Nyirarukundo Salome yabaye uwa gatatu muri Barcelona Half Marathon, yandika amateka mashya

Yanditswe na Thamimu Hakizimana
Kuya 13 Gashyantare 2018 saa 11:54
Yasuwe :
1 0

Umunyarwandakazi Nyirarukundo Salome umenyerewe mu mikino yo kwiruka ahantu harehare yegukanye umudali wa Bronze nyuma yo gusoza ku mwanya wa gatatu mu irushanwa mpuzamahanga rya Barcelona Marathon ryabereye muri Espagne yandika amateka yo gukoresha ibihe bito kuva yatangira gusiganwa.

Nyirarukundo w’imyaka 21 ni we Munyarwanda witabiriye iri rushanwa ryahuriyemo abasiganwa baturutse mu bihugu birimo Ethiophie, Kenya, u Budage n’u Bufaransa n’ibindi ryabaye ku wa 11 Gashyantare 2018.

Muri iri rushanwa ngarukamwaka rya Barcelona Half Marathon, abasiganwa bakoresheje ibilometero 21,0975, bava kuri Arc de Triomf berekeza mu Mujyi wa Plaça Catalunya.

Umunya-Bahrain, Tejitu Daba ni we wabaye uwa mbere akoresheje 1:08’36”; akurikirwa na Dibabe Kuma ukomoka muri Ethiopie wakoresheje 1:08’37’’ mu gihe Umunyarwandakazi Nyirarukundo Salome yaje ku mwanya wa gatatu akoresheje 1:08’48”.

Ibihe yakoresheje byatumye yandika amateka yo gukoresha ibito mu mateka ye aho yari afite ibingana na 1:13’55” yakuye muri Kigali International Half Marathon yo mu 2016.

Nyirarukundo yabwiye IGIHE ko yishimiye umwanya yegukanye muri Barcelona Half Marathon kuko yakoresheje ibihe byiza.

Yagize ati “Kuba naregukanye umwanya wa gatatu nabyishimiye cyane kuko gukoresha isaha n’iminota umunani ni ibihe byiza bigiye kunyerekeza mu yandi masiganwa akomeye ku Isi. Ikindi umuntu unkurikiranira hafi n’Ikompanyi (Global Sports Communication) imfasha bangiriye icyizere, ndumva nishimye.”

Nyirarukundo yavuye muri Espagne ahita yerekeza muri Kenya aho ari gukorera imyitozo mu Kigo cya Global Communications kiri mu Mujyi wa Eldoret, mbere yo kujya guhagararira u Rwanda mu irushanwa rihuza ibihugu bikoresha Ururimi rw’Icyongereza rizabera Queensland muri Australia kuva ku ya 4-15 Mata 2018 aho biteganyijwe ko aziruka ibilometero 10.

Nyirarukundo Salome yatangiye kwiruka nk’uwabigize umwuga mu 2013, akaba amaze kwegukana imidali igera kuri 20 mu marushanwa atandukanye.

Uko abakinnyi batanu ba mbere bakurikiranye:

1. Tejitu Daba (Bahrain) 1: 08’:36”
2. Dibabe Kuma (Ethiopie) 1: 08’:37”
3. Salomé Nyirarukundo (Rwanda) 1: 08:48”
4. Mimi Belete (Ethiopie) 1: 09’:26”
5. Failuna Matanga (Tanzania) 1h: 09’:36”

Nyirarukundo Salome (iburyo) yegukanye umwanya wa gatatu muri Barcelona Half Marathon, inyuma ya Daba Tejitu (hagati) ukomoka muri Bahrain n’Umunya-Ethiopie, Kuma Dibabe (ibumoso)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza