Bitunguranye Charly na Nina basubitse urugendo rwo mu Bwongereza aho bari bafite igitaramo

Yanditswe na Nsengiyumva Emmy
Kuya 13 Nzeri 2019 saa 10:55
Yasuwe :
0 0

Itsinda rya Charly na Nina riri mu akunzwe mu muziki wo mu Rwanda no mu Karere ka Afurika y’Iburasirazuba ryasubitse mu bitunguranye urugendo ryagombaga gukorera mu Bwongereza aho ryari ryaratumiwe mu gitaramo gikomeye.

Charly na Nina bari bategerejwe mu gikorwa cyiswe Ugandan Convention UK. Gitegerejwe kubera mu Mujyi wa London mu Bwongereza ku wa 14 Nzeri 2019.

Cyatumiwemo abahanzi barimo Eddy Kenzo n’abanyarwenya bayobowe na Eric Omondi na Alex Muhangi.

Kucyinjiramo bizaba ari amayero 30 mu myanya isanzwe mu gihe mu y’icyubahiro ari amayero 45.

Mu buryo butunguranye Charly na Nina batangaje ko batakitabiriye iki gitaramo kubera impamvu zabo.

Mu butumwa banyujije ku rukuta rwabo rwa Twitter bagize bati “Kubera impamvu zitunguranye zirenze ubushobozi bwacu, tubabajwe no kubamenyesha ko tutakitabiriye igitaramo twari twatumiwemo cya Ugandan Convention London.’’

Bakomeje bisegura ku bakunzi babo bagira bati “Turisegura ku bafana n’abakunzi ba muzika yacu bari batwiteguye i London kuri uyu wa Gatandatu tariki 14 Nzeri 2019. Twizeye ko tuzahura ikindi gihe.’’

Charly na Nina bari mu bahanzi bagezweho muri iyi minsi. Bafite indirimbo igezweho yitwa “Lazizi” bakoranye n’Umunya-Nigeria Orezi.

Charlotte Rulinda [uzwi nka Charly] na Fatuma Muhoza [Nina] bamenyekanye cyane mu ndirimbo “Indoro’’ bahuriyemo na Big Farious ikundwa mu gihugu hose ndetse ibambutsa imipaka mu bihugu bituranye n’u Rwanda.

Izina ryabo ryakomeje kuzamurwa n’izirimo “Agatege’’, “Face 2 Face’’, “Owooma’’, ‘‘Nibyo’’ n’izindi.

Charly na Nina basubitse urugendo bagombaga gukorera mu Bwongereza aho bari bafite igitaramo batumiwemo
Charlotte Rulinda [uzwi nka Charly] mu 2012 yatangiye kugaragara nk’izina rishya ry’umuhanzi uteganya kumvikana mu Rwanda mu bahanzi b’igitsina gore. Yari amenyerewe mu bafasha abaririmba mu marushanwa ya Primus Guma Guma Super Star ya mbere n'iya kabiri
Fatuma Muhoza [Nina] yatangiye gukora ibikorwa bijyanye n’umuziki kuva mu 2009, akora indirimbo ebyiri ku giti cye imwe yitwa ’Uzabaze’, n’indi yitwa ’Igihe Kizagera’, gusa izo ntizamenyekanye cyane. Mu 2013 yongeye kubyutsa inganzo ye ajya mu irushanwa rya Tusker Project Fame gusa ntibyamuhira kuko icyo gihe yagarukiye mu bahanzi 15
Charly na Nina bagombaga guhurira n'abandi bahanzi n'abanyarwenya batandukanye muri iki gitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza