00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwatsinze Nigeria, ruzongera guhura na Uganda mu Gikombe cya Afurika cya Volleyball (Amafoto)

Yanditswe na Eric Tony Ukurikiyimfura
Kuya 13 Nzeri 2021 saa 07:07
Yasuwe :
0 0

Ikipe y’Igihugu y’u Rwanda y’Abagabo yatsinze iya Nigeria amaseti 3-0 (25-17, 25-22, 25-17), ibona itike yo kuzahura na Uganda bihanganiye umwanya wa gatanu mu Gikombe cya Afurika cya Volleyball kiri kubera i Kigali.

Nyuma yo gusezererwa bitarenze muri ¼ cy’iyi Shampiyona Nyafurika yahuje ibihugu 16 mu bagabo, u Rwanda na Nigeria byahuriye mu mukino wo guhatanira kuva ku mwanya wa gatanu kugeza ku wa munani.

Muri uyu mukino wabereye muri Petit Stade Amahoro i Remera kuri uyu wa Mbere, u Rwanda rwatsinze iseti ya mbere mu buryo butagoranye ku manota 25-17.

Abasore b’umutoza Paulo De Tarso Milagres bafashijwe n’abafana batari bake baje kureba uyu mukino, yatsinze iseti ya kabiri bisa n’ibigoranye ku munota 25-22.

U Rwanda rwashimangiye kuzahatanira umwanya wa gatanu ubwo rwatsindaga iseti ya gatatu ku manota 25-17 ndetse ruzahura na Uganda ku wa Kabiri saa Tanu ubwo hazaba hasozwa irushanwa.

Uganda yabonye itike yo guhatanira umwanya wa gatanu nyuma yo gutsinda Repubulika Iharanira Demokarasi ya Congo amaseti 3-1 (23-25, 25-21, 25-23, 25-19) mu wundi mukino wabereye muri Petit Stade.

U Rwanda na Uganda byari kumwe mu Itsinda A ry’iri rushanwa. Ikipe y’Igihugu yazamutse itsinze imikino yayo yose irimo n’uwa Uganda ku maseti 3-2.

Mu guhatanira umwanya wa karindwi, Repubulika Iharanira Demokarasi ya Congo izahura na Nigeria guhera saa Tatu muri Kigali Arena.

Mu mikino ya ½ yabaye kuri uyu wa Mbere, Maroc yatsinzwe na Cameroun amaseti 3-2 (25-15, 22-25, 25-21, 17-25, 13-15) mu gihe Misiri yatsinzwe na Tunisia amaseti 3-1 (19-25, 25-16, 14-25, 21-25) muri Kigali Arena.

Ni ku nshuro ya kabiri yikurikiranya Tunisia igiye guhurira ku mukino wa nyuma na Cameroun yatsinze ubwo yari yakiriye iri rushanwa mu 2019.

Umwanya wa gatatu uzakinirwa guhera saa Cyenda mu gihe umukino wa nyuma uzatangira saa Kumi n’ebyiri mbere y’uko haba ibirori byo gusoza irushanwa.

Igikombe cya Afurika cy’Abagabo cyagombaga gusozwa ku wa Gatatu, tariki ya 15 Nzeri 2021, ariko Impuzamashyirahamwe y’Umukino wa Volleyball muri Afurika (CAVB) yatangaje ko imikino ya nyuma izaba ku wa Kabiri.

Impamvu ni uko CAVB yasabwe n’Ishyirahamwe Mpuzamahanga ry’Umukino wa Volleyball (FIVB) ko bitarenze ku wa Gatatu, izaba yamaze gutanga amazina y’ibihugu bibiri bizahagararira Afurika mu Gikombe cy’Isi kizabera mu Burusiya mu mwaka utaha.

Abafana batari bake bari bitabiriye umukino wahuje u Rwanda na Nigeria muri Petit Stade
Umutoza w'u Rwanda, Paulo De Tarso Milagres, areba uko abakinnyi be bitwara mu kibuga
Nigeria yanyuzagamo ikagora u Rwanda
Abafana bari muri Petit Stade bashyigikiye Ikipe y'Igihugu
Ndayisaba Sylvestre na Muvara Ronald bagerageza guhagarika umupira wa Ogwuche wa Nigeria
Mutabazi Yves arenza umupira mu gihe Abanya-Nigeria bashakaga uko bawusubiza inyuma
Mutabazi Yves yitegura kwakira umupira
Muvara Ronald atangiza umukino (akora serivisi)

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .