Sheebah yatumiwe muri Ottawa mu birori byerekanirwamo imideli yo mu Rwanda

Yanditswe na Munyengabe Murungi Sabin
Kuya 11 Kanama 2018 saa 11:19
Yasuwe :
0 0

Sheebah Karungi uri mu bakunzwe cyane muri Afurika y’Uburasirazuba, yatumiwe mu gitaramo gikomeye mu Mujyi wa Ottawa, ategerejwe kuri uyu wa Gatandatu tariki ya 11 Kanama 2018.

Uyu mukobwa ubu uri imbere mu bakunzwe kandi bagezweho muri Uganda amaze iminsi atumirwa mu bihugu bitandukanye birimo n’u Rwanda. I Kigali, amaze iminsi acurangwa cyane kubera ‘Binkolela’ yakoranye na The Ben.

Ubu, Sheebah ari muri Canada mu rugendo rw’ibitaramo byiswe “Rebel”, yabanje kuririmba i Montreal agomba gukomereza mu Mujyi wa Ottawa kuri uyu wa Gatandatu mu birori byateguwe n’Abanyarwanda ahitwa Lusitania Portuguese center of Ottawa.

Marshal Ubaruta, ni umunyamideli wabikoze mu myaka ishize mu Rwanda abikomereza muri Canada ari naho atuye. Ni umwe mu bateguye ibi birori byatumiwemo Sheebah muri Ottawa afatanyije na bagenzi be bane.

Yabwiye IGIHE ko iki gitaramo kizaba ari uruhurirane rw’umuziki no kumurika imideli yakorewe mu Rwanda biciye muri Keza Shop afatanyije n’umugore we. Iyi mideli izamurikwa n’abahanga muri uyu mwuga barimo abo muri Canada, Aziya ndetse na bake baturuka mu Rwanda.

Yagize ati “Ni igitaramo kirimo umuziki ariko hakabamo n’igikorwa cyo kwerekana imideli. Muri ibi byo kwerekana imideli tuzerekana imyambaro yakorewe mu Rwanda biciye muri Keza Shop mfatanyije n’umugore wanjye Sarah, mfite umudozi mu Rwanda ariko ibyerekeye gukora moderi tubikorera hano hanyuma bigatunganyirizwa iwacu.”

Yongeyeho ko bahisemo gutumira Sheebah Karungi nk’umwe mu bakobwa bakunzwe cyane muri Afurika y’Uburasirazuba bikiyongeraho ko iki gikorwa kizahuriza hamwe abakunda umuziki bo mu bihugu bitandukanye byo mu karere u Rwanda ruherereyemo.

Yagize ati “Ntabwo twarebaga ku bakunda umuziki bo mu Rwanda gusa, twahisemo umuhanzi nka Sheebah kuko arakomeye muri iki gihe muri Afurika y’Uburasirazuba, ikindi kandi twateguye iki gikorwa dusanga yari afite ikindi gitaramo ategura muri Montreal na Ali Kiba duhita duhitamo uyu mukobwa. Ni umwe mu bakunzwe cyane ku buryo kumuhitamo ari ingenzi cyane.”

Marshall Ubaruta uhagarariye ibyerekeye kumurika imideli muri ibi birori, asanzwe abikora nk’umwuga muri Canada. Mbere y’uko ajyayo yabanje gukorana na Premier Model Agency[PMA], i Toronto yakoranye na Orange Model Management imufasha kugaragara mu bikorwa bikomeye byo kwamamaza, mu 2016 ni umwe mu bamuritse imideli muri Toronto Africa Fashion Show imwe mu zikomeye cyane.

Sheebah Karungi yagiye muri Canada gukorerayo ibitaramo

Sheebah namara gutaramana n’Abanyarwanda, azakora igitaramo gisoza urugendo rwe muri Canada nyuma y’icyo azakora ku itariki ya 7 Kanama 2018. Muri iki gitaramo azafatanya na Yemi Alade, Ali Kiba, Zahara, Nonso Amadi, Nsoki n’abandi.

Marshall Ubaruta, umwe mu bateguye iki gitaramo
Ubaruta Marshall asanzwe akora ibyerekeye imideli nk'umwuga
Sheebah Karungi yatumiwe n'Abanyarwanda muri Ottawa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza