Umuti wa Dj Bissosso ku bakoresha abakobwa bambaye ubusa mu ndirimbo

Yanditswe na Munyengabe Murungi Sabin
Kuya 9 Nyakanga 2018 saa 02:27
Yasuwe :
0 0

Dj Bissosso, umwe mu bakomeye kandi bakunzwe mu Rwanda ntavuga rumwe n’abahanzi bakora amashusho arimo abakobwa bambaye ubusa mu gushakisha uburyo umuziki wabo warangaza abantu cyane.

Sakubu Hassan uzwi ku izina rya DJ Bissosso ni Umurundi ufite ubwenegihugu bw’u Rwanda. Aza mu ba mbere bakunzwe mu gihugu ndetse ni we witabazwa mu bitaramo bikomeye nka Primus Guma Guma Super Star; mu bindi binini nabwo usanga afatanya na mubyara we Dj Ira.

Yamamaye cyane mu Rwanda mu myaka irenga icumi ishize, yacuranze mu bitaramo bikomeye hafi ya byose byagiye bitumirwamo abahanzi mpuzamahanga basuye igihugu mu myaka ishize.

Dj Bissosso yabwiye IGIHE ko mu byamufashije cyane kugira ngo ageze uyu munsi akigaragara mu bakomeye mu Rwanda, ku isonga haza kwicisha bugufi, gukunda no kubaha akazi akora.

Yagize ati “Icya mbere cyamfashije ni uko akazi nkora ndakubaha nkanagahesha agaciro, ikindi nkagerageza kubana n’abantu nkorera ako kazi neza. Mu bindi byamfashije ni ukwirinda icyo bita umurengwe no kwizamura, ahubwo ugakora ibikorwa kandi ukagerageza gukora buri munsi nk’umusirikare w’u Rwanda.”

Ni we winjije Dj Ira mu kazi ko kuvanga umuziki ndetse kugeza ubu uyu mukobwa amaze kwigaranzura ab’igitsinagore bari basanzwe bakora aka kazi mbere y’uko aza muri uyu mwuga.

Dj Bissosso avuga ko umuvandimwe we amaze kugera ku ntera nziza ndetse ko amubonamo imbaraga zikomeye mu myaka iri imbere mu mwuga wo kuvanga umuziki muri Afurika y’Uburasirazuba.

Yagize ati “Dj Ira ubu ameze neza cyane, buri mwaka agenda azamuka mu ntera. Igihe abantu bamumenye njye nahise muha amanota 40 ku ijana, ubu rero kubera ko nsigaye mwohereza wenyine agakora neza ageze kuri 65 ku ijana.”

Yongeyeho ati “Ibyo mubwira, mpora musaba ko kuriya nabanye n’abantu niko nshaka ko na we abaho. Ntazahindurwe n’abantu bamwita icyamamare, azareke bamwite icyamamare ariko abiharanire azakomeze abe icyamamare.”

Mu myaka cumi n’itanu amaze avanga umuziki, Dj Bissosso avuga ko yungukiyemo byinshi haba kunguka inshuti, kumenyekana no kubyaza amafaranga uyu mwuga. Ubu, afite intego yo kwinjira mu byo gukora amashusho y’indirimbo akajya ayobora abahanzi bo mu Rwanda bagacika ku muco wo gukoresha abakobwa bambaye ubusa mu ndirimbo.

Yagize ati “Nifuza ko mu minsi iri imbere nzaba ndi producer wa Video kugira ngo aba bahanzi bacu ntibazongere kujya badukorera ibintu bidashimishije. Nzajya mbabwira uburyo bakoramo video ikaryoha kandi ijyanye n’umuco.”

Akomeza agira ati “Ibintu ntakunda muri videos ni uburyo bambika abakobwa ubusa, ntabwo binshimisha. Nanga cyane kuriya berekanamo amashusho agaragaza ubusinzi, ntabwo ari ibintu byiza. Nkunda iyo bari kwerekana abantu bari mu mirimo, abari gutanga serivisi, kwerekana ahantu haranga igihugu heza, ku buryo n’umuntu yareba video akavuga ati ‘hariya hantu ni mu Rwanda reka ngende mpasure’.”

Dj Bissosso umaze imyaka irenga cumi n'itanu mu mwuga wo kuvanga imiziki

Mu bisobanuro abakoresha abakobwa bambaye ubusa muri video batanga, ahanini bashimangira ko ari uburyo bwiza bwo kugeza umuziki wabo ku rwego mpuzamahanga bakabishingira ku zindi ngero z’abahanzi bazwi ku Isi na bo babigenza uko.

Kuri Dj Bissosso ngo “Nta terambere ririmo. Iyo umuhanzi akoze amashusho agashyiramo abakobwa bambaye ubusa hari ahantu aba yikumiriye […] Kwambika ubusa abantu ntabwo ari byo na gato.”

DJ Bissosso mu Mujyi wa Kigali, yacuranze igihe kinini muri Horizon Garden (yahoze muri UTC), yacuranze kandi muri La Classe[akabari kashyuhaga cyane hafi ya Banki yahoze yitwa BCR mu Mujyi wa Kigali].

Ni umwe mu bavanze umuziki kuri Contact FM nayo yakanyujijeho mu miziki igezweho mu myaka yayo ya mbere. Mu myaka itanu ishize, Dj Bissosso yahuzaga ibyo kuvanga imiziki no gucunga inyungu z’akabyiniro ke kitwaga Olympia (kabaga i Burundi).

Dj Bissosso, ni umwe mu bagiye begukana ibihembo ku bw'akazi akora
Dj Bissosso na mugenzi we Anita Pendo bagikorana mu kiganiro kuri Televiziyo y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza