Jussie Smollett ari mu mazi abira ashinjwa kubeshya ko yagabweho igitero

Yanditswe na Uwiduhaye Theos
Kuya 21 Gashyantare 2019 saa 12:10
Yasuwe :
0 0

Ku wa 29 Mutarama 2019 hasakaye inkuru y’uko umukinnyi muri filime y’uruhererekane ya Empire, Jussie Smollett, yarokotse igitero cy’abagizi ba nabi bamukubise bakamumenaho uburozi.

Uyu mugabo w’imyaka 36 yavugaga ko byamubayeho ari kugenda n’amaguru muri uyu Mujyi wa Chicago. Icyo gihe CNN yanditse ko Smollett yakubiswe n’abagabo babiri bavugiraga hejuru amagambo agaragaza urwango bafitiye abirabura n’ababana bahuje ibitsina.

Polisi yo mu Mujyi wa Chicago nayo yemeje ko umwe muri bo yamumennyeho uburozi butaramenyekanye, nyuma banamuzirika umugozi mu ijosi ubundi barahunga.

TMZ yo yanditse ko aba bagizi ba nabi bavuze amagambo yakoreshejwe cyane mu kwamamaza Perezida Donald Trump, “Maga” (Make America Great Again).

Kuri ubu BBC yatangaje ko ibi byose uyu mugabo avuga ko byabaye ari umupango we, atari abagizi ba nabi nk’uko byari byatangajwe mbere ndetse ko Smollett yari yishyuye abasore babiri b’abavandimwe bo muri Nigeria ngo bakore iki gikorwa benshi bavuga ko kigayitse cyane.

Umuvugizi wa Polisi , Anthony Guglielmi, yanditse kuri Twitter ko Jussie Smollett akurikiranyweho ‘imyitwarire igayitse no guhimba raporo ya Polisi’.

Yakomeje agira ati “Abashinzwe gukurikirana ibyaha bagiye kumvikana n’ikipe ye mu by’amategeko ku kuba yakwemera gutabwa muri yombi bitagoranye.”

Abanyamategeko Todd Pugh na Victor Henderson, bahagarariye uyu mukinnyi mu by’amategeko mu itangazo basohoye bavuze ko n’ubwo hari ibiri gushinjwa umukiliya wabo kugeza ubu nta cyaha arahamywa n’urukiko akiri umwere.

Ati “Jussie akwiriye gukomeza gufatwa nk’umwere mu gihe nta rukiko ruramuhamya icyaha, n’ubwo hakozwe iperereza nk’iri ariko ibyatangajwe bishobora kuba ukuri cyangwa ibinyoma.”

Kuri uyu wa Gatatu CBS Chicago yabonye amashusho agaragaza abavandimwe babiri bagura ibikoresho bitandukanye birimo mask, n’ibindi bisa n’ibyari byambawe n’abantu bagabye igitero kuri uyu mukinnyi wa filime.

Aba bavandimwe Ola na Abel bari bavuye muri Amerika nyuma yo gutangaza ko uyu mukinnyi yagabweho igitero ariko batabwa muri yombi mu cyumweru gishize ubwo bagarukaga mu gihugu.

Nyuma bararekuwe basabwa gufatanya korohereza abari mu iperereza bagakorana nabo.

Umwe muri aba bavandimwe afasha Smollett mu bijyanye n’imyitozo ngororamubiri, bose kandi n’ubwo batari abakinnyi b’imena bagaragaye gato muri filime ya Empire.

Jussie Smollett byari byatangajwe ko yakubiswe n'abo bikekwa ko bamuhoye ko ari umwirabura n'umutinganyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza