Huye: Imbyino nyafurika n’umurishyo w’ingoma byasusurukije abitabiriye Fespad (Amafoto)

Yanditswe na Prudence Kwizera
Kuya 2 Kanama 2018 saa 09:52
Yasuwe :
0 0

Imbyino nyafurika zibereye amaso n’umurishyo w’ingoma uryoheye amatwi byari byiganje mu Iserukiramuco rya FESPAD ryabereye mu Karere ka Huye kuri uyu wa Gatatu tariki ya 1 Kanama 2018.

Mu Karere ka Huye, Iserukiramuco rya FESPAD ryabereye kuri Stade Huye ryitabirwa n’amatorero atandukanye harimo ayaturutse mu bihugu nka Repubulika Iharanira Demokarasi ya Congo, Burkina Faso n’andi asanzwe azwi mu Rwanda mu Ntara y’Amajyepfo.

Ni umuhango witabiriwe na ba Minisitiri b’Umuco b’Ibihugu bya Burkina Faso na Repubulika Iharanira Demokarasi ya Congo, bakiriwe na Guverineri w’Intara y’Amajyepfo, Mureshyankwamo Marie Rose ari kumwe n’abandi bayobozi ku nzego z’ibanze.

Uwo muhango waranzwe n’urunyurane rw’imbyino zitandukanye, indirimbo n’umurishyo w’ingoma aho buri gihugu cyagaragaje umwihariko wacyo.

Abaturage bo mu Karere ka Huye bari bitabiriye ku bwinshi bihereye ijisho baranezererwa ku buryo barakariye imvura yabarogoye mu masaha ya nyuma n’ubwo bari bamaze kuryoherwa na byinshi byabaye mbere yayo.

Guverineri w’Intara y’Amajyepfo, Mureshyankwano Marie rose, yavuze ko Iserukiramuco rya FESPAD rigamije gufasha Abanyafurika kunga ubumwe no kwimakaza amahoro yo musingi w’iterambere.

Ati “Turashimira umuryango wa Afurika Yunze Ubumwe wahaye u Rwanda gutegura iri serukiramuco Nyafurika ry’imbyino rigamije kwimakaza umuco w’amahoro n’ubumwe mu bihugu bya Afurika. Baturage mwese twishimiye gutaramana namwe ndetse n’abavandimwe bacu bo mu bihugu bya Burkina Faso na Repubulika Iharanira Demokarasi ya Congo, kugira ngo dusangire ubukungahare bw’imico yacu mu mbyino no mu ndirimbo bishimishije.”

Uyu mwaka Iserukiramuco rya FESPAD riri kuba ku nshuro ya 10, riba rimwe mu myaka ibiri.

Abanye - Congo bagaragaje umwihariko wabo bashimisha abaturage bo mu Karere ka Huye
Abanyarwanda bagaragaje umwihariko mu kuvuza ingoma no kubyina Kinyarwanda
Guverineri w’Intara y’Amajyepfo, Mureshyankwano Marie Rose
Itorero Imanzi ryo mu Karere ka Huye ryasusurukije abitabiriye Iserukiramuco Nyafurika mu mbyino gakondo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza