Lady Gaga yasabiye imbabazi amagambo yavuze ku rupfu rw’umunyamideli w’inshuti ye

Yanditswe na Dusabimana Aimable
Kuya 6 Kanama 2018 saa 11:42
Yasuwe :
0 0

Lady Gaga ukomeye muri Leta Zunze Ubumwe za Amerika yasabye imbabazi kubera amagambo yatangaje ku rupfu rw’umunyamideli w’inshuti ye witwa Rick Genest akemeza ko yiyahuye hataremezwa icyamwishe.

Rick witabye Imana afite imyaka 32, ubusanzwe yari azwi cyane ku izina “Zombie Boy” biturutse ku bishushanyo by’amagufa n’ingingo afite ku mubiri we wose. Ku wa 2 Kanama 2018 nibwo yasanzwe yashizemo umwuka mu rugo rwe ruri i Montreal muri Canada.

Yari azwiho kuba yaragaragaye mu mashusho y’indirimbo ya Lady Gaga yitwa “Born This Way” yo mu 2011 yanagaragaje uwo muririmbyi na we yishyizeho ibishushanyo nk’ibya mugenzi we.

Uyu munyamideli hakimara kumenyekana inkuru y’urupfu rwe, Lady Gaga yahise yandika kuri Twitter atanga ubutumwa ku batuye Isi abasaba ko uwaba afite ikibazo wese akwiye kujya yegera mugenzi we akakimuganiriza kurusha uko afata umwanzuro ugayitse wo kwiyambura ubuzima.

Lady Gaga kuri ubu yasibye ubwo butumwa bwa mbere bwavugaga ko inshuti ye yiyahuye ashyiraho ubundi bwo gusaba imbabazi umuryango we n’abo byaba byarababaje kuba yaremeje ko yiyahuye nyuma y’aho ubujyanama bwa Rick bwanditse kuri Facebook ko nta gihamya na kimwe cy’icyaba cyaramuhitanye.

Yagize ati “Mu cyubahiro ku bw’umuryango wa Rick, we n’umurage we, ndasaba imbabazi niba narihutiye kuvuga nta batangabuhamya cyangwa ibimenyetso bishyigikira intandaro y’urupfu rwe. Ntabwo nari ngambiriye kugera ku myanzuro idakwiye. Nihanganishije umuryango we wose n’inshuti.”

Yongeye kuvuga kuri uyu munyamideli agira ati “Igihangano twakozwe cyari gitagatifujwe kuri njye kandi nari mfite igishyika, yari umuhanzi udasanzwe kandi ubuhanzi bwe n’umutima we bizahoraho. Uruhukire mu mahoro wowe roho nziza.”

BBC yatangaje andi makuru y’uko Rick yahanutse ahantu harehare mu rugo rwe amaze kubwira umukobwa bakundanaga ko agiye kujya hanze kunywa itabi. Umurambo we wabonywe haburaga iminsi itandatu ngo yuzuze imyaka 33.

Uyu munyamideli yamamaye ku Isi abifashijwemo na Lady Gaga, yagiye akorana na GQ, Vanity Fair, na Vogue Hommes magazine.

Umujyanama we witwa Karim Leduc yabwiye TMZ ko bakeka ko yaba yarapfuye ku bw’impanuka aho kuba kwiyahura nk’uko byari byavuzwe cyane mbere.

Leduc yemeje ko Rick ari umuntu wari ufite intekerezo nzima ku buryo atari kwiyambura ubuzima, cyane ko ngo yari ari no gukora ku mishinga mishya irimo amashusho y’indirimbo, ibitabo n’ibijyanye n’ubusizi.

Genest apfanye agahigo ka Guinness World Record nk’umuntu wa mbere ku Isi ufite ibishushanyo by’udukoko ku mubiri we, kugeza ubu yari afite ibigera ku 176; ni na we kandi wari ufite agahigo kurusha abandi mu bafite ibishushanyo by’amagufa ku mubiri we, ubu yari afite ibigera ku 139.

Uyu munyamideli yari afite ibishushanyo byinshi by'amagufa ku mubiri we
Rick Zombie Boy yari inshuti magara ya Lady Gaga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza