Tom Close yatangiye kunoza umushinga wa album ya karindwi

Yanditswe na Munyengabe Murungi Sabin
Kuya 3 Kanama 2018 saa 01:56
Yasuwe :
0 0

Tom Close ageze kure umushinga wo gutegura album ya karindwi, nirangira azaba mu ba mbere bakora umuziki ku giti cyabo uzaba ugwije nyinshi mu bakora umuziki muri iyi myaka.

Tom Close, umwe mu bamaze imyaka myinshi bakunzwe mu muziki mu Rwanda, namurika album ye ya karindwi bizatuma aza imbere mu bahanzi bamaze kumurika album nyinshi mu gihugu cyane cyane mu bo mu kigero cye.

Album ya karindwi ya Tom Close izaba igizwe n’indirimbo zirimo, "Uramutse Wemeye", "Ferrari", “My Love”, “Naba umuyonga”, “Igikomere" yakoranye na Bull Dogg, “Thank You” yamuhuje na The Ben n’izindi nyinshi.

Yabwiye IGIHE ko, izi ndirimbo hamwe n’izindi nshya ateganya gusohora vuba zizaba zibumbiye hamwe kuri album atarabonera izina. Mu nshya zizayigaragaraho, harimo ‘Nabigize indahiro’ yasohoye uyu munsi.

Ati “Inganzo yo gukora iyi ndirimbo nayikuye ku buzima busanzwe bwo mu rukundo aho usanga mu rukundo muri iki gihe bisigaye biba byoroshye ko hazamo kidobya. Ndeba uruhande rwiza muri bintu byose aho umuntu ashobora kuvuga ati ‘kugukunda nabigize indahiro’ muri byose.”

Tom Close yasohoye imwe mu ndirimbo zizaba zigize album ya karindwi yitegura gusohora

Tom Close yongeyeho ko, uretse indirimbo nshya agiye kujya asohora imwe ku yindi, ateganya no gukora igitaramo kigari azamurikiramo album ya karindwi ibumbiye hamwe indirimbo ziganjemo iz’urukundo amaze igihe asohora.

Ati “Mu minsi iri imbere ndateganya gukora igitaramo kinini ariko ndacyarimo kuganira n’abantu tuzafatanya kugira ngo nikiba kizagende neza.”

Tom Close avuga ko nyuma ya ‘Nabigize indahiro” yiteguye gusohora ibindi bihangano byinshi mu 2018 bizajya bijyana n’amashusho mu kurushaho kwegera abakunzi be no gukora birushijeho. Ati “Abafana mbahishiye guhozaho nkabaha ibihangano byiza biryoheye amatwi n’amaso.

Tom Close ni umuhanzi wakunze kwigaragaza mu njyana ya RnB mu Rwanda.

Yatangiye kumenyekana cyane mu mwaka wa 2007, mu 2011 yegukana irushanwa rya PGGSS ku nshuro yaryo ya mbere. Kuri ubu arubatse ndetse abangikanya ubuhanzi n’umwuga w’ubuganga.

Tom Close yari amaze iminsi ajya hanze gukorerayo amashusho y'indirimbo, aya 'Nabigize indahiro' yo yayakoreye mu Rwanda
Tom Close afatanya umuziki n'ubuganga ndetse no kwandika ibitabo by'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza