Bimwe mu birori n’ibitaramo bimaze kuba ubukombe mu Rwanda (Amafoto)

Yanditswe na Muvunyi Arsène
Kuya 10 Nyakanga 2019 saa 02:32
Yasuwe :
0 0

Umurwa mukuru w’u Rwanda, Kigali, umaze kuba isangano ry’ibirori, inama n’iminsi mikuru itandukanye ndetse bimwe byamaze kujya ku ngengabihe za buri mwaka ari nako byigarurira imitima ya benshi.

Ibi ni bimwe mu bituma u Rwanda rukundwa na ba mukerarugendo rugakomeza kugendwa kuko ntawe upfa kwica n’irungu mu gihe yaba ari kuharuhukira.

IGIHE yakoze urutonde rw’ibirori, iminsi mikuru n’ibikorwa ngarukamwaka bibera mu Rwanda bihuza abantu benshi kandi bimaze gushinga imizi.

Kigali Peace Marathon

Iri ni isiganwa ry’amaguru riba buri mwaka , ubwo riheruka mu kwezi gushize rikaba ryari ku nshuro yaryo ya 15.

Nk’uko ryitwa “Kigali Peace Marathon” ni isiganywa rigamije gusakaza amahoro binyuze mu mukino wo kwiruka n’amaguru.

Ni kimwe mu gikorwa cya siporo gihuza abantu benshi cyane barimo abanyarwanda n’abanyamahanga. Iri siganwa ryitabirwa n’ababigize umwuga n’abandi biruka bishimisha bagenda bareba ubwiza bw’umujyi wa Kigali.

Muri uyu mwaka ryitabiriwe n’abantu 3899 baturutse mu bihugu 55, aho basiganwe mu byiciro byayo uko ari bitatu birimo Marathon (ibilometero 42,195), igice cya Marathon (ibilometero 21,097) ndetse na Run For Peace (ibilometero 10).

Marathon Mpuzamahanga ya Kigali ihuza abantu benshi

FESPAD

Iri serukiramuco nyafurika ry’imbyino riba inshuro imwe mu myaka ibiri. Ryitabirwa n’amatorero n’abahanzi batandukanye bo muri Afurika, aho bamara icyumweru bataramira mu bice bitandukanye by’u Rwanda.

Iri serukiramuco ritegurwa na Minisiteri y’Umuco na Siporo rihuzwa n’icyumweru cy’umuganura, aho abanyarwanda baba bishimira umusaruro mu cyumweru cya mbere cy’ukwezi kwa Kanama.

Mu cyumweru cya FESPAD haba ibikorwa birimo inama yiga ku nsanganyamatsiko iba yemejwe, imurika ry’umuco n’ibindi. Mu mwaka utaha rizaba ryizihiza imyaka 20 ishize ritangiye.

AIC Food Fair

Ibi ni ibirori bihuza abantu bakunda gufungura, bisanzwe bibera mu bihugu bitandukanye byo muri Afurika.

Buri mwaka abantu baba mu mujyi wa Kigali bahurira ahantu hamwe haba hakoraniye abatetsi bo mu bihugu binyuranye bakabasha kwigurira amafunguro ari nako bumva umuziki.

AIC Food Fair iba buri gihe muri Gicurasi, ikaba imaze kuba inshuro 14 aho yitabirwa byibuze n’abantu 1000.

Kwita Izina

Ni umuhango uba rimwe mu mwaka ukabera mu Kinigi mu Karere ka Musanze mu nkengero za Pariki y’Ibirunga.

Nk’uko umubyeyi abyara umwana akamwita izina abana b’ingagi baba baravutse mu gihe cy’umwaka umwe bahabwa amazina.

Ni umwanya wo kongera kwibutsa akamaro ko kubungabunga ingagi zo mu birunga zisigaye hake ku Isi, zikaba zininjiriza amadovise atari make u Rwanda.

Umuhango wo kwita izina witabirwa n’abakerarugendo baturutse impande z’Isi barimo n’abantu b’ibyamamare mu ngeri zitandukanye.

Abawitabiriye bashobora kwishimira ibikorwa by’ubukererugendo bushingiye ku muco birimo kuboha uduseke, kwenga inzoga, imbyino n’ibindi.

Kigali Up Festival

Iri ni iserukiramuco ngarukamwaka rifite intego yo guteza imbere umuco Nyarwanda no guhesha agaciro umuziki n’abahanzi nyarwanda ku ruhando mpuzamahanga, kuzamura ubushobozi bw’inganda za muzika, kugira uruhare mu bukerarugendo bw’umuco n’ibindi bitandukanye.

Alpha Blondy umenyerewe mu njyana ya Reggae aheruka kwitabira Kigali Up Festival

Kigali Up imaze kuba inshuro zirindwi ihuza abahanzi batandukanye bo mu Rwanda, amatorero atandukanye ndetse n’abahanzi bo mu mahanga bakomeye nka Chameleone wo muri Uganda, Patoranking, Ismael Lo, n’abandi.

Kigali Jazz Junction

Iki gitaramo cyujuje imyaka ine kibera mu Rwanda. Gikorwa hafi ya buri kwezi, kigatumirwamo abahanzi ba kabuhariwe mu gucuranga umuziki w’umwimerere haba abo mu Rwanda no mu mahanga.

Muri iyi myaka ine ishize urutonde rw’abahanzi bakitabiriye ni rurerure. Twavuga nka Zahara wo Muri Afurika y’Epfo, uheruka kuza, Neza umunyarwanda ukorera muri Nigeria, Seyi Shay wo muri Nigeria, Isaiah Katumwa wo muri Uganda, n’abandi benshi.

Kigali Jazz Junction imaze kwinjira mu mitwe ya benshi ku buryo hari benshi utapfa gusanga ahandi ku wa Gatanu wa nyuma w’ukwezi.

Easter Celebration

Iki gitaramo kiba rimwe mu mwaka, buri gihe ku munsi wa Pasika, aho abakirisitu baba bizihiza izuka ry’Umwami Yesu. Kimaze kuba inshuro eshanu kikurikiranya, kikaba gitegurwa n’umuramyi Patient Bizimana.

Easter celebration iri mu bitaramo bya mbere bihuruza abantu benshi cyane bakunda umuziki wo kuramya no guhimbaza Imana.

Abahanzi bakomeye nka Solly Mahlangu wo muri Afurika y’Epfo, Snach wo muri Nigeria, Appolinaire w’i Burundi n’abandi bubashywe mu Rwanda nka Aimee Uwimana, Israel Mbonyi, Diana Kamugisha bagitaramyemo.

East African Party

Iki nacyo ni igitaramo gihuruza imbaga y’abantu batari bacye mu Mujyi wa Kigali.

Utarakijyamo na rimwe uwo ntabwo yaba ajya yitabira ibitaramo. Gikorwa ku munsi wo gutangira umwaka mushya. East African Party yatangiye muri 2009 kugeza n’ubu.

Cyitabiriwe n’abahanzi bakomeye ku ruhando mpuzamahanga nka Kidumu, Fuse ODG wo muri Ghana, Mr Flavor wo muri Nigeria, Konshens wo muri Jamaica, Diamond Platnumz wo muri Tanzania, Ali Kiba, The Ben, Meddy n’abandi benshi.

Kigali Fashion Week

Kigali Fashion Week ni byo birori bikomeye byo kumurika imideli bimaze gushinga imizi mu Rwanda. Ni umwanya ukomeye ku bamurika imideli b’abanyarwanda kuko ariho bigaragariza ndetse bakaba babona n’andi mahirwe atandukanye ajyanye n’akazi kabo.

Nubwo ibyo kumurika imideli mu Rwanda bikiri kwiyubaka, Kigali Fashion Week ihuruza abatari bake baba baje kwirebera imideli itandukanye ndetse bakanagura.

Abakunda ibijyanye no kurimba ntibajya bapfa kubura muri ibi birori bimaze imyaka 10 bibera i Kigali.

Ibirori bya Rwanda Fashion Week ni bimwe mu byubashywe mu by'imideli

Ubumuntu Arts Festival

Iri ni iserukiramuco ryatangiye kubera mu Rwanda mu 2015 ritangijwe na Hope Azeda washinze itorero Mashirika.

Rihuriza hamwe abakinnyi b’ikinamico baturutse mu bihugu bitandukanye byo ku Isi. Intego yaryo ni ugutambutsa ubutumwa bwo kwimakaza ubumuntu.

Ubumuntu Arts Festival ibera ku rwibutso rwa Jenoside rwa Kigali ku Gisozi buri gihe muri Nyakanga.

Rwanda Fashion Week

Ni ibirori ngarukamwaka by’imideli bimaze imyaka ine bibera mu mujyi wa Kigali. Mu myaka itatu yabanje byitwaga Collective Rwanda Fashion Week bikaba bihuriza hamwe abahanzi b’imideli barimo Sonia Mugabo, Moshions, Amizero, House Of Tayo, Uzi Collections, Haute Baso, Inzuki Designs n’abandi buturutse mu bihugu binyuranye.

Abakunda kurimba ntabwo bajya batangwa muri ibi birori, bimurikirwamo imyambaro myiza kandi yakorewe mu Rwanda.

Seka Festival

Urwenya rumaze gushinga imizi mu myidagaduro yo mu Rwanda mu myaka itanu ishize. Mu mwaka umwe haba ibitaramo bitabarika biba bigamije gufasha abantu guseka gusa.

Seka Festival ni iserukiramuco ry’urwenya ryatangijwe n’umunyarwenya Arthur Nkusi aho yifashisha abanyarwenya batandukanye bo mu Rwanda no muri Afurika bagasetsa abatuye Kigali.

Iri serukiramuco ry’urwenya riba akenshi iminsi ibiri ryitabirwa n’abantu babarirwa mu bihumbi. Mbere y’uko ritangira habaga ibyitwa Seka Live byabaye inshuro enye zikurikirana.

Christmas Carols Concert

Ku cyumweru kibanziriza umunsi mukuru wa Noheli aho abakirisitu bizihiza umunsi w’ivuka rya Yezu, Chorale de Kigali imaze imyaka irenga 50 irimbira muri Kiliziya Gatolika ikora igitaramo cyo gufasha abantu kwizihiza uyu munsi.

Ni igitaramo kimaze kuba ubukombe mu bibera mu Rwanda, ndetse cyarenze imbibi z’idini kuko cyitabirwa cyane n’abafite imyemerere itari iyo muri kiliziya Gatolika.

Kwitabira iki gitaramo bisaba kugura itike hakiri kare cyane, kuko umunsi nyirizina ugera zamaze gushira ndetse ubwo giheruka hari abo basubije amafaranga babuze uko binjira.

Easter Celebration nicyo gitaramo cyitabirwa cyane mu byo guhimbaza Imana
Ibitaramo bya Seka Festival bihuza abakunda urwenya
Patient Bizimana amaze kumenyerwa mu gitaramo cyo kwizihiza Pasika
Igitaramo cya Chorale de Kigali cyo kuri Noheli kimaze kuba ubukombe
Iserukiramuco nyafurika ry'imbyino (FESPAD) ribera mu Rwanda rimwe mu myaka ibiri
Kwita Izina abana b'ingagi ni umwe mu minsi mikuru ikomeye ibera mu Rwanda
Ubumuntu Arts Festival ni iserukiramuco ryitabirwa cyane ryigisha ubumuntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza