Amagambo yuje uburyohe Justin Bieber yabwiye umukobwa yambitse impeta

Yanditswe na IGIHE
Kuya 10 Nyakanga 2018 saa 11:20
Yasuwe :
1 0

Justin Bieber ufatwa na bamwe nk’umunyarugomo, yabonye umukobwa bemeranya gufatanya urugendo rw’urukundo ndetse mu mpera z’icyumweru gishize yamwambitse impeta ya fiançailles.

Umunyamideli Hailey Baldwin, ubu ni we mukunzi w’ibihe byose wa Justin Bieber; yamusabye ko yamwambika impeta ku wa Gatandatu tariki ya 7 Nyakanga 2018 ubwo bari mu kiruhuko cyo kwizihiza urukundo rwabo muri Bahamas.

Hailey Baldwin, ni umunyamideli w’Umunyamerika, abifatanya n’akazi akora kuri Televiziyo. Uyu mukobwa w’imyaka 21, ni mwene Stephen Baldwin uzwi cyane muri sinema ya Hollywood.

Iby’uko Justin Bieber yambitse impeta Hailey Baldwin, byatangajwe bwa mbere na TMZ nyuma ababyeyi ku mpande zombi bandika ku mbuga nkoranyambaga babishimangira mu buryo buhishe.

Justin Bieber yemeje burundu iby’iyi mpeta ipfunditse urukundo rwe na Hailey Baldwin. Uyu muhanzi w’imyaka 24, yanditse kuri Instagram ubutumwa burebure cyane ataka umukunzi we ndetse amwizeza ko azamubera umugabo mwiza iteka ryose.

Yavuze ko yifuzaga ko babanza kwitonda gato mbere y’uko batangaza iyi nkuru ku bafana babo, gusa amagambo ‘yagurutse mbere y’igihe bateganyije’, arongera ati “Nyumva neza Hailey, ndagukunda bikomeye n’ibyawe byose. Niteguye kuzamara ubuzima bwanjye bwose niga buri gice cyose cy’ubuzima bwawe nkagukunda nihanganye kandi nkakugororokera.”

Uyu muhanzi wakunze kuvugwa mu bibazo n’ubushyamirane bwatumaga rimwe na rimwe arwana, yaragije urugo rwe na Hailey Baldwin Yezu na Roho mutagatifu[umwuka wera] “muri buri byemezo tuzafata.”

Yongeyeho ati “Umutima wanjye ni uwawe byuzuye kandi nzagushyira imbere iteka. Ni wowe rukundo rw’ubuzima bwanjye Hailey Baldwin, nta wundi nifuza gusangira ubuzima bwanjye na we uretse wowe.”

Hailey Baldwin na we yanditse kuri Twitter avuga ko atariyumvisha uburyo Imana yamuhaye umugisha w’ikirenga ikamuhuza n’umuntu udasanzwe Justin Bieber kugira ngo bazabane mu buzima basigaje ku Isi.

Mu byerekeye urukundo, Justin Bieber yavuzwe cyane mu gihe yakundanaga na Selena Gomez gusa baje gutandukana. Mu mwaka wa 2016 nibwo Justin yaketswe ko akundana na Sofia Richie[umukobwa w’umuririmbyi Lionel Richie] gusa ibyabo byamaze ukwezi kumwe.

Mu bakobwa bose Justin Bieber yakundanye na bo, Selena Gomez ni we uza ku isonga mu bo bafitanye amateka yihariye, barakundanaga nyuma y’igihe gito bakongera bagashwana bikaba aho nyuma y’igihe kinini nabwo bakongera kunga ubumwe.

Justin Bieber na Selena Gomez bakundanye mu gihe cy’myaka itatu kuva mu 2011 kugeza 2014, ariko muri icyo gihe cyose nabwo bavugwagaho gutandukana bya hato na hato bakongera bakunga ubumwe bidateye kabiri.

Justin Bieber yambitse impeta y’urukundo umunyamideli Hailey Baldwin
Aba bombi batangiye gukundana mu mwaka wa 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza