon Sports?”

“Iyo urebye uko abakinnyi bacu bakina ubona nta ntego. Aragenda yahura n’ikibazo agahita yumva ko agomba gusubira iwabo nk’aho yagashikamye ngo ahangane nacyo akomeze ahange amaso aho ashaka kugera. Iki nicyo abakinnyi b’abanyamahanga barusha Abanyarwanda. Kenshi bo baba barababaye ku buryo amahirwe babonye ntibashobora kuyatera inyoni.”

Abakinnyi bo mu Rwanda bananirwa gukina hanze bakagaruka guhembwa amafaranga make cyane, aho hari nk’uwahembwaga miliyoni 1.5 akagaruka mu Rwanda akajya ahembwa ibihumbi 200 Frw.

Gakumba yafashije Kagere Meddy kuva muri Gor Mahia akajya muri Simba SC aho yakubiwe umushahara inshuro hafi enye, akura Wai Yeka muri Musanze FC ,aho yahembwaga ibihumbi 400 Frw amujyana muri Alliance FC igiye kujya imuhemba hafi miliyoni 2 Frw.

Gakumba w’imyaka 33 wize mu Budage ibijyanye no gushakira abakinnyi amakipe, agira inama abakinnyi yo gushaka ababahagarariye kandi bagakora cyane kuko hanze bakenewe.

Mu kiganiro IGIHE yagiranye na Kalisa Rachid, umwe mu banyarwanda bigeze kujya gukina muri Slovakia, bidateye kabiri akagaruka mu Rwanda ubu akaba akinira Kiyovu Sports, avuga ko ikibazo ari uko mu Rwanda hataragera abantu bashinzwe gushakira abakinnyi amakipe, na ya makipe umukinnyi agiyemo ntabemo ibintu byo kuruhanya.

Avuga ko ubwo yajyaga i Burayi yagaruwe n’uko abayobozi b’ikipe yakiniraga batumvikanye n’ushinzwe kumushakira ikipe biba ngombwa ko ashaka ko uko ahindura ngo ajye muri Espange, nabyo biranga birangira agarutse mu Rwanda.

Mu gihe uruzingo ruri mu bakinnyi b’abanyarwanda rutazingurwa, bizakomeza kuba imbogamizi y’uko umupira w’amaguru waba umwuga utunze nyira wo none n’ejo hazaza. Bizaca kandi intege abafite indoto zo kuwukina kuko abo bakabaye bafatiraho urugero rwiza batazarubona.

Iranzi Jean Claude ubwo yerekezaga muri Slovakia, akavayo akajya muri Zesco United yo muri Zambia nabwo ntatindeyo
Fitina Ombolenga ubwo yerekezaga muri Slovakia ariko ntamareyo kabiri
Shaban Hussein Tchabalala ni umwe mu banyamahanga bakinnye mu Rwanda bakoresha amahirwe yabo neza kuri ubu akaba yaramaze kubona ikipe muri Afurika y'Epfo
Gakumba Patrick yagiriye abakinnyi b'Abanyarwanda inama zo gukora cyane kandi bakagira intego mu kazi kabo
Kalisa Rachid ni umwe mu bakinnyi b'Abanyarwanda bagiye gukina hanze muri Slovakia, ubu akinira Kiyovu Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza