Weasel yafashwe n’ikiniga abajijwe uko yaguye nyuma y’urupfu rwa Radio

Yanditswe na Dusabimana Aimable
Kuya 3 Kanama 2018 saa 03:40
Yasuwe :
0 0

Umuririmbyi Douglas Mayanja [Weasel] uri mu Mujyi wa Kigali aho yaje kwitabira igitaramo cya DJ Pius, yagaragaje amarangamutima y’umubabaro n’intimba ikomeye ubwo yabazwaga kuri Radio bahoze baririmbana.

Ibi byabaye ku mugoroba wo kuri uyu wa Kane, tariki 2 Kanama 2018, mu kiganiro n’itangazamakuru cyabereye ku Kimihurura akabazwa icyo atekereza kuri bimwe mu bitangazamakuri byo muri Uganda n’abafana bamushinja ko yaguye nyuma yo gukomeza gukora umuziki ari wenyine ndetse akaba atarakora ibikorwa bikomeye.

Uyu muhanzi yabanje gushimira uko Abanyarwanda bamufashe mu mugongo mu gihe yari ari mu kababaro ko gutakaza Mowzey Radio, ashimangira ko nubwo batakiri kumwe abitabira igitaramo yajemo batungurwa no kumubona nk’umuhanzi ufite imbaraga kandi w’umunyempano.

Weasel yanyomoje abavuga ko yari mu mutaka wa Radio wakundwaga na benshi avuga ko arambwiwe ibibazo “by’ubucucu” nk’ibyo kuko agikeneye igihe cyo kwakira gutakaza umugandimwe we hanyuma agakomeza umuziki neza. Yemeje ko ahishiye byinshi abitabira igitaramo cye no kubereka ko ari umuhanzi utisukirwa.

Yagize ati “Ariko se kuki batandika kuri Ziggy Dee cyangwa undi muhanzi wo muri Uganda? Yego nibyo abantu bamwe turi ibyamamare, impamvu bavuga kuri njyewe ni uko bazi ko mbizi. Uzi impamvu abantu birirwa bavuga kuri ziriya nyenyeri ziri hejuru? Ni uko batazizi. Ntabwo bari ngo zifite iyihe shusho!”

Yongeyeho ati “Njyewe mfite impano ndetse ubu mfite na album yuzuye kandi iteguye neza. Iyo utakaje umuntu ugomba kugira akanya ko gushira ishavu. Ntekereza ko nabuze umuvandimwe, ntabwo rero nabyuka ngo mpite njya muri ‘studio’ gutyo gusa. Nkeneye umwanya wo kwisubiranya, ngo nibagirwe ibyashize.”

Yakomeje avuga ko ibyo bitavuze ko yaguye ashimangira ko yageze kure hashoboka, uko yabaye umuhanzi wa mbere muri aka karere watowe muri BET Awards n’ibindi bihe byiza umuziki we wanyuzemo byemeza ko afite impano kandi atasubiye hasi.

Ati “Uwo ni umurage, icyo nicyo mwagakwiye kuba muvugaho. Ntekereza ko ahubwo utakambajije utyo, ahubwo ukwiye kunyubahira kuba narabaye umuhanzi wa mbere muri East Africa wagiye muri BET Awards. Rero nkeneye umwanya wo kuruhuka no kwisuganya. Ntabwo watakaza umubyeyi, ngo ubyuke ujya mu kazi, n’ishuri warisubika n’amezi atandatu agashira. Mureke nduhuke nisuganye neza. Murakoze.”

Ni ubwa Weasel aje mu Rwanda nyuma y'igihe gishize Radio apfuye

Weasel yasubije iki kibazo agaragaza amarangamutima menshi no kugorwa n’ibyo atekereza ku buryo nta kindi yongeye gusubiza ahubwo ibisigaye bikakirwa n’umujyanama wabo aruhura uyu muhanzi wabonaga ko afite ikiniga n’intimba kubera kongera kwibutswa Radio baririmbanaga no kubwirwa ko we adashoboye nka nyakwigendera.

Mowzey Radio ubusanzwe witwa Moses Ssekibogo yavutse muri Mutarama 1985 yitaba Imana tariki ya 1 Gashyantare 2018. Bamwe bamufataga nk’umuririmbyi w’imena mu itsinda Good Life yari ahuriyemo na Weasel uvukana na Chameleone kuri ubu ugikomeje gukora umuziki yusa ikivi cya mugenzi we.

Weasel yahoze aririmbana na Mowzey Radio witabye Imana muri Gashyantare 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza