Urwibutso rwa Ne-Yo ku gitaramo gikomeye yakoreye i Kigali

Yanditswe na Uwiduhaye Theos
Kuya 11 Nzeri 2019 saa 01:21
Yasuwe :
0 0

Umunyamerika Shaffer Chimere Smith wamamaye mu muziki nka Ne-Yo [Gogo] yavuze ku gitaramo yakoreye mu Rwanda kigasigara mu mitwe no mu mitima ya benshi.

Ni igitaramo uyu muhanzi w’ikirangirire yakoze ku wa 7 Nzeri 2019 muri Kigali Arena, i Remera cyitabirwa n’ababarirwa mu bihumbi bitandatu by’abakunzi b’umuziki.

Yahuriyemo n’abandi bahanzi bo mu Rwanda bari barangajwe imbere na Meddy, Riderman, Bruce Melodie na Charly na Nina. Umunyarwandakazi Sherrie Silver uri mu babyinnyi bafite izina rikomeye ku Isi nawe yarigaragaje.

Uretse abanyarwanda bari bitabiriye iki gitaramo, Ne-Yo yari yahuruje n’abandi bo mu bihugu bituranye n’u Rwanda bihebeye umuziki we kuva kera agitangira kuririmba n’abamumenye mu bihe byashize.

Uyu muhanzi yakandagije ikirenge ku Kibuga Mpuzamahanga cy’Indege cya Kigali i Kanombe mu rukerera ku wa 6 Nzeri 2019, saa saba n’iminota 10.

Kuri uwo munsi ari no mu bitabiriye umuhango wo Kwita Izina abana 25 b’ingagi wabereye mu Kinigi mu Karere ka Musanze aho nawe yise umwana w’ingagi izina rya ‘Biracyaza’.

Mbere yo gusubira iwabo ku wa 8 Nzeri yasuye Urwibutso rwa Jenoside rwa Kigali.

Uyu muhanzi mu butumwa yacishije ku rukuta rwe rwa Instagram buherekejwe n’amashusho agaragaza ibihumbi by’abafana bari bitabiriye igitaramo cye, yagaragaje ko yashimishijwe bikomeye no kuririmbira mu Rwanda.

Ati “ Muri Kigali Arena mu Rwanda gutaramira abantu kwanjye byari filime. Natumye mwishima mwese. Ni ah’ubutaha. #KwitaIzina2019.”

Uyu muhanzi yari aherutse kwandika kuri Twitter abwira abanyarwanda ko kubera urukundo bamweretse n’uko yakiriwe mu buryo budasanzwe agiye kumenyekanisha igihugu ku Isi yose.

Icyo gihe yagize ati “Ku baturage beza b’i Kigali mu Rwanda mwarakoze cyane ku bw’urukundo mwanyeretse n’uko mwanyakiriye. Urugendo rwanjye rwari rwiza cyane kandi ndabasezeranya ko ngiye gutuma Isi imenya ko u Rwanda ari rwiza. Urukundo rwinshi ku mwana w’ingagi wanjye ‘Biracyaza’! Papa wawe aragukunda.”

Ne-Yo yigaruriye imitima ya benshi binyuze mu bihangano bitandukanye birimo “So Sick”, “One In A Million” “Miss Independent”, “Marry You”, ‘‘Sexy love’’ yakoranye na Diamond Platnumz n’izindi.

Ne-Yo w’imyaka 39 yatangiye kumenyekana mu 1998. Yatangiye umuziki akiri umunyeshuri, aba mu itsinda ryitwaga Envy ryaje gusenyuka mu 2000, ahita awukora ku giti cye n’ubwo bitari byoroshye.

Mu 2004 nibwo yatangiye kumenyekana ubwo yagiraga uruhare mu kwandika indirimbo ya Mario yitwa “Let Me Love” yanakunzwe cyane.

Umwaka wa 2006 niwo wasize Isi yose irangamiye uyu mugabo ubwo yashyiraga hanze album ye ya mbere yitwa “In My Own Words” yabaye iya mbere ku rutonde rukorwa na Billboard muri Amerika.

Mu 2007 yasohoye album yise “Because of you”; “Year of the Gentleman’’ yo mu 2008; mu 2010 yamuritse “Libara Scale’’, 2012 yasohoye ‘‘R.E.D’’, 2015 yasohoye ‘‘No-Fiction’’ naho mu 2018 yasohoye ‘‘Good Man’’.

Ne-Yo yegukanye ibihembo bya Grammy mu 2009 harimo icya album nziza yo mu njyana ya R&B “Because Of You” na Miss Independent yahembwe nk’indirimbo yahize izindi za R&B.

Ne-Yo yakoreye igitaramo cy'amateka mu Rwanda
Ne-Yo yari ari mu bagomba kwita izina umwa w 'ingagi amwita ‘Biracyaza’
Umukuru w'Igihugu yari afite akanyamuneza ko kwitabira igitaramo cya Ne-Yo
Umunyamerika Shaffer Chimere Smith wamamaye mu muziki nka Ne-Yo yasigiye ibyishimo abakunzi b'umuziki i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza