Alpha Blondy agiye gukora igitaramo gihoza amarira abakunzi be i Kigali

Yanditswe na Munyengabe Murungi Sabin
Kuya 12 Nyakanga 2018 saa 09:35
Yasuwe :
0 0

Umuririmbyi w’icyamamare ku Isi Seydou Koné[Alpha Blondy] ari mu bahanzi bakomeye bategerejwe kuzaririmba mu iserukiramuco ry’umuziki rya Kigali Up Music Festival.

Alpha Blondy yagombaga gutaramira i Kigali ku wa 20 Kanama 2017, ku munsi wo gusoza Kigali Up Festival yabaga ku nshuro ya karindwi ariko biza kurangira atahageze ku mpamvu zitasobanuwe neza.

Abakunda Alpha Blondy, icyo gihe bababajwe bikomeye no kuba atarabashije kubataramira gusa kuri iyi nshuro ngo nta gisibya.

Nyinshi mu ndirimbo Alpha Blondy yazikoze guhera mu 1981 ari nabwo yatangiye umuziki zibanda ku nsanganyamatsiko zivuga kuri politiki, amahoro no guhashya amakimbirane n’umwiryane mu bihugu bitandukanye.

Mu ndirimbo yakoze zitabarika harimo izakunzwe cyane zirimo "Guerre Civile", "Téré", "Jerusalem" , “Brigadier Sabari”, "Les Imbéciles", "Journalistes en danger" yavugaga ku rupfu rw’uwitwa Norbert Zongo n’izindi.

Ubu, Alpha Blondy yongeye guteguza abakunzi be ko azagirira urugendo mu Rwanda bidasubirwaho ndetse ko abazaza kumureba bazabona igitaramo cy’umwihariko.

Mu mashusho yashyize ku mbuga nkoranyambaga, Alpha Blondy yagize ati “Muraho bavandimwe banjye bo mu Rwanda, ni Alpha Blondy, nzagera i Kigali ku itariki ya 26 Nyakanga, nzahakorera igitaramo kinini cyane, rero nimwitegure kugira ngo tuzakore ibirori byiza mu mahoro, urukundo n’ibyishimo. Ndabakunda cyane.”

Igitaramo cya Alpha Blondy kandi cyemejwe n’abategura iserukiramuco Kigali Up Festival rigiye kuba ku nshuro ya munani kuko ryatangijwe mu mwaka wa 2011.

Alpha Blondy yatangiye umuziki mu mwaka wa 1981

Mu bandi bahanzi bakomeye bategerejwe muri iri serukiramuco, harimo Kenny Wesley na Soulful Nerd bo muri Leta Zunze Ubumwe za Amerika, Annet Nandujja (Uganda), Third Eye & Lulu (Malawi), Joey Blake (USA), Jah Bone D ( Rwanda) n’abandi batandukanye.

Iri serukiramuco rizatangira ku itariki ya 26 Nyakanga rizasozwe ku itariki 28 Nyakanga 2018, ibitaramo byose bizajya bibera kuri Stade Amahoro i Remera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza