Primus Guma Guma yabyimbije imifuka y’abatabarika guhera mu 2011

Yanditswe na Munyengabe Murungi Sabin
Kuya 12 Nyakanga 2018 saa 12:23
Yasuwe :
0 0

Primus Guma Guma Super Star, irushanwa ry’ikinege, rikomeye kandi ryatanze akaryo ku bahanzi n’abakora akazi gashamikiye ku bitaramo n’umuziki mu byiciro bitandukanye mu myaka umunani ishize.

Ni ryo rushanwa rukumbi kandi risumba ayandi mu Rwanda, rihuriza hamwe abahanzi bakomeye baba batoranyijwe ku rwego rw’igihugu ndetse bagahabwa umwanya wo kuzenguruka igihugu cyose biyereka abafana.

Mu myaka umunani ishize, Primus Guma Guma Super Star yabyinishije abatabarika abakunda umuziki batabarika abandi biganjemo abahanzi ibaha igishoro barakora bazamura ubutunzi.

Abaciye muri Primus Guma Guma, ubuzima bwabo bwarahindutse abenshi baguze imodoka nziza abandi bubatse imiturirwa ndetse hari n’abashinze izabo ubu ni abagabo bubashywe mu duce batuyemo. Iyi ngingo hari ushobora kuyihakana akavuga ko iri rushanwa ritaguha miliyoni zagufasha kubaka inzu nk’iyo King James yazamuye ku Ruyenzi. Birashoboka!

Iri rushanwa ritaraza, abahanzi bari batunze imodoka ntibarengaga batanu, Rafiki, Senderi Hit n’abandi bakoze umuziki kera bakabihuza n’imitungo yabo bwite. Uhereye mu 2011, inkundura yo kugura imodoka yahise itangira mu bahanzi ndetse uwinjiraga muri Primus Guma Guma yahita ashyira imbere kugura ikinyabiziga no kwambara neza. Icyo gihe umuhanzi yaguraga imodoka nubwo yaba ‘Gikumi’ itangazamakuru rigatyaza ikaramu.

Iri rushanwa niryo musingi w’ubutunzi benshi mu bahanzi bafite muri iki gihe. Ni igishoro cyabyimbije imifuka ya benshi, abahanzi batabarika bagiye bahabwa akazi mu bigo bikomeye kuko babaga batewe imboni biciye muri PGGSS.

Mu mwaka wa 2012 ubwo King James yatwaraga Primus Guma Guma, yahise agirwa Ambasaderi wa Airtel ahabwa kontaru nziza ndetse kugeza uyu munsi aracyarya kuri aya mafaranga, muri uwo mwaka nibwo Dream Boyz na Kitoko bahise barambagizwa na Tigo na bo bahabwa akazi kabinjirije amafaranga atari make kugeza ubu. Ni ibigo byinshi umuntu atarondora byagiye biha akazi abahanzi ari uko bigaragaje muri PGGSS.

Ntibitangaje kuba umuhanzi nka King James yakubaka etage kuko uhereye mu mwaka wa 2012 agitwara irushanwa yatangiye gukorera amafaranga menshi kuko igikundiro cye cyatumbagiye bityo atangira gusamirwa hejuru. Ni benshi biyubatse mu buryo butandukanye biturutse kuri PGGSS ndetse n’imiryango bakomokamo ikamererwa neza.

Uretse King James hari abandi bahanzi bakuye amafaranga menshi muri PGGSS ndetse bahabwa akazi keza gashamikiye ku muziki ku buryo amafaranga bakuyemo bayubatsemo inzu nziza.

Mu bari kubaka inzu nziza kandi zigezweho, harimo Tom Close, Knowless, Platini na TMC bo muri Dream Boyz bari kubaka mu Mujyi wa Nyamata n’abandi. Ama G The Black na we, inzu atuyemo i Kanombe yayubatse mu mafaranga iri rushanwa cyo kimwe na Senderi, amenshi yakoresheje imirimo ya nyuma y’igipangu aherutse kugurisha niho yayakuye.

Abamwenyuye ni benshi…

Iri rushanwa kuva ryatangira, ryatanze akazi kuri benshi. Bralirwa ubwayo yarungutse kuko yaracuruje karahava, abacuruzi bato mu gihugu hose byumvikane ko na bo basakiwe.

Mu kiganiro na IGIHE, Mushyoma Joseph uyobora EAP ifatanya na Bralirwa gutegura iri rushanwa, yavuze ko rigira ingaruka nziza ku bantu batabarika mu nguni zose z’igihugu uhereye ku bigo binini bibafasha mu mitegurire, abacunga umutekano bigenga, abacuruza restaurants, amahoteli acumbikira abahanzi, abakobwa bakoreshwa mu kwakira abantu mu bitaramo, abafotozi, ibigo by’itangazamakuru, abatunganya amashusho n’abandi mu ngeri zose.

By’umwihariko, irushanwa ryatanze umusoro utubutse mu isanduku ya leta ndetse rigira uruhare rukomeye mu iterambere ry’imiryango y’aba bantu bose bavuzwe hejuru.

Tom Close wabimburiye abandi bahanzi kwegukana irushanwa rya PGGSS mu mwaka wa 2011

Urebye umubare w’abakozi Bralirwa ikoresha kuri buri gitaramo, EAP itangaza ko ubaruye neza bagera muri magana abiri kandi bose bagenerwa umushahara bakanoza imibereho yabo.

Primus Guma Guma, ni ryo rushanwa ryihariye mu gihugu rigera mu bice hafi ya byose by’u Rwanda ndetse rikitabirwa ku rwego ruhanitse aho usanga hari n’ibitaramo byitabirwa n’abakunzi ba muzika barenga ibihumbi 20.

Imijyi yose iberamo irushanwa rya Primus Guma Guma usanga hari urujya n’uruza rw’abantu, abanyonzi n’abamotari na bo usanga basakiwe. Ibyishimo usanga bisendereye muri buri gace irushanwa rigeramo, abacuruza babona urwunguko rwisumbuye nko mu bihe bya Noheli n’ubunani.

Kunenga iri rushanwa ni ukwirengagiza…

Igihe cyose umuntu akoze akazi ke ntacyerekezo afite ntashobora gutera imbere. Abahanzi barinenga, umubare munini ni abacunze nabi amafaranga bahembwe nyuma bagasubira mu buzima budashimishije.

Kuva mu mwaka wa 2008 ubwo Salax Awards zatangwaga ku nshuro ya mbere hari byinshi byatangiye guhinduka mu muziki. Aho Primus Guma Guma yaziye bwo hahindutse byinshi mu buryo bwiza.

Nubwo abafana b’umuziki nyarwanda hari byinshi banenga, mu mitegurirwe y’iri rushanwa hagakwiye kuzirikanwa akazi gakomeye ryakoze n’inyungu ryazaniye Abanyarwanda uhereye ku bahanzi ubwabo ndetse n’abanyarwanda muri rusange.

- Abahanzi bagiye baryitabira bavanyemo umusaruro w’amafaranga,
Abahanzi ryabafashije kwigwizaho abafana no kurushaho kumenyakana.

- Iri rushanwa ryashyize mu bahanzi umutima wo gukora cyane buri wese aharanira kuza imbere ngo azatorwe mu bahanzi icumi baba bagomba guhatanira iri rushanwa.

- Iri rushanwa ryongeye ihangana rigamije inyungu(competition) mu bahanzi.
- Buri muhanzi akora ashakisha uburyo yarusha bagenzi be ngo azajye mu bahatana.
- Benshi mu banyarwanda bahawe akazi kubera iri rushanwa.
- Niyo mpamvu umuhanzi ubuze amahirwe yo kuryinjiramo ababara cyane

Nubwo mu mitegurirwe y’iri rushanwa hari bimwe abanyarwanda batavugaho rumwe n’abaritegura cyangwa imitangirwe y’igikombe , ntibakwiye kwiyibagiza ko hari inyungu zikomeye ryazaniye abahanzi.

Ni gake cyane byagiye bibaho mu Rwanda ko umuhanzi nyarwanda akorera miliyoni y’amafaranga mu kwezi kumwe. Mu Rwanda, abantu bahembwa miliyoni ku kwezi babarirwa ku ntoki nyamara Bralirwa yo aya mafaranga iyahemba buri muhanzi winjira muri iri rushanwa ndetse akayabona buri kwezi mu gihe cy’amezi ari hagati y’ane n’atandatu hakiyongeraho ibihembo bitangwa ku munshi wa nyuma.

Umuhanzi wa mbere ahabwa miliyoni 24 mu gihe abamukurikira bahembwa uhereye kuri miliyoni zirindwi gusubiza hasi bitewe n’uko bagiye bakurikirana.

Primus Guma Guma Super Star imaze imyaka irindwi ibera mu Rwanda kuva muri 2011. Bwa mbere yatwawe na Tom Close, King James (2012), Riderman (2013), Jay Polly (2014), Knowless (2015), Urban Boyz(2016) ndetse na Dream Boyz iheruka kuritwara muri 2017.

Ubu, iri rushanwa riri kuba ku nshuro ya munani, rihuje abahanzi icumi Young Grace, Christopher, Bruce Melody, Uncle Austin, Khalfan, Jay C, Queen Cha, Just Family, Active na Mico The Best.

Mu bahatanye uyu mwaka, buri wese aracyafite amahirwe yo kwegukana irushanwa, kuva kuva ryatangira kugeza uyu munsi, byagarutsweho kenshi ko hagati ya Christopher na Bruce Melody umwe azegukana iki gihembo nihatabaho gutungurana mu bandi bahanzi basigaye.

Irushanwa rya Primus Guma Guma Super Star risigaje igitaramo kimwe kinini ari nacyo kizarisoza ku itariki ya 14 Nyakanga 2018 kuri Stade Amahoro i Remera.

Uko ibihembo bizatangwa:

- Uwa mbere azahabwa miliyoni 20
- Uwa kabiri azahabwa miliyoni enye n’igice
- Uwa gatatu azahabwa miliyoni enye
- Uwa kane azahabwa miliyoni eshatu n’igice
- Uwa gatanu azahabwa miliyoni eshatu

King James yahawe iki gihembo mu mwaka 2012, Jay Polly atsinda mu 2014
Abaraperi Riderman na Jay Polly batsindiye Primus Guma Guma mu myaka ibiri ikurikirana
Riderman, umuraperi wa mbere watwaye PGGSS mu 2013 hanyuma Jay Polly atsinda mu 2014
Knowless, ni we mukobwa rukumbi watsindiye PGGSS mu myaka umunani rimaze
Umunsi Knowless yatsindiye iri rushanwa mu 2015
Urban Boyz yatwaye iki gihembo mu 2016 nyuma iza gucikamo ibice
Dream Boyz niyo iheruka gutwara iki gikombe, yari imaze kurushanwa inshuro zigera kuri esheshatu
Iri rushanwa ryitabirwa n'umubare munini w'abafana kuva ryatangira
Mu mwaka wa 2017 ni gutya byari byifashe kuri Stade Amahoro mu kurisoza
Iyi ni Dream Boyz ubwo yaririmbaga ku munsi yatwariyeho igihembo
Mu mwaka wa 2012, Jason Derulo yaje i Kigali gusoza PGGSS
Jay Polly, Jaason Derulo na King James mu mwaka wa 2012
Mu mwaka wa 2011, Rafiki yaririmbaga abafana bamuteruye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza