Abategura Miss Supranational Rwanda bahanze Bikini ya Made in Rwanda (Amafoto)

Yanditswe na Uwiduhaye Theos
Kuya 9 Nzeri 2019 saa 02:44
Yasuwe :
0 0

Irushanwa rya Miss Supranational Rwanda 2019 ryashyizweho akadomo Umunyana Shanitah, abari ariwe wegukana ikamba ahigitse abandi bakobwa 14 bari bahanganye na we.

Uyu mukobwa wegukanye 1, 000, 000 FRW yagaragiwe na Umutoniwase Anastasie wabaye igisonga cya mbere akegukana 500,000 FRW, Umwari Sandrine wabaye Igisonga cya kabiri akegukana 300,000 FRW, naho Umufite Anipha aba igisonga cya gatatu na Magambo Yvette aba igisonga cya kane.

Aba bose banyuze imbere y’akanama nkemurampaka mu byiciro bitandukanye birimo n’icya bikini gikunda kuvugisha benshi cyari kinategerejwe cyane.

Mu myaka yashize abakobwa batandukanye bahagarariye u Rwanda muri iri rushanwa bagiye botswa igitutu kubera kwambara bikini abandi bakacyotswa bazizwa kuba banze kuyambara, abanyarwanda benshi bakavuga ko bihabanye n’umuco nyarwanda.

Abanyarwandakazi bagiye bitabira Miss Supranational bagiye bazitirwa n’umuco bakanga kwambara uyu mwenda wo kogana mu ruhame gusa mu 2015 Sonia Gisa yabimburiye abandi awambara ntacyo yikanga ndetse icyo gihe yatahanye ikamba rya Nyampinga uhagarariye Umugabane wa Afurika.

Mu mwaka wa 2013 Mutesi Aurore wari uhagarariye u Rwanda yanze kwambara ‘Bikini’ nk’abandi ngo kugira ngo yerekane indangagaciro z’Abanyarwandakazi. Mu mwaka wa 2014, Neema Umwali na we yunze mu rya mugenzi we yanga kwambara utu twenda ahubwo yiyerekana yambaye umwitero.

Nsengiyumva Alphonse ukuriye KS Ltd itegura iri rushanwa mu kiganiro yari yahaye IGIHE iri rushanwa yavuze ko bikini bashaka kuyivugutira umuti urambye ku buryo hanashyirwaho iyihariye y’Abanyarwanda.

Icyo gihe yavuze ko batanze inyandiko muri RALC bababwira iby’iyi bikini nyarwanda, nk’uko byagaragaye kuri iki Cyumweru hashakishwa Miss Supranational Rwanda 2019, bakaba barakivugutiye umuti ndetse bagahanga bikini nyarwanda.

Aba bakobwa bagiye kujya muri iki cyiciro cya bikini, Lion Imanzi wari uyoboye ibi birori yabanje guteguza abantu bagiye kubareba bambaye uyu mwambaro akaba nabwo bwa mbere mu Rwanda bibaye mu irushanwa ry’ubwiza.

Iyi bikini yataziriwe ‘Bikini ya Made in Rwanda’ ikoze mu buryo itica umuco nyarwanda.

Iyi bikini abakobwa bo muri Miss Supranational Rwanda bari bambaye ifite ibara ry’umweru n’ubururu, imeze nk’ishabure, ariko igakorwa mu buryo itagaragaza ikimero n’amatako nk’uko iya mbere yambawe na benshi yari imeze.

Hejuru ni umwenda uhisha amabere ukerekana ibitugu hasi ukarenzwaho umwitero worohereye unabonerana, umukobwa yatambukamo ukabona arikwije nta kibazo.

Umukobwa wahize abandi azaserukira u Rwanda mu irushanwa rizaba ku wa 06 Ukuboza 2019 muri Pologne nk’uko bisanzwe.

Abategura Miss Supranational bakoze Bikini idasanzwe ijyanye n'umuco nyarwanda
Biyeretse bambaye bikini ya Kinyarwanda
Ni ku nshuro ya mbere iyi bikini yambawe
Abakobwa bahatanaga muri Miss Supranational biyereka muri Bikini ya Made in Rwanda
Iyi bikini yambarwa muri Miss Supranational itarakunze kuvugwaho rumwe
Bikini yakunze kutavugwaho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza