Riderman ari gusoza imirimo ya Album ye “Kimirantare” yitegura kumurika

Yanditswe na Nsengiyumva Emmy
Kuya 9 Ukwakira 2019 saa 11:47
Yasuwe :
0 0

Gatsinzi Emery wamenyekanye nka Riderman ni umwe mu baraperi bamaze igihe bayoboye abandi mu Rwanda.

Riderman yatangaje ko ageze kure imirimo yo gutunganya Album ye nshya “Kimirantare” yitegura kumurika mu Ukuboza 2019.

Abinyujije ku mbuga nkoranyambaga, Riderman yagaragaje ko yitegura gushyira hanze Album ye nshya yamaze kurangira. Yashyize hanze ifoto izaba iyiranga arangije yandikaho ati “Kimirantare iraje vuba”.

Muri Gicurasi 2019 ubwo uyu muraperi yaganiraga n’umunyamakuru wa IGIHE , yavuze ko iyi album azayimurikira abakunzi be mu gitaramo yabamanyereje cyo kuri Noheli.

Ibitaramo bya Riderman bimenyerewe ko biba tariki 25 Ukuboza ni nako avuga ko bizagenda muri uyu mwaka wa 2019 aho azaba amurika Album ye “Kimirantare”.

Riderman ari mu bahanzi bazanye amatwara mashya mu muziki agakundisha abantu ibihangano bya Hip Hop mu Rwanda, ubwamamare bugaragazwa na album zirindwi amaze gushyira hanze.

Kuva mu 2008 ubwo yamurikaga album ye ya mbere nta na rimwe arakora igitaramo ngo abure abantu, ahubwo muri Petit Stade aho ibitaramo bye bikunze kubera haba hakubise huzuye.

Igitaramo aheruka gukora akishimirwa mu buryo bukomeye ni icyo yakoze muri 2017, amurika Mixtape ye yise ‘Filime’ .

Riderman yavukiye i Bujumbura tariki 10 Werurwe 1986. Ni we mfura mu bavandimwe batanu bavukana, abahungu batatu n’abakobwa babiri.

Mu mabyiruka ye, yakundaga gukina umupira w’amaguru gusa ngo yakundaga radiyo bitangaje ku buryo bayimukubitiraga kubera kuyicokoza! Nubwo yakundaga muzika ngo ntabwo yumvaga ko azavamo umuririmbyi ahubwo inzozi ze zari kuzandika igitabo.

Yatangiye kwandika imivugo ageze mu mashuri yisumbuye maze akumva indirimbo yibanda cyane ku magambo azigize;mu kumva indirimbo z’umuhanzi 2PAC niho yakuye igitekerezo cyo gukoresha imivugo yahimbaga agatangira kuyiririmba.

Yatangiye kuririmba nyuma ya 2005, muri Gicurasi 2006 yinjiye muri groupe UTP soldiers yari igizwe n’inshuti ze NEG G The General na MIM, yakoranye indirimbo umunani na UTP maze asohora indirimbo ku giti cye ya mbere mu 2007 yise ‘Turi muri Party’ ; gusa ntiyatinze muri iri tsinda kuko yaje kurivamo maze atangira gukora ku giti cye.

Gatsinzi Emery wamamaye nka Riderman
Mu bitaramo bye, Riderman ntajya abura abafana
Kimirantare niyo Album ya munani Riderman agiye gukurikizaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza