Ibyo nabonye kwa mukunda abantu mu bwami bwa Maroc (Amafoto)

Yanditswe na Munyengabe Murungi Sabin
Kuya 20 Nzeri 2017 saa 10:35
Yasuwe :
1 0

Iyo ugeze i Casablanca mu mujyi munini wo mu bwami bwa Maroc, kimwe mu bidatinda kukwigaragariza ni umutima n’ubugwaneza abawutuye bakwereka, ugitirimuka gato usohotse mu kibuga cy’indege ubona iterambere.

Abatuye Casablanca ni ba mukunda abantu ndetse hejuru ya byose ni ba munyakazi kuko bashakisha amafaranga amasaha 24 ku yandi. Abatabasha guhatana mu bushabitsi babisa umujyi bakajya hirya yawo gukora ubuhinzi n’ubworozi, umwuga ukamwa amafaranga atagira ingano muri Maroc.

Iyo ugeze muri Casablanca by’umwihariko ukararanganya amaso uhita wanzura ko ‘nta cyiza Imana yimye iki gihugu’ ugereranyije n’ibindi bihugu bya Afurika yo munsi y’ubutayu bwa Sahara.

Ubukungu muri Casablanca buraganje, ku maso y’abaturage ubona inseko izira imbereka n’ibyishimo kamere buri wese mu cyiciro arimo. Ibi ndabivuga nk’uwabihagazeho.

Maze kuzinga ibintu ngo nitegure gufata indege yerekeza i Casablanca nabanje kwitsa umutima nibaza ubuzima nzabamo mu gihugu cyiganjemo abavuga Icyarabu gusa, nagize impagarara muri njyewe ariko nishyiramo akanyabugabo mpata inzira ibirenge nerekeza i Kanombe.

Kuwa 13 Nzeri 2017, nateze indege ya Qatar Airways ica i Doha igakomeza yerekeza mu gihugu cy’Umwami Mohammed VI. Urugendo Kigali-Doha rwatwaye amasaha 7 h10 ntaho duhagaze, ni rurerure ariko kuri njye rwambereye rugufi cyane ku buryo numvaga nasaba pilote nkigumira mu ndege.

Mu ndege za Qatar Airways nahuriyemo n’abakobwa bita ku bakiriya mu buryo butangaje! Ukinjira mu ndege usanganirwa n’umukobwa mwiza, ushinguye, wambaye neza kandi ufite inseko akaguha icyicaro yarangiza ati ‘Nguhaye ikaze mu izina rya Qatar Airways’.

Pilote amaze gushyushya icyuma indege yamaze kogoga ikirere undi mukobwa yaje antunguye afite ikiringiti aranyorosa arangije ati ‘Nkwakirize ikawa cyangwa icyayi?’ nahise ntoranya icyayi asubirayo bwangu arakizana nabwo aseka. Uru rugwiro n’umutima mwiza nabyeretswe ngihaguruka i Kigali kugeza nongeye gukandagiza ikirenge i Kanombe. Ibi ni nako byagenze ku bandi bakiriya barenga magana abiri twari kumwe mu rugendo.

Iyi serivise yari ikirenga ndetse hirya yanjye hari hicaye umugabo wavugaga Icyongereza numvise ashimira by’ikirenga aba bakobwa.

Ntibyatinze nageze i Doha ariko bwari bwije mfata hoteli ndambika umusaya ngo nze kwizindura nerekeza muri Maroc. Urugendo rwerekeza i Casa [nk’uko bamwe bahita] rwatwaye andi masaha arindwi mu kirere. Umuhanda Doha-Casablanca nawo wari umunezero gusa.

Ngisohoka ku kibuga cy’indege Mohammed V International Airport, ushinzwe abinjira n’abasohoka agikubita amaso passport yanjye yahise aza ansanga arambwira ati “Uvuye kwa Kagame ?” Nti “Cyane”. Yarongeye arambwira ati “Kagame ni umugabo mwiza”, ahita afata passport yanjye kimwe n’iz’abandi baturutse mu Rwanda twari kumwe ajya kudutereramo visa tuba twemerewe kwinjira muri Maroc.

Nagiye muri Maroc mu rugendo rw’akazi ku buryo gahunda zose zari zateguwe mbere y’uko mva i Kigali. Nkibonana n’umushoferi wamvanye ku kibuga anjyana kuri hoteli nasanze avuga Icyarabu cyane akavangamo Igifaransa gike ariko ntibyatubujije kumvikana. Akimbona yahise ambwira ati “Ikaze muri Maroc”.

Ni umujyi usukuye mu mpande zose, biragoye kuba wahura n’umuhanda w’igitaka, wose ushashemo kaburimbo ndetse nta cyitwa umwanda kiwubarizwamo.

Casablanca irashashagirana ku buryo utarenganya uwayise ‘umujyi w’urwererane’.

Mbere y’uko anjyana kuri hoteli yambwiye ko agomba kubanza kunyereka uduce tw’ibanze nkabanza nkareba Maroc. Yarambwiye ati “Mu modoka harimo GPS baraza kumenya ko ntakujyanye kuri hoteli ariko ntacyo bitwaye, ni inshingano zanjye kukwereka Maroc ukayibamo uyizi”. Nahise mushimira mu Gifaransa ariko ahita anyigisha ko iyo ushima mu Cyarabu uvuga ngo ‘Shukrani’[šukran], twahise tuba inshuti kuva ubwo.

Amatsiko yari yose nifuza kureba mu mujyi rwagati uko hameze kuko ngisohoka mu kibuga nararanganyije amaso mbona hirya yanjye hari imiturirwa imeze nk’amahoteli agezweho bityo nkeka ko biza kuba agahebuzo.

Nabanje gushidikanya nkeka ko aho nagiye atari muri Afurika! Tukiva mu modoka duhagaze ku nkombe z’inyanja ya Atlantique twahasanze abantu b’inshuti ze baradusuhuza banampa ikaze ariko banyita Umunyafurika numva nguye mu kantu.

Mu nzira tugana kuri hoteli, uyu mushoferi na we yambwiye ko yanyishimye cyane kuko ‘akunda kubona Abanyafurika’. Nanze kubaza byinshi kuko nabonaga ari umunyarugwiro ndetse sinitaga cyane ku byo avuga ahubwo nabaga ndangariye inyubako ziganjemo izerererana zogoga ibicu muri Casablanca.

Urugwiro n’umutima mwiza nasanganijwe nkinjira mu ndege rwari ikirenga kuri hoteli nari ncumbitsemo. Uhereye ku bakwakira ukihagera kugera ku bagukorera isuku mu cyumba bose barangwa no guca bugufi no kwerekana ko umushyitsi aruta byose.

Akazi ko muri hoteli i Casablanca nabonye gakorwa mu buryo bwihariye. Ni gake cyane ubona umukobwa cyangwa umugore ukora muri hoteli cyangwa mu nzu z’ururiro, abenshi usanga ari abagabo kandi bakuze.

Ibi byanteye kubaza umwe mu bagize itsinda twakoranaga muri Maroc impamvu bimeze gutya ansubiza mu magambo make ati “Abakobwa burya bafite ubuhanga iyo bari mu gikoni, ikindi kubazana ngo bakire abakiriya bisa nko kubagira abacakara.”

Umuhinzi yihagazeho

Leta y’u Rwanda igishyiraho gahunda y’igihingwa kimwe sinumvaga impamvu yayo ariko mu minsi namaze muri Maroc nasuye uduce dutandukanye turimo udukorerwamo ubuhinzi n’ubworozi mbasha kubona igisubizo cy’ibyo nibazaga byose.

Muri Maroc ahakorerwa ubuhinzi hose usanga bakurikiza gahunda y’igihingwa kimwe ndetse hejuru ya byose bo bakoresha imashini gusa kuko ubutaka bwabo burashashe kandi bafite amafaranga yo kubikora kandi umusaruro wabo ubyara amafaranga.

Uruhande rumwe hirya ni ahasoza igice cyagenewe guturwamo hanyuma hino ibumoso barahinga

Uduce duhigwamo usanga tudatuwe gusa buri sambu nini iba irimo inzu ikoreshwa mu kubika umusaruro no gucumbikira bake mu bita ku bihingwa. Iyo uri mu muhanda [uwo wakwita ujya mu ntara mu bice bya kure y’umujyi] ushobora gukeka ko Maroc idatuwe ariko iyo bagusobanuriye politike yabo mu buhinzi uhita ugira ishyari ukumva byahita bizanwa i Rwanda umuhinzi agatera imbere kandi akarya atarushye nk’uko bigenda muri iki gihugu.

Ni ba Munyakazi…

Casablanca ituwe cyane n’abakora ubucuruzi ku buryo usanga saa cyenda z’ijoro amaduka afunguye ndetse abantu bari guhaha bisanzwe. Maroc kandi ifite ifaranga [Dirham] ryihagazeho, idolari rimwe rihwanye n’ama-dirham icyenda [gereranya n’ay’u Rwanda, aho idolari rimwe rivunja amanyarwanda arenga 850].

Umukiriya ni umwami! Nko mu iguriro rinini rizwi nka Morocco Mall riri mu ya mbere akomeye muri Afurika, iyo uryinjiyemo utungurwa no kubona isuku yashyizwe muri gahunda y’ubucuruzi kandi ica akajagari. Umucuruzi arakuguyaguya kugeza wemeye kugura, bitandukanye na bamwe mu Rwanda babona umuguzi bakamufata nk’iteshamutwe.

Abacuruzi ni bake ariko ibicuruzwa ni byinshi, usanga umucuruzi umwe ari gukurikirana iduka rimwe kandi rinini cyane adahangayitse ngo benengango baramwinjirana kuko bubatse ikoranabuhanga rikoresha camera zicunga umutekano ku buryo hagize usohoka igicuruzwa kitishyuwe imashini zihita zitanga intabaza.

Ikindi cyoroshya akazi ni uko nta muguzi ubaza umucuruzi igiciro, icyinjijwe mu iduka cyose kiba cyanditseho igiciro urakireba wakirambagiza ukishyura [icyo kigashyirwaho akamenyetso ko cyaguzwe], nta guciririkanwa kubaho.

Ibyakorewe muri Maroc birubashywe

Umuturage wese wa Maroc uganira na we usanga yifitemo ‘guha agaciro ibyakorewe iwabo’ uhereye ku byo bambara, ibyo bakoresha mu ngo n’ibyo barya byose. Imyenda, inkweto n’ibindi byose bijyana no kwambara ahanini usanga bikorwa n’inganda zo muri Maroc.

Imyambaro n’ibiribwa biva hanze ya Maroc nta baguzi bibona ku isoko. Ibaze muri resitora zigezweho i Kigali hari iyamamaza ko icuruza umutsima wa rukacarara isomezwa amata nk’ifunguro ryihariye kandi rihenze!

Muri Maroc ho usanga hoteli zihenze zigomba kuba zifite amafunguro gakondo y’iwabo ndetse n’iyo uhageze uri umunyamahanga babanza kukubwira ko warya iby’iwabo ukumva uko binurira. Natinye gusaba iryo funguro mugenzi wanjye twari kumwe arisaba yihuse, bakirimuzanira yaratamiye ananirwa kumira no gucira, ibindi ni ubuhamya bwe bwite.

Mu gutanga akazi bahera ku baturage ba Maroc, abanyamahanga bakaza nyuma nabwo ari uko habuze abajya muri iyo myanya.

By’umwihariko Abderrahmane Igourzal, umwe mu bayobozi bakomeye mu ruganda OCP [Office Chérifien des Phosphates] rucukura ishwagara rukayibyaza ibicuruzwa bitandukanye yavuze ko muri uru ruganda abakozi barwo ibihumbi 60 bose bakomoka muri Maroc.

Yavuze ko ibi bikorwa kugira ngo inyungu nini iva mu byo bakora igire akamaro ku baturage ba Maroc. Igourzal yabwiye IGIHE ko ubu OCP yinjiza amadolari y’Amerika miliyari esheshatu ku mwaka ndetse ko bifuza gukuba kabiri ayo binjiza mu 2020.

Yagize ati “Hano urebye nawe urabona ko hari amafaranga, byonyine urebye ingano y’ifumbire twohereza mu bindi bihugu ku yindi migabane ukareba n’iyo twohereza muri Afurika usanga bitandukanye. Ubu Afurika ni we mukiriya wa nyuma dufite, ubwo bukungu iyaba buguma muri Afurika, ibibazo by’inzara n’ubukene byashira, ibi bishize rero intambara nazo zashira kuko iyo umuturage ahaze nta kindi akenera.”

Ubwo umwami Mohammed VI yasuye u Rwanda mu Ukwakira 2016 iki gihugu cyagiranye amasezerano na OCP yo kubaka ikigega kizajya gitanga ifumbire ku bahinzi mu kongera umusaruro uva muri uyu mwuga.

Abashoferi bafite itegeko ritangaje

Urwego rushinzwe gutwara abantu n’ibintu muri Maroc rutegeka buri mushoferi wese gufata ikiruhuko cy’iminota 15 buri masaha abiri iyo ari mu kazi, ubirenzeho acibwa amafaranga.

Mu kiganiro n’umushoferi witwa Aziz Ansari yavuze ko gahunda yo kuruhuka imaze igihe ikoreshwa muri Maroc ndetse ko yashyizweho kugira ngo irinde umunaniro mu bashoferi ari nacyo kiza ku isonga mu bikurura impanuka.

Yagize ati “Iyo utaruhutse amasaha yagenwe baraguhana, ni gahunda buri mushoferi wese yinjirana mu kazi. Ubu nduhuka buri masaha abiri, iyo utabikoze polisi iraguhana.”

Mu byo Polisi ibaza cyane abashoferi muri Maroc usanga bibanda cyane ku gakoresho kitwa ‘Mouchard’ gashushe nk’uruziga rwererana. Aka gashyirwa mu modoka ku buryo kerekana ibirometero umushoferi yagenze umunsi wose ndetse kerekana n’inshuro zose yahagaze ari nabwo buryo bukoresha mu gufata abataruhutse.

Umushoferi wese ukoresha auto-routes [ya mihanda migari igira ibisate bine] acibwa amafaranga bitewe n’uburebure bw’ibirometero imodoka yawugenzeho kandi bayishyura nta n’umwe wiganyira.

Aziz yabwiye IGIHE ko gutanga aya mafaranga ari ugushyigikira iterambere ry’igihugu bityo ko nta n’umwe ubyinubira. Ati “Umwami yaduhaye igihugu cyiza, ibindi ni inshingano zacu kongerera amafaranga leta.”

Muri Casablanca usanga uburyo bworoha bwo gutwara abantu n’ibintu ari ugukoresha imodoka nini zizwi nka Tram na gari ya moshi [byombi bikoresha amashanyarazi] ndetse na bisi nini zitwara abantu mu buryo bwa rusange.
Imodoka yose yinjiye muri parking y’ikibuga cy’indege ihabwa iminota 30 yo guhagarara nta kiguzi ariko hejuru y’iyo minota batangira kukubarira ama- Dirham 50 [hafi amadolari atanu] buri minota 20.

Maroc yihagazeho ku bakobwa beza

Ntarajya muri Maroc nari nzi ko nta gihugu gihiga u Rwanda ku bakobwa beza ari nayo ndirimbo buri munyamahanga wese wadusuye ataha aririmba iyo asubiye iwabo. Na nyina w’undi abyara umuhungu koko!

Abanyarwandakazi ni beza pe ariko abarabukazi bo muri Maroc ni beza cyane! Ubwiza bwabo nasanze butarangirira ku mubiri gusa ahubwo n’umutima wabo ushobora kuba wera de! Uretse kuba ari beza n’iyo uganira na bo uba wumva baratojwe cyane kubaha kurusha ibindi, abakomeye ku muco gakondo bo ntibemerewe kuganira n’igitsinagabo barebana mu maso, ubikoze ngo bifatwa nk’agasuzuguro.

Abakobwa bo muri Maroc kandi bazi ibigezweho urebye ku myambarire yabo; imyenda, amasaha n’imirimbo igezweho mu maduka akomeye azwi mu ruganda rw’imideli ku Isi usanga babyambaye.

Nubwo abaturage hafi ya bose ari abayisilamu muri Maroc, ntibiba byoroshye kuba wabona abagore cyangwa abakobwa bitandiye nk’uko biba bisa iyo ugeze i Nyamirambo.

Icyizere kiruta byose…

Kubera ibibazo by’imitwe y’iterabwoba byayogoje ibice bimwe na bimwe ku Isi usanga ibihugu byinshi byarakajije umutekano ku buryo kwinjira mu nzu zihurirwamo na benshi haba muri za hoteli, inzu z’imyidagaduro, amasoko n’ahandi usanga hari ibyuma bisaka, muri Maroc hari umudendezo udasanzwe.

Mu nzu yo kureberamo sinema twagiyemo mbere yo kuva muri Maroc twatunguwe no kubona abantu binjiramo ari ikivunge nta n’umwe usatswe. Ibi byanteye kubaza umuntu utuye Maroc igituma bigenda gutya maze ansubiza ko ‘bizerana kurusha ibindi byose’.

Mbere yo kwinjira muri iyo nzu ya sinema hanze hari agatsiko k’abarabu bari mu myigaragambyo bahagarikiwe na polisi. Nabajije uwo muntu aho icyo cyizere kiva kandi narabonye hari abantu batishimye ansubiza mu magambo make ati “N’abantu Imana yaremye bayigaragambyaho bakayoboka satani.”

Yansobanuriye ko muri Maroc imyigaragambyo yemewe ndetse ngo abayikora ahanini ni abakene baba bashaka kwereka umwami ko bakeneye ubuzima bwiza kurushaho.

Kirazira kikaziririzwa…

Muri Maroc bifatwa nka sakirirego isumba izindi iyo umuturage avuze nabi umwami cyangwa undi wese mu muryango w’ibwami, ufatiwe muri iki cyaha ahabwa igihano kiruta ibindi, cyo kimwe no gusuzugura umusigiti cyangwa kuvuga nabi Intumwa y’Imana Mohamed.

Nturenga umutaru utarahura n’umusigiti, iyo bumvise uri umukirisitu bakubaza impamvu udahinduka ngo uyoboke idini y’ukuri ariko ntawe uguhutaza akuryoza imyemerere yawe.

Biba ari igisebo gikomeye kubona umuturage wa Maroc anywera inzoga mu ruhame ariko gutumura itabi byo ngo ni icyubahiro. Abica inyota usanga bicaye ku rubaraza rw’inzu nziza zicuruza ibyiganjemo ikawa, icyayi n’ibindi bisa na byo. Abanywa inzoga usanga abenshi ari abanyamahanga biganjemo abakerarugendo ariko nabo basabwa kuzinywera ahiherereye.

Izi nzu zubakirwa abahembwa make kugira ngo bazihabwe ku nguzanyo
Umujyi wa Casablanca urangwamo isuku ntagereranywa
Aho ukubise ijisho hose ubona umusigiti
Imihanda yose yubakwa usanga isoko ryihariwe n'ikompanyi z'Abanya-Maroc
Imodoka nshya kandi zigezweho uzisanga muri iki gihugu
Umuhanda usohoka Casablanca werekeza El Jadida mu majyepfo uri gusanwa
Hano ni hirya y'umujyi ariko batuye mu buryo buzira akajagari
Umushoferi wese ukoresha imihanda ya auto-routes arabanza akishyura
Iyi karita niyo ibarirwaho ibirometero imodoka yagenze kuri auto-route hanyuma nyirayo agacibwa amafaranga
Imihanda igana mu bice by'icyaro nta munyamaguru wemerewe kuyambukamo
Mu gice cyagenewe guhingwa abaturage basobanukiwe cyera ibijyanye na gahunda y'igihingwa kimwe
Mu gice cyitaruye Casablanca werekeza i Khouribga hava umusaruro mwinshi
Hakurya haratuwe hino ni igice gikorerwamo ubuhinzi, hafi muri Maroc hose niko bimeze
Ikibazo cy'imiturire muri Maroc cyarakemuwe no hirya mu cyaro bateye imbere
Iki ni ikibuga kigwaho kajugujugu itwara umwami iyo yasuye uruganda rwa OCP ruri ahitwa Jorf Lasfar
No muri uru ruganda hubatsemo umusigiti
Iki ni igice cy'uruganda rwa OCP kivangirwamo produits zikomoka ku ishwagara zikabyazwa ibicuruzwa bitandukanye
Iyi myotsi ngo bashyizeho uburyo bwo kuyica intege ku buryo idahumanya ikirere
Ukinjira muri uru ruganda naho uhasanga isuku
Muri OCP bafite ikoranabuhanga ribyaza amazi yanduye umuriro w'amashyanyarazi uru ruganda rukoresha ndetse bagasagurira abaturage
Umuhanda werekeza i Khouribga uturutse Jorf Lasfar
Hano ni ku cyicaro cya OCP aho Maroc ivana miliyari esheshatu z'amadolari buri mwaka
Mu Mujyi wa Khourigba nahasanze imyigaragambyo y'abakene basaba umwami kwitabwaho byisumbuyeho
Aba ni abize ibyerekeye indege barenga ijana bari baje gukora ikizamini cy'akazi bashaka umuntu umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza