Miss Rusizi yasubije abamushinja gukurikira ifaranga ku mucuruzi w’imyaka 45 bazarushinga

Yanditswe na Munyengabe Murungi Sabin
Kuya 12 Gashyantare 2018 saa 11:31
Yasuwe :
1 0

Umutesi Teta Afsa wabaye Nyampinga wa Rusizi aritegura kurushingana n’umucuruzi witwa Mudaheranwa Aman Casmir umurusha imyaka 24 y’amavuko, bamwe bamushinja gukururwa n’imitungo ariko akavuga ko urukundo rujya aho rushatse.

Mudaheranwa Aman Casmir afite imyaka 45 y’amavuko mu gihe umukunzi we Miss Umutesi Teta Afsa afite 21. Aba bombi, bazasezerana imbere y’amategeko ku itariki ya 23 Werurwe 2018; uyu muhango uzabera umunsi umwe no gusaba no gukwa.

Uyu mucuruzi azwi cyane mu Mujyi wa Kamembe mu gihe Teta Afsa we azwi i Rusizi nka Nyampinga ufite ikamba ry’aka karere kuva mu mwaka wa 2016 kuko atarasimburwa.

Impapuro z’ubutumire zimaze kujya hanze, ubukwe bwa Mudaheranwa na Teta bwavugishije abatari bake ahanini bagaruka ku kinyuranyo cy’imyaka yabo. Mu byavuzwe cyane harimo ko ‘uyu Nyampinga yakurikiye ifaranga’ gusa we yabwiye KT Idols ko ibyabo ari urukundo rusa.

Yagize ati “Kuvuga ngo umuntu arakuze, ngo nkurikiye amafaranga ntabwo mbiha agaciro. Kuba naremeye kubana na we si uko nari nyobewe uko angana. Icyo mpa agaciro ni uko mukunda.”

Yongeyeho ko ababyeyi be batigeze bivanga mu by’urukundo rwe na Mudaheranwa kuko ‘amahitamo ari aye’. Ati “Amahitamo aba ari ayanjye kandi umubyeyi ashyigikira umwana we akurikije uko yiyumva, niba naraberetse umugabo wanjye ntabwo bambwira ngo reka uyu fata uyu.”

Mudaheranwa na we yabwiye IGIHE ko icyo yakundiye Miss Teta Afsa ni uko bahuza muri byose ndetse by’umwihariko bakaba bakundana. Yongeyeho ati “Ni umukobwa usa neza, ufite igikundiro akaba ariyo mpamvu nanjye naba naramuhisemo ariko cyane cyane sinagendeye ku isura.”

Mudaheranwa Aman Casmir agiye kurushingana na Teta nyuma y’igihe kigera ku myaka irindwi yari ishize atandukanye n’umugore we. Yashimangiye ko adatewe ipfunwe no kurongora umukobwa arusha imyaka myinshi nk’uko bamwe babivuga.

Uyu mukobwa ngo ntiyakurikiye amafaranga kuri Aman Casmir

Yagize ati “Kuba akuze arakuze ntabwo ari uruhinja kandi ubundi gukura ni mu mutwe; ushobora kuba uri mukecuru ariko kuba mu mutwe udakuze ugakora nk’iby’abana. Gukura ntabwo ari ubunini cyangwa se imyaka myinshi ahubwo gukura ni mu mutwe, kuba uzi ubwenge, kuba ufite ibitekerezo bizima. Arabyujuje kuko tumaranye imyaka ibiri tuziranye.”

Ubukwe bwa Casmir Aman na Teta Afsa buzataha ku itariki ya 24 Werurwe 2018, bazasezeranira mu idini rya Islam.

Mudaheranwa Aman Casmir afite imyaka 45 y’amavuko
Miss Teta Afsa agiye kurongorwa n'umugabo umurusha imyaka 24

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza