Clarisse Karasira yatangaje ibikubiye mu kiganiro yagiranye na Byumvuhore akomoza no ku mpano yahawe

Yanditswe na Nsengiyumva Emmy
Kuya 10 Nzeri 2019 saa 07:44
Yasuwe :
0 0

Byumvuhore ni izina rikomeye mu muziki w’u Rwanda, uyu muhanzi ari mu Rwanda kuva mu minsi ishize aho yari yitabiriye ibitaramo byo kwizihiza isabukuru y’imyaka 100 Padiri Fraipont washinze HVP Gatagara yari kuba yujuje iyo aza kuba akiriho.

Ku wa Mbere Tariki 9 Nzeri 2019 Byumvuhore yatumiye Clarisse Karasira bagirana ikiganiro kirekire cyibanze ku kugira inama uyu muhanzikazi umaze kwigarurira imitima ya benshi kubera injyana gakondo yahisemo gukora.

Clarisse Karasira aganira na IGIHE yatangaje ko mu gihe yamaranye na Byumvuhore ibiganiro byabo byibandaga cyane ku nama yamugiraga mu buhanzi bwe.

Karasira yagize ati” Byumvuhore sinzi uko namuvuga, ni ubwa mbere twari duhuye amaso ku yandi, no kuri telefone twavuganye muri ibi bihe dushaka uko twahura. Ni umugabo udasanzwe, yambwiye ko yakunze ibihangano byanjye yifuza ko tuganira. Uko indirimbo ze zimeze ni nako aganira aba agira umuntu inama kandi zamufasha mu buzima.”

Uyu muhanzikazi yakomeje agira ati” Njye nakundaga Byumvuhore, menye ko afite igitaramo i Kigali nambarira kukitabira nk’abandi bose. Kuko nari nicaye imbere nisanze nicaranye n’umubyeyi yanganirije ko ashaka kuzambona. Uyu mubyeyi yampaye nimero Byumvuhore akoresha gusa uko nageragezaga kumuhamagara ntitwabonanaga kugeza ubwo ampamagaye turabonana.”

Byumvuhore ngo yabwiye uyu mukobwa ko akunda indirimbo ye “Twapfaga iki”, atuganiriza uko yamubwiye ko yamumenye yagize ati” Yambwiye ko yajyaga yumva indirimbo zanjye yajya kureba uziririmba akabona ari akana nyamara yakumva amagambo azigize akumva ari ay’abantu bakuru bityo afata icyemezo cy’uko naza mu Rwanda tuzabonana.”

Yatunguwe bikomeye n’impano yahawe na Byumvuhore, aha yagize ati” Natunguwe nuko usibye gukunda indirimbo zanjye ariko kandi yari amfitiye impano yamvaniye i Burayi. Byaranshimishije kuba yaratekereje gutya kandi ni iby’agaciro kuba umuhanzi ufite izina nk’irye akunda ibihangano byanjye.”

Uyu muhanzikazi abajijwe ubutumwa yumva yagenera Byumvuhore Jean Baptiste nyuma y’ibi biganiro yaherewemo n’impano yatangaje ko bigoye kubona ubutumwa butari ishimwe yaha Byumvuhore, ati” Sinzi ko hari byinshi namubwira ndamushimira kandi mbikuye ku mutima. Imana izakomeze imufashe kandi iyobore intambwe ze.”

Impano Byumvuhore yahaye Clarisse Karasira ni igikoresho cyifashishwa mu kuyungurura no kuryoshya ijwi ry’umuntu mu gihe ari kuririmba kizwi nka Vocal Harmonizer kiri mu bwoko bwa Boss-VE2.

Ibijyanye no kuba hari imishinga y’indirimbo baganiriyeho ku buryo bazikorana uyu muhanzikazi kugira icyo abitangazaho ahamya ko atahita abivuga ubu.

Impano Clarisse Karasira yahawe na Byumvuhore

Umva indirimbo ’Kabeho’ Clarisse aheruka gushyira hanze


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza