Asinah yataramiweho kubera imyenda ishushanya ubwambure bwe

Yanditswe na IGIHE
Kuya 10 Nyakanga 2018 saa 05:06
Yasuwe :
0 1

Umuhanzi mu njyana ya Dancehall Mukasine Asinah[Asinah Erra] yongeye kuba ikiganiro mu bafana be, abenshi bamwaturiyeho imivumo bamuryoza amafoto yashyize hanze mu mwambaro usa n’umubiri we.

Asinah usigaye yiyita ‘Bad Girl’ [umukobwa udasanzwe] yari amaze igihe kinini afite agahenge ndetse atagarukwaho ku mbuga nkoranyambaga. Ubu, ibintu byasubiye irudubi, abafana bongeye kumuhuriraho bamutuka ibyo gupfunyika, abandi bakamurwanirira basaba ko ‘abamugaya bamuha amahoro kuko ari ubuzima bwe’.

Mu ijoro ryo ku Cyumweru, tariki ya 8 Nyakanga 2018, nibwo Asinah Erra na MC Tino batumiwe mu gitaramo cyabereye kuri Top Chef akabari gashyuha cyane i Nyabugogo. Ubwo igitaramo cyabaga, abanywi n’abandi bari baje kureba aba bahanzi batunguwe na Asinah ubwo yageraga imbere yabo yambaye mu buryo busa nk’aho ntacyo yari yikinze.

Uwo munsi, yaririmbye benshi bamuryanira inzara abandi bibaza cyane ku mwenda yari yambaye. Abari bicaye kure wasangaga bavugira mu matamatama ko ashobora kuba ‘yambaye ubusa’ mu gihe abari bamaze gucengerwa na manyinya bo batashye bazi ko bataramiwe n’umukobwa wambaye ubusa.

Iyi myambarire ya Asinah yavuzweho byinshi ku mbuga nkoranyambaga ndetse amafoto ye yarasakajwe cyane ku munsi yaririmbiyeho muri aka kabari.

Asinah yabaye nk’uwenyegeza umuriro ubwo kuri uyu wa Mbere tariki ya 9 Nyakanga 2018 yashyize kuri Instagram amafoto yereka abakunzi be uko byari byifashe mu gitaramo yari yaraye akoze; aho kumushimira no kumushyigikira abenshi bamwakirije ibitutsi no kumuvumira ku gahera bamubwira ko ‘yahombeye umuryango’ abandi bakamusaba guhinduka akajya mu nzira nziza.

Ibi bitutsi kimwe n’ibyo yagiye yohererezwa mu myaka yatambutse, benshi babihuriza ku kuba ibyo akora abiterwa n’ingaruka z’isenyuka ry’urukundo rwe rw’amateka yagiranye na Riderman.

Asinah yaherukaga kubwira IGIHE ati “Ndakeka na bo[ababimushinja] baramaze kubona ko atari ikibazo cy’ihungabana, ari ibyo iyaba mfite iyo depression nahora ndirimba za ndirimbo z’agahinda. Ubu hari ubundi buzima mu ndirimbo zanjye, ntabwo waba uri mu kwiheba ngo uririmbe urukundo.”

Ibyo yabwiwe byose, nta na kimwe Asinah yasubije haba abamushyigikiye n’abamukwennye bamushinja ihungabana.

Asinah yatumye benshi bakeka ko yaje yambaye ubusa mu gitaramo aheruka gukorera mu kabari i Nyabugogo
Abari bicaye inyuma muri aka kabari bavuzaga induru bakeka ko barimo gutaramana n'umuhanzi wambaye ubusa
Asinah yatutswe aryozwa uyu mwambaro yajyanye mu gitaramo i Nyabugogo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza