Beyoncé yasobanuye icyatumye ababarira Jay-Z wamuciye inyuma

Yanditswe na Dusabimana Aimable
Kuya 7 Kanama 2018 saa 08:03
Yasuwe :
0 0

“Beyoncé” Giselle Knowles-Carter yavuye imuzi uko yigobotoye ibibazo bitandukanye yagiye ahura na byo mu gihe gishize birimo ubuhemu yakorewe na Jay-Z bashakanye ndetse n’imihangayiko y’umubyibuho yagiraga mu gihe yari atwite.

Ibi yabitangarije Vogue muri nomero yayo izasohoka muri Nzeri 2018. Uyu mugore uzagaragara ku gifubiko cy’iki kinyamakuru yasohoye inyandiko yahawe umugisha n’umwe mu banditsi bakuru witwa Anna Wintour, afotorwa n’uwitwa Tyler Mitchell wabaye umwirabura wa mbere ufotoye igifuniko cy’iki kinyamakuru gikomeye.

Beyoncé yavuze ku byiza yagezeho, ibihe byo kwiheba yanyuzemo, uko we na Jay-Z bagiye bacoca amakimbirane hagati yabo nyuma y’uko uyu mugabo aririmbye mu ndirimbo yise “4:44’” uko yamuciye inyuma akamusaba imbabazi n’ibindi bibazo bagiye bagirana.

Yavuze ko ibyo yigiye ku bisekuru bye byagize uruhare rukomeye mu mibanire ye na Jay-Z, ati “Nkomoka mu miryango itaraburagamo ibibazo mu mibanire y’umugore n’umugabo, gukoresha imbaraga amahano n’urwikekwe. Maze kubona neza ibyo byamfashije gukemura amakimbirane yari mu rukundo rwacu. Kwihuza n’ahashize no kumenya amateka yacu byadukozeho bitugira beza.”

Yongeyeho ati “Buri rugendo rugira icuraburindi. Nta cyera cyangwa icyirabura. Nanyuze muri byinshi bikomeye, ariko nakiriye inkovu byansigiye. Nakorewe ubuhemu mpura n’ibishengura umutima mu buryo butandukanye. Nahuye n’ibicantege mu mikoranire n’abandi haba mu bucuruzi ndetse no mu buzima busanzwe, binsiga numva meze nk’utitaweho, uwatakaye kandi nk’umunyagishyika.”

“Muri ibyo byose nize guseka, kurira ndanakura. Ndeba umugore nari we mu myaka 20 yanjye nkabona umukobwa muto wakuriye mu cyizere ariko ahangayikishijwe no gushimisha buri wese umuri i ruhande. Ubu niyumva nk’umwiza, ufite itoto kurushaho, kandi ushimishije. Mfite n’imbaraga nyinshi birushijeho.”

Beyoncé yavuze ko akimara kwibaruka umwana we wa mbere [Blue Ivy Carter] yizereraga mu bintu sosiyete ivuga ku buryo yagakwiye kuba agaragara. Yemeje ko yahihibikaniye gutakaza ibiro mu mezi atatu agashyiraho n’urugendo ruto rw’ibitaramo kugira ngo yizere ko ibyo abigeraho gusa ngo iyo asubije amaso inyuma ubu asanga byari ubujiji.

Yongeyeho ko nyuma yo kwibaruka Rumi Carter na Sir Carter mu mwaka ushize yatangiye gutwara ibintu mu buryo butandukanye. Yavuze ko ku munsi yabyariyeho yari afite ibiro hafi 99 [218pounds] ndetse akaba yari afite uburwayi bw’amaraso bwatumye amara ukwezi aryamye bikamuviramo kubyara abazwe akamara ibindi byumweru yitabwaho.

Yagize ati “Umugabo wanjye [Jay-Z] yahabaye indwanyi n’uburyo buhanitse bwo kunshyigikira. Nishimira kuba narabaye umuhamya w’imbaraga ze n’uko yakuze nk’umugabo, inshuti magara n’umubyeyi.”

Umuryango wa Jay-Z w’imyaka 48 na Beyoncé w’imyaka 36 usanzwe uzwi nka bamwe mu byamamare bifite amafaranga menshi muri Leta Zunze Ubumwe za Amerika. Aba bombi bashyingiranwe mu buryo bwemewe imbere y’Imana n’amategeko mu 2008.

Bafitanye umwana w’imfura witwa Blue Ivy Carter wavutse ku wa 7 Mutarama 2012 mu bitaro by’i New York n’impanga baheruka kunguka Rumi Carter na Sir Carter bavutse mu gitondo cyo ku itariki 13 Kamena 2017.

Beyonce yifotoje amafoto menshi aherekeza ibyo yatangarije Vogue Magazine

Photos: Vogue

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza