Kwamamara n’ibiyobyabwenge bipfana iki?

Yanditswe na Muvunyi Arsène
Kuya 10 Nyakanga 2019 saa 10:41
Yasuwe :
0 0

Hari ubuhamya bwinshi bugaragaza uko ibyamamare mu ngeri zitandukanye byagiye byishora mu biyobyabwenge ndetse bikarangira bibaye imbata zabyo.

Lady Gaga, Elton John, David Bowie, Naomi Campbell na Oprah Winfrey n’abandi batandukanye ni bamwe mu bagiye batanga ubuhamya bw’uko bakoresheje ikiyobyabwenge cya Cocaine.

Umunyamideli Naomi Campbell yanditse ko kunywa Cocaine byatumye yumva “ndi igikomerezwa, nshobora kurangiza Isi. Numvaga nifitiye icyizere cyo ku rwego rwo hejuru. Uko urushaho kubifata niko urushaho kubishaka.”

Hari abandi bari bakomeye ku Isi ariko, ibiyobyabwenge byabambuye ubuzima. Mu rutonde rwabo rurerure harimo umuririmbyi w’umunyamerika Prince wapfuye mu 2016, Whitney Houston mu 2012, Micheal Jackson mu 2009 n’abandi benshi.

Si muri Amerika gusa kuko ibiyobobyabwenge ntaho bitaba ku Isi. Mu Rwanda naho hagaragaye ingero zitandukanye z’ibyamamare byishoye mu biyobyabwenge n’ubusinzi cyane cyane muri muzika.

Umuraperi PFLA ni umwe mu bamenyekanye cyane mu bijyanye n’ikoreshwa ry’ibiyobyabwenge, yatangiye akiri muto yirukanwa muri Norvège agarurwa mu Rwanda ari byo azira.

Yagiye afungwa inshuro zitandukanye ubwo aheruka muri gereza ni mu 2017 ndetse ubu yemeza ko yatandukanye nabyo.

Mu kigo Ngororamuco cya Iwawa kuri ubu hariyo abaraperi batatu aribo Fireman, Neg G The General na Young Tone bose bari barabaye imbata za Heroine [Mugo].

Umuhanzi Gisa Cyinganzo nawe aherutse gufungurwa nyuma yo kumara umwaka n’igice ari muri gereza aho nawe yaziraga kunywa mugo.

Umuraperi Green P, Producer Fizzy nabo bavuzwe mu banyamuziki bo mu Rwanda babaye imbata z’ibiyobyabwenge by’umwihariko mugo.

Si aba gusa bakoresheje ibiyobywabwenge, hari n’abandi babaye imbata z’ibindi bisindisha nabyo byangiza imitekerereze yabo.

Icyo inzobere zibivugaho

Inzobere mu bijyanye n’imitekerereze, John Tsilimparis, yavuze ko mu bushashatsi yakoze ku gitera ibyamamare byinshi kwishora mu biyobyabwenge yasanze harimo kuba bahora ku gitutu cya sosiyete, iba ibitezeho gukora ibintu by’agatangaza ntinabihanganire mu gihe hari agakosa kababayeho.

Ati “Ibyamamare bihora bihanzwe amaso umunsi ku wundi, biharanira ko ibyo bakora bigaragara neza mu maso ya rubanda rimwe na rimwe bikabagora. Bamwe bishora mu biyobyabwenge kugira ngo babashe guhangana n’icyo gitutu. Bibaruhura umwanya muto ariko bazi neza ingaruka byabagiraho bakomeje kubikora.”

Mu kiganiro IGIHE yagiranye na Dr Rwagatare Patrick uyobora ikigo kivura ababaye imbata z’ibiyobyabwenge cya Huye Isange Rehabilitation Center, yavuze ko umuntu uri mu buzima bwo kwamamara aba afite ibyago byinshi byo kugwa mu mutego w’ibiyobyabwenge.

Impamvu ya mbere Dr Rwagatare atanga ituma hari abantu benshi mu byamamare bishora byishora mu biyobyabwenge, ngo ni imyumvire ipfuye ko bibatera imbaraga zo kwitwara neza cyangwa kubona ibitekerezo mu gihe bahanga.

Ati “Mbere na mbere babikora bibeshya ko bituma bigaragaza neza. Hari uwumva ko atajya kuririmba atafashe urumogi kuko bimufasha kwigaragaza cyane. Cyangwa ngo bikabaha inganzo [inspiration] ariko ni ukwibeshya kuko ubundi inganzo umuntu aba ayifite ntabwo ayihabwa na héroïne.”

Ikindi gituma hari bamwe mu byamamare bishobora mu biyobyabwenge ngo ni ugushaka kumera nk’abo bafatiraho urugero nabo baba baraciye muri iyi nzira.

Ati “Urebye n’ibihangano byabo biba ari ukwigana abandi. Baririmba Rap, Hip Hop n’ubundi ni ijyana z’ahandi. Hari igihe bafata icyitegererezo kuri ibyo byamamare bindi cyane abo muri Amerika baba basanzwe babikoresha.”

Kugendera mu kigare nayo ni indi mpamvu ikomeye ituma hari abahanzi bagaragara mu ikoreshawa ry’ibiyobyabwenge. Abenshi mu babikoresheje bagiye bavuga ko batangiye kubigerageza babihawe n’inshuti zabo birangira babaye imbata zabyo.

Dr Rwagatare Patrick avuga ko mu kigo ayoboye bakira abantu benshi bari mu byiciro bitandukanye by’ubuhanzi n’ubwo nta mibare ibigaragaza bafite.

Agira inama abahanzi kutishora mu biyobyabwenge kuko byangiza byinshi kurusha ibyo byubaka mu mubiri w’ubikoresha.

Ati “Bishobora kugutera imbaraga mu gihe gito ariko ntabwo ziba ari izawe mu by’ukuri. Iyo abikoresha muri ako kanya ntabwo atekereza ku ngaruka byamugiraho. Utangira ubikoresha ukagera aho umubiri ubimenyera ku buryo kubihagarika biba bitagikunze ukaba imbata yabyo.”

Yongeyeho ko uwabaye imbata y’ibiyobyabwenge adashobora guhanga ibintu bifite ireme nk’utabikoresheje, akabagira inama yo kubizibukira.

Ikiyobyabwenge cy’urumogi kiza ku isonga mu bikoreshwa n’abahanzi benshi mu Rwanda kigakurikirwa na mugo n’ibindi birimo n’inzoga nyinshi.

Umuraperi Neg G The General ari kugororerwa Iwawa
Fireman wahoze uri umuraperi ukomeye yishoye mu biyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza