Idris Elba yavuze ku ifi yariye mu Rwanda n’uko yaraye mu buroko Mandela yafungiwemo

Yanditswe na Dusabimana Aimable
Kuya 31 Nyakanga 2018 saa 06:06
Yasuwe :
0 0

Idris Elba, icyamamare muri sinema ku Isi yagarutse birambuye ku hantu yatembereye hakamushimisha kurusha ahandi ku Isi, avugamo u Rwanda yemeza ko ari igihugu cyiza, gifite ikirere cyiza n’abaturage beza.

Ibi yabitangaje mu kiganiro cyihariye yagiranye n’umunyamakuru Nick McGrath cyatambutse muri The Telegraph yo mu Bwongereza. Elba yakomoje ku hantu hatandukanye yagendereye akahabona ibitangaje ku Isi ahereye ku ivuko rye; muri Afurika y’Epfo; u Rwanda; i Berlin; Ibiza; Miami n’ahandi henshi.

Uyu mukinnyi wa filime wamamaye mu yitwa “American Gangster,” “Daddy’s Little Girls,” “Pacific Rim” avuga ku mwihariko w’u Rwanda ku rutonde rw’ahamunejeje mu ho yatembereye hose ku Isi yakomoje no ku ifi yahaririye atazibagirwa.

Yagize ati “Ndibuka ndya ifi ishyushye cyane mu Rwanda, yari ipfunyikanye n’ibitunguru na tungurusumu, byari bihebuje nk’icyo gihugu ubwacyo. U Rwanda rufite ikirere cyiza n’abaturage beza.”

Idris Elba ni umwe mu bakinnyi ba filime bakomeye ku Isi bafitanye isano ya hafi n’u Rwanda yaturutse ku yitwa “Sometimes In April” yakinanye na Carole Karemera Umuringa wanashinze Ishyo Arts Centre iteza imbere ubuhanzi mu gihugu muri iki gihe.

Ni filime imara iminota 140, ivuga ku buzima bwa buri munsi Abanyarwanda babagamo, mbere ya Jenoside, muri Jenoside ndetse na nyuma yayo mu 2004. Yanditswe ikanayoborwa na Raoul Peck ukomoka muri Haiti ikerekanwa bwa mbere mu mwaka wa 2005.

Imyuka idasanzwe Elba yumvise mu cyumba cyafungiwemo Mandela

Umukinnyi wa filime Idris Elba yakomoje ku buryo yaraye mu cyumba cya gereza yafungiwemo Nelson Mandela ubwo yafataga amashusho y’indi filime yitwa “Mandela: Long Walk To Freedom” akumvamo urwamo n’iminiho byatumye ngo yumva ibyo nyakwigendera yaciyemo mu gihe yamaze ahafungiwe.

Yagize ati “Nashakaga gusobanukirwa uko byari bimeze gufungirwa mu buroko kuko Nelson Mandela yamaze imyaka irenga 20 muri iriya gereza yo ku Kirwa cya Robben. Icyumba cye nyir’izina ni ahasurwa ariko naryamye mu cyo byegeranye kandi cyari gito cyane.”

Yongeyeho ati “Icyumba cye cyarimo ubusa ariko numvise amajwi y’urwamo n’iminiho. Niyumvisemo igihunga ariko nyuma nza kubona ibitotsi. Nasohotsemo mu kindi gitondo numva nishimiye ubuzima bwanjye n’umudendezo. Niyumvise nk’uwasobanukiwe ibyo Mandela yanyuzemo.”

Idris Elba yaraye muri gereza yafungiwemo Nelson Mandela imyaka 20 igashira

Idris Elba yavuze ku buryo yanabonye u Bwongereza yavukiyemo uko atigeze abubona mbere aburi hejuru igihe yagendaga mu ndege y’imyanya ibiri gusa mu marushanwa yari ‘ateye ubwoba kandi ashimishije icyarimwe.’ Yasobanuye ko ari byiza uko yabonye icyo gihugu gicyeye mu buryo budasanzwe ku muntu uri mu kirere.

Uyu mukinnyi wa filime yagiye agaruka ku hantu yakunze mu buzima bwe nko mu Murwa Mukuru wa Malaysia witwa Kuala Lumpur; muri Jamaica aho yamaze igihe kirekire ayobora filime yitwa “Yardie”. Yanavuze ko yatewe ubwoba bikomeye n’urugendo rw’indege yakoze muri filime ye iheruka yitwa “The Mountain Between Us” yakinanye na Kate Winslet ariko bakishimira uko barusoje amahoro.

Idris Elba, Carole Karemera na Raoul Peck wayoboye filime ya 'Sometimes In April' bahuriyemo
Uyu mukinnyi w'icyamamare ngo ntazibagirwa ifi yariye mu Rwanda
Yavuze ko u Rwanda rufite ikirere cyiza n'abaturage beza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza