Urwenya ku bapasiteri bakomeye mu Rwanda rwatembagaje benshi (Amafoto & Video)

Yanditswe na Dusabimana Aimable
Kuya 29 Nyakanga 2018 saa 02:58
Yasuwe :
1 0

Abanyarwenya bahuriye muri Comedy Knights bafatanyije n’abandi baturutse mu bihugu bitandukanye basekeje imbaga yitabiriye iserukiramuco ry’urwenya ryabaye ku nshuro ya kabiri mu Mujyi wa Kigali, mu ngingo z’ingenzi bibanze ku bapasiteri bo mu Rwanda.

Iki gitaramo cyabaye mu ijoro ryo kuri uyu wa 28 Nyakanga 2018 muri KCEV [Camp Kigali] kikitabirwa n’abiganjemo urubyiruko, abakunda urwenya mu zindi ndimi nk’Igifaransa n’Icyongereza. Umunota ku wundi, imbaga y’abitabiriye yasekeraga icya rimwe mu rwenya rwari rurangajwe imbere n’abarimo Daliso Chaponda, Joshua Kamirindi, Nkusi Arthur na Emeka wo muri Uganda.

Usibye aba banyarwenya hari n’abandi batandukanye baturutse mu bihugu nka Cameroun, Zimbabwe na Repubulika Iharanira Demokarasi ya Congo bose basekeje abitabiriye Kigali International Comedy Festival bagatahana inseko n’akanyamuneza.

Mu rwenya rwasekeje benshi, umunyarwenya Joshua Kamirindi yibanze ku mazina y’abapasiteri bo mu Rwanda n’ay’ibyamamare mu muziki.

Yagize ati “Kera bakwitaga izina ukamenya inkomoko y’umuntu, nk’umuntu kera bitaga Kamuhanda yabaga yavukiye ku muhanda, Kanyanzira yabaga yavukiye ku nzira, ariko amazina y’ubu nk’inkomoko ya Pastor Mpyisi ni iyihe? Inkomoko ya Pastor Rugagi ni iyihe? Imana iramutse ivuze ngo amazina yanyu ahinduke nk’uko mwitwa, ndababwiza ukuri abapasiteri dufite muri iki gihugu bakomeye bose bahita bajya muri Pariki y’Akagera.”

Yakomeje ati “Pasiteri Mpyisi yajyayo, Pasiteri Rugagi akamukurikira, ubu mwese muri kwibaza ngo Pasiteri Masasu azajya hehe? Na we azajya muri pariki kuko nta n’imwe ijya ibura ba rushimusi, icyo gihe isasu rizavuga bifitwemo uruhare na we, hahite haba intambara, Pasiteri Ntambara na we abasangeyo. Uwo twagasigarana ni Pasiteri Gitwaza na we azajya abatwaza imbunda abasangeyo.”

Kamirindi yanakomoje ku mazina y’abahanzi avuga ko nka King James yahita aba Umwami naho Queen Cha akamubera umwamikazi ariko yongeraho ko batamarana kabiri kuko umwe yajya atera “Umuriro Watse” undi akabisesa avuga ko akeneye “Kizimyamoto”. Yifashishije indirimbo zabo bisetsa benshi.

Emeka wo muri Uganda yakomoje ku bitandukanye igihugu cye n’u Rwanda avuga ko mu gihe u Rwanda ruri gukorana na Arsenal, Museveni we ari gushyiriraho umusoro abakoresha imbuga nkoranyambaga, mu gihe rwamuritse uruganda ruteranya Volkswagen, we akaba yaramuritse urwa za ‘Tuku tuku’.

Uyu na we yakomoje ku bapasiteri yibanda cyane ku buryo abo mu Rwanda babwiwe kwiga amasomo ya tewolojiya. Yavuze ku bavuga indimi bamwe ntibumve ibyo bavuga.

Nkusi Arthur na we ari mu basekeje benshi mu rwenya rwibanze ku buryo abantu bashaka kwamamaza basigaye bibfashisha ‘aba-Slay Queens’ [abakobwa b’ibizungerezi] ahita ashushanya nk’igihe amatangazo y’umuganda n’ay’imisoro yabakoreshwa batigisa umubyimba, ibintu byatembagaje benshi.

Uyu munyarwenya ukomeye mu Rwanda yakomoje no ku buryo butangaje Abahinde bavugamo icyongereza arabigana bisetsa benshi. Iki gitaramo cyapfundikiwe n’urwenya rwa Daliso Chaponda wigaragaje muri Britain’s Got Talent, uyu na we yishimiwe ndetse wabonaga ko benshi basanzwe bamuzi, byatumye bamukurikira kugeza asoje nubwo amasaha yari ageze kure.

Comedy Knights yakoze iki gitaramo ni itsinda ryashinzwe mu 2010, rimaze kwerekana ubuhanga mu bakora ibiganiro n’ibitaramo byo gusetsa abantu, rigizwe na John Muyenzi “Babu”, “George” Birungi, Tuyisenge Jean “Divin”, “Michael” Sengazi, “Joshua” Kamirindi na “Jerome” Migisha urimo nk’umujyanama mu bikorwa bakora.

Bafite intego yo kwinjiza umuco wo guseka mu Banyarwanda bikaba kimwe mu bibaranga aho bari hose bakagaragaza akanyamuneza.

Abantu bari basetse batembagaye
Abanyarwenya bose bigaragaje muri iki gitaramo
Abitabiriye iki gitaramo bagaragazaga akanyamuneza
Babu uri mu bagize Comedy Knights
Mbere y'abatera urwenya abitabiriye basusurutswaga n'abyina
Daliso Chaponda imbere y'abitabiriye iki gitaramo
Daliso wigaragaje muri Britain's Got Talent atera urwenya akora n'ibintu bisekeje
Umunyarwenya Joshua Kamirindi yavuze urwenya ku mazina y'abavugabutumwa bazwi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza