Ni iki cyateye Khalfan kuvuga ko umuziki wo mu Rwanda uciriritse?

Yanditswe na Dusabimana Aimable
Kuya 7 Kanama 2018 saa 09:13
Yasuwe :
0 0

Umuraperi Khalfan yagize icyo avuga ku magambo aherutse gutangaza yemeza ko umuziki w’Abanyarwanda uciriritse bikabyutsa umunabi n’impagarara mu bantu batandukanye bamushinje kwishyira hejuru.

Uyu muhanzi ubusanzwe witwa Nizeyimana Odo ni umwe mu bamaze iminsi bavugwa cyane mu itangazamakuru biturutse ku gikorwa yakoze ku munsi usoza irushanwa rya Primus Guma Guma Super Star yari yitabiriye bwa mbere, akajya ku rubyiniro bamutwaye mu isanduku.

Muri iryo joro mu byo yabwiye itangazamakuru, hari amashusho ye yakwirakwiye avuga ko ati “umuziki wo mu Rwanda ni fake”. Icyo gihe yibasiwe bikomeye bamwe bavuga ko yigerereje abahanzi akubahuka abahanzi bakomeye barimo The Ben na Meddy avuga ko byabananiye guheka umuziki nyarwanda muri Afurika y’Uburasirazuba kandi baratanze Diamond kwinjira no kumenyekana mu muziki.

Byarushijeho gufata indi ntera ku mbuga nkoranyambaga benshi bashinjaga uyu muraperi kwishyira hejuru, abandi bagatebya bati ‘uwo musore nibamusubize mu isanduku’. Mu bamusubije harimo n’abandi bahanzi nka Alpha wavuze ko nubwo buri muntu afite uburenganzira bwo kuvuga ibyo ashaka ariko ku kigero cyo kwita umuziki w’Abanyarwanda ‘Fake’ bikaba bidakwiye ndetse uwo muntu akwiye kubanza kwirebaho.

Mu kiganiro na IGIHE, Khalfan yasobanuye birambuye icyatumye atangaza ayo magambo atarishimiwe na bamwe ndetse bikamukururira kwibasirwa. Yatanze ingingo zitandukanye yemeza ko zishimangira ibyo yavuze muri iryo joro, mu ngero ze anakomoza ku bahanzi batandukanye basanzwe bafite amazina aremereye mu Rwanda.

Yagize ati “Hari abafana banyijunditse ngo uwo muntu ariyemera, ese azakora iki? Ibyo byaranshimishije kuko sinjye uzahindura byose, wenda Yemba Voice izabikora, Bruce Melodie cyangwa Christopher bazabikora, hari n’abandi bari inyuma bazabikora benshi cyane ariko ntiduhishe ukuri. Dushyire ukuri hanze niba ikibazo kiri ku bahanzi nyarwanda mutubwire aho bipfira ariko umuziki wacu ukomeze uzamuke, cyane ko dufite impano. Ni uko mbyumva.”

Yongeyeho ati “Buri muntu wese arasesengura kandi koko byabaye byiza Abanyarwanda barahumutse. Ariko se tubigarukeho, iyo tugiye mu kabyiniro cyangwa se ahabera imyidagaduro akenshi twumva indirimbo zo mu mahanga kurusha izo mu Rwanda. Icyo kintu ugishyize ku munzani nawe wahita ubyumva. Ese indirimbo zacu zipfira mu ikorwa? Zipfira mu bazikora? Bigenda ute?”

Uyu muhanzi yanatanze ingero za bimwe mu bitaramo bikomeye byagiye bibaho mu Rwanda by’abahanzi b’abanyamahanga, abigereranya n’ibyakozwe n’Abanyarwanda bikomeye by’umwihariko ibyabaga birimo Meddy cyangwa The Ben ashimangira ko mu byo azi n’amakuru yagiye amenya ari uko abo baturutse hanze ari bo barunzweho akayabo k’amafaranga kurusha abenegihugu.

Ati “Abo bantu kandi bo iyo baje baririmba ‘playback’ bakora agashya bikaba ‘semi-live’ mu gihe umwana w’Umunyarwanda iyo aje nko kuri The Ben na Meddy, baririmbye ‘live’ ariko bikantangaza kubona hari uri kuvuga ibi n’ibi ati ‘Yadusondetse, ariko ubundi ko hari ibintu ataduhaye? Ku bwibyo urumva ko ntabwo dukunda ibintu byacu, mu by’ukuri tubeshya ko tubikunda kandi tutabikunda.”

Yatanze urugero ku kandi kababaro yagize ubwo Diamond yazaga mu Rwanda yabazwa niba hari umuhanzi wo mu Rwanda yaba azi akazunguza umutwe ndetse agatsembera itangazamakuru ko nta bihangano na bimwe byabo azi kandi yarakoranye indirimbo na Mico The Best.

Uyu muraperi mu gusesengura kwe yagiye atanga ingero ku bahanzi batandukanye agera no kuri Sheebah umaze igihe gito azamutse na Runtown utari uzwi bihambaye mu Rwanda ariko bagahurira mu gitaramo kikitabirwa cyane mu Mujyi wa Kigali mu gihe ngo bigoye ko umwana w’Umunyarwanda yajya muri Uganda cyangwa ahandi ibyo bikamuhira.

Yakomoje kuri Alpha Rwirangira wamunenze na ‘awards’ zitakiba mu Rwanda

Khalfan yakomeje avuga ko Abahanzi bo mu Rwanda bafite ukwitinya bishobora kuba bigirana isano n’uko ibikorwa byabo “ahari bishobora kuba bitari ku rwego rwo kuba byahangana n’iby’abandi.” Yavuze ko hakibura ubufatanye hagati y’abahanzi, abanyamakuru, abafana n’aba-DJs.

Yakomeje agira ati “Uribuka ko Alpha yigeze gutwara ibihembo bya Tusker ndetse afite bibiri, igihugu cyose twarabimenye ariko sinzi kuko yakomeje gukora ariko ntabwo ibikorwa bye twabibonye. Ku rwego rwo muri Afurika y’Uburasirazuba yarakinwe ariko mu Rwanda byari ikibazo gikomeye. Ntabwo tumubona ku rwego yakabaye ariho, sinzi niba wenda imikorere ye ari mibi cyangwa se ibihangano bye bikaba bitanogeye amatwi y’Abanyarwanda, ariko ku rwego mpuzamahanga ari mu bantu twakwerekana ko bashoboye.”

Uyu muraperi yavuze ko kimwe mu bindi bintu abona ko bidindiza iterambere ry’umuziki mu Rwanda harimo no kuba nta bihembo bihatangirwa byibuze n’umuhanzi ushaka kujya kwigaragaza muri ayo mahanga ashobora kuvuga ko yatwaye bikamuhesha ikuzo ryatuma bamwakirana yombi.

Ati “Duheruka Salax Awards, mu by’ukuri niba nta muntu uvuga ati ‘Njyewe ngiye kujya mpemba abahanzi bitwaye neza,’ ni uko ahari ibyo bintu nta gaciro turi kubiha. Birababaje, reba kuba wajya kwaka ‘collabo’ umuhanzi ukomeye wo hanze, aramutse se akubajije ngo ‘Ni ibihe bihembo ufite binyereka ko iwanyu ukunzwe?’ Ntabyo wamwereka. Biramutse bibaye byiza twagira ibihembo tujya duhemba abahanzi bitwaye neza.”

Khalfan, umuraperi umaze iminsi avugisha benshi kubera uburyo yatwawe mu isanduku

Khalfan yamenyekanye bwa mbere mu ndirimbo yitwa “Uvutse ni inde?” yakoranye na Bulldogg, Fireman na Bridu mu 2013. Muri iki gihe na bwo afite izindi zizwi zirimo iyitwa “Ni za nduru,” “Uko Naje,” “Nabibonye Ugiye” ft. Active, “Ibaruwa” ft Yverry n’izindi zitandukanye.

Ni umwe mu bari mu itsinda rya Home Boys ryaje kwimurirwa na Jay Polly muri Tuff Gang by’igihe gito nyuma y’uko abari bayigize bashwanye ariko ntibirambe. Khalfanyanagiye agaragara mu bikorwa byo gufasha ku rubyiniro abandi bahanzi muri PGGSS by’umwihariko abaraperi bagenzi be nka Bulldogg mbere y’uko we ubwe ayigeramo.

Khalfan wavuze ko umuziki wo mu Rwanda uciriritse

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza