Uko Ama G yabyitwayemo nyuma yo gutenguhwa n’abacuranzi be-VIDEO

Yanditswe na

Munyengabe Murungi Sabin

Kuya 24 Kamena 2014 saa 10:32
Yasuwe :
0 0

Hakizimana Amani azwi cyane mu izina ry’ubuhanzi rya Ama G The Black, ni ku nshuro ya mbere yitabiriye irushanwa rya PGGSS. Nubwo yinjiye mu irushanwa bwa mbere, Ama G akomeje kwereka abafana be n’abakunda ibihangano bye ko ubuhanzi bwe atari imikino arimo nk’uko bamwe bakunda kubimushinja ahubwo afite icyerekezo gihamye.
Mu gitaramo kibimburira ibiri gukorwa abahanzi baririmba mu buryo bwa Live, cyabereye mu mujyi wa Kigali mu mpera z’icyumweru gishize, uyu muraperi yahuye n’akabazo gato (...)

Hakizimana Amani azwi cyane mu izina ry’ubuhanzi rya Ama G The Black, ni ku nshuro ya mbere yitabiriye irushanwa rya PGGSS. Nubwo yinjiye mu irushanwa bwa mbere, Ama G akomeje kwereka abafana be n’abakunda ibihangano bye ko ubuhanzi bwe atari imikino arimo nk’uko bamwe bakunda kubimushinja ahubwo afite icyerekezo gihamye.

Mu gitaramo kibimburira ibiri gukorwa abahanzi baririmba mu buryo bwa Live, cyabereye mu mujyi wa Kigali mu mpera z’icyumweru gishize, uyu muraperi yahuye n’akabazo gato akigera ku rubyiniro gusa ntibyamubujije kuririmba.

Bagenzi be babanje kwica akanyota mbere yo kuririmba ariko we arifata

Ama G The Black waririmbye ku mwanya wa karindwi muri iki gitaramo, akimara guhamagarwa nk’umuhanzi ukurikiyeho mu gutaramira abafana, yinjiye ku rubyiniro bucece ageze imbere y’abafana ibyo yari yavuganye n’abacuranzi be ntabwo babyubahirije dore ko yerekanye ikimenyetso ko agiye gutangira kuririmba ntibabyubahiriza.

Ntibyaciye intege uyu muhanzi kuko yahise avugana byihuse n’aba bacuranzi be ahita atangira kuririmba ndetse ashimisha abafana be.

Uko Ama G ahagaze mu irushanwa

Uyu muraperi wegukanye ibihembo bibiri muri Salax Awards 2012, icy’umuhanzi mushya n’icy’umuraperi mwiza, kubera uburyo yakomeje gukorana ingufu kuva muri uwo mwaka kugeza mu ntangiriro za 2014 byamuhesheje amahirwe yo kwinjira mu bahanzi 15 batoranyijwemo 10 bahatanira PGGSS4.

Amaze kugera mu irushanwa, mu bitaramo yakoranye na bagenzi be 9 hirya no hino mu ntara z’u Rwanda, uyu muraperi ni umwe mu bahanzi bazaga mu myanya y’imbere mu kugaragaza ko afite umubare munini w’abafana bamushyigikiye. Iyo yageraga imbere y’abafana be abaririmbira mu buryo bwa playback(kuririmba hakoreshejwe CD), uyu muhanzi ntiyatenguhaga abafana be ndetse akabibutsa ko kuba yarinjiye mu irushanwa atari impanuka ahubwo yabishobojwe n’impano ye no gukora cyane mu myaka irenga 5 yari amaze mu muziki.

Uretse kugaragaza ko afite umubare munini w’abafana bamushyigikiye ndetse n’indirimbo ze zikaba zikunzwe n’abaturage hirya no hino mu gihugu, Ama G yerekanye ko no kuririmba mu ijwi rye ry’umwimerere atari ibintu ahatiriza. Ku ikubitiro ku itariki ya 15 Werurwe ubwo abahanzi 15 bahataniraga gutoranywamo 10 bahatanira PGGSS4, uyu muraperi yeretse akanama nkemurampaka n’abafana ko akwiye kwinjira mu irushanwa.

Ama G The Black atinya umuhanzi umwe mu 9 ahanganye na bo

Nyuma y’ibitaramo bya Road shows yazengurukanyemo na bagenzi be 9 biyereka abafana, Ama G yatangarije IGIHE ko nta bwoba na buke afitiye bagenzi be 8. Gusa, uyu muraperi yavuze ko hari umwe muri bo atinya kurusha abandi ariko ngo yizeye ko Imana izamushoboza kumutsinda igikombe akacyegukana.

Yagize ati, “Irushanwa ni irushanwa, abahanzi bose bari mu irushanwa buri wese akomeye ku giti cye. Muri aba bahanzi 9 nta n’umwe ntinya , ntabwo natinya aba duhanganye kuko twese kugeza ubu turanganya amahirwe. Muri bose hari umwe ntinya, ntabwo muvuze izina ariko arahari. Muvuze yakwiyemera ariko nzi neza ko Imana nikomeza kumfasha na we nzamutsinda igikombe bakimpe”

Imiririmbire ya Ama G mu buryo bwa Live ihagaze ite ?

Ni ku nshuro ya mbere Ama G yinjiye mu irushanwa rya PGGSS, nubwo uyu mwaka ari uwa mbere uyu muraperi yiyeretse abafana n’abakunzi b’ibihangano bye, yatanze umwitangirizwa kuri bagenzi be batarinjira muri iri rushanwa cyangwa ngo bagerageze gukora nk’ibye.

Muri iri rushanwa Ama G ngo atinya umuhanzi umwe gusa

Nubwo imihini mishya itera amabavu, Ama G The Black yemeza ko ibyo yakoze aririmba live ari ikimenyetso cya mbere cyerekana ko ibyo aririmba muri studio anafite ubushobozi bwo kubiririmba akoresheje ijwi rye anajyana n’abacuranzi be.

Ibisabwa kugira ngo umuhanzi abone amanota meza muri ibi bitaramo bya Live : Kugira abafana benshi (popularity 50%), uko aririmba(performance30%), uko agaragara ku rubyiniro(stage appearance10%) n’ikinyabupfura(Discipline10%).

Abafana n’igikundiro cya Ama G byifashe bite ?

Mu gitaramo cya mbere cya Live i Kigali, Ama G yatangiriye ku ndirimbo U Rwanda rw’amafaranga. Ubwo yatangiraga kuririmba abafana bamwe bari bafite ibyapa byanditseho amazina ye, ibiriho amafoto n’ibimwamamaza bazamuye amaboko bamwereka ko bamuri inyuma ndetse banamufasha kuririmba iyi ndirimbo.

Nubwo nta cyizere umuntu yagirira ibi byapa dore ko benshi mu bahanzi baba babyikoreshereje ndetse bakishyura abantu babitwara, Ama G yagerageje no gushimisha abadafite ibyo byapa dore ko yarangizaga igitero benshi bakavuza induru bagaragaza ko bishimiye amagambo amaze kuririmba.

Umugereranyije na mugenzi we Jay Polly ari na we muraperi bahanganye muri iri rushanwa, usanga abafana ba Ama G ari bake cyane ku ba mugenzi we. Nubwo abe ari bake ugereranyije n’aba Jay Polly, Ama G aza mu myanya y’imbere mu bahanzi bishimiwe n’abaturage muri iri rushanwa.

Imiririmbire ye

Mu ndirimbo u Rwanda rw’amafaranga urusaku rw’ibyuma rwaganzaga urw’ijwi ry’uyu muraperi . Yararirimbaga ukumva amagambo amwe ntabwo yumvikana kubera uburyo atondekanye kandi akaba aririmbitse mu buryo bwihuse.

Urujyano rw’amajwi n’ibicurangisho byakoreshejwe Ama G aririmba ntabwo byahuzaga neza gusa mu ndirimbo TURI KU ISHURI yagerageje kujyana n’abacuranzi be afatanyije n’umusore witwa Eesam usanzwe umwunganira mu kuririmba.

Ese koko uyu muraperi aho kuririmba arasakuza?

Mu kiganiro yagiranye na IGIHE, Ama G The Black yasobanuye ko abamunenga bamuziza ko aririmba asakuza, ngo nta kibazo na gito bimuteye.

Ibyo bamuvugaho bamunenga ngo nibyo bimutera ingufu zo gukora cyane.

Ati, “Njya mu irushanwa abantu baravuze ngo Ama G The Black ntabwo aririmba Live, ngo nta hantu ashobora kuzigeza muri iri rushanwa. Ngo ndasakuza ? Nta kibazo, kuba nsakuza nibyo bimpesha amahirwe yo kubamerera nabi. Kuba kera ntararirimbaga Live si uko ntari nyishoboye ahubwo nari narayibuze.”

Uko yagaragaraga ku rubyiniro n’ikinyabupfura

Mu bijyanye no kugaragara ku rubyiniro, imyambarire ndetse n’uko yari yateguye aho aririmbira, Ama G The Black nta kintu gikomeye yakoze uretse kwambara ikabutura n’ishati bidoze mu bitenge by’umuhondo yarangiza akadodeshereza Eesam ipantaro iriho imifuka isa n’igitenge yari yambaye.

Ku giti cye ntabwo yari yambaye nabi gusa ibijyanye no gukora umuteguro w’urubyiniro rwe ntabwo byari bishamaje gusa yaragerageje.

Akinjiye mu nda y’impyisi kavanwamo…..

Arangije kuririmba yagize ati, "Akinjiye mu nda y'impyisi...."

Kuva ku munsi wa mbere yahamagarwa mu bahanzi 15 batangiye bahatanira iri rushanwa, Ama G yagiye agaruka ku mvugo igira iti ‘Akinjiye mu nda y’impyisi kavanwamo n’amahiri”.

Ubwo yari amaze kuririmba mu gitaramo cya Live i Kigali, Ama G yongeye gushimangira iyi mvuga avuga ko akinjiye mu nda y’impyisi nta kindi kintu kikavanamo uretse amahiri.

Mu kiganiro na Ama G twamubajije impamvu nyamukuru imutera gukoresha iyi mvugo, asobanura ko igisobanuro cyayo kizagaragara uko iri rushanwa rizagenda ryegera imbere.

REBA UKO AMAG YARIRIMBYE LIVE I KIGALI:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza