Itorero Angilikani mu Rwanda ryemeje ko Musenyeri Mbanda azaba Umwepisikopi Mukuru kugeza mu 2023

Yanditswe na Hakizimana Jean Paul
Kuya 3 Kanama 2018 saa 02:35
Yasuwe :
0 0

Provensi y’Itorero Angilikani mu Rwanda yatangaje ko Sinodi ya Provensi yateranye ku wa 2 Kanama yemeje ko Musenyeri Dr Laurent Mbanda azakomeza kuba Umwepisikopi Mukuru w’Itorero Angilikani mu Rwanda kugeza mu 2023.

Mu itangazo ryashyizwe ahagaragara n’Umunyamabanga Mukuru wa Provensi y’Itorero Angilikani mu Rwanda, Rev Francis Karemera, ryatangaje ko uwo ari umwanzuro wa Sinode ya Provensi yateraniye i Kigali mu cyumba cy’inama cya Katederali Sitefano Wera, ku wa 2 Kanama 2018.

Rikomeza rigira riti “Yemeje umwanzuro w’inama y’Abepisikopi yo ku wa 01 Kanama 2018, ko Most Rev. Dr. Laurent Mbanda azakomeza kuba Umwepisikopi Mukuru wa Provensi y’Itorero Angilikani mu Rwanda (PEAR) kugeza ku wa Gatandatu tariki 24 Kamena 2023, akazajya mu kiruhuko cy’izabukuru guhera ku munsi ukurikira iyo tariki.”

Muri Mutarama 2018 nibwo Musenyeri Laurent Mbanda yatorewe kuyobora Itorero Angilikani mu Rwanda asimbuye Musenyeri Onesphore Rwaje wimitswe ku wa 23 Mutarama 2011.

Ni nyuma y’uko mu 2016 Musenyeri Mbanda wayoboraga Diyosezi ya Shyira mu majyaruguru y’igihugu, yabonye umusimbura Samuel Mugiraneza ndetse akamushyikiriza inshingano muri Werurwe umwaka ushize.

Dr Mbanda yavukiye mu Rwanda ku itariki ya 25 Ukwakira 1954. Yaje guhunga akiri muto ahungana n’ababyeyi be bajya mu gihugu cy’u Burundi ari ho yigiye amashuri abanza n’ayisumbuye.Arubatse afite umugore n’abana batatu. Yasimbuye Musenyeri Onesphore Rwaje wagiye mu kiruhuko cy’izabukuru.

Umwaka ushize yabwiye IGIHE ko kuva yatorerwa kuyobora Diyosezi ya Shyira asimbuye Musenyeri John Rucyahana mu 2010, yafashije guteza imbere uburezi ku buryo hashinzwe ibigo by’amashuri y’abana b’incuke 217 muri iyo diyoseze yigamo abasaga ibihumbi 20. Hashinzwe kandi ishuri ryigisha imyuga ryigamo abasaga 900, hubakwa hoteli imwe n’isoko rya kijyambere mu Mujyi wa Musanze.

Mbanda yafashije abana icumi barangije kubona buruse zo kwiga muri Leta Zunze ubumwe za Amerika aho yabaye igihe kinini. Abapasiteri nabo bamuboneyeho umugisha babasha kwiga, harimo batandatu bize icyiciro cya gatatu cya Kaminuza (master’s) n’icumi barangije icya Kabiri (Bachelor’s) ndetse n’abandi 250 bize amasomo atandukanye arimo n’ay’iyobokamana.

Musenyeri Laurent Mbanda azayobora Itorero Angilikani mu Rwanda kugeza mu 2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza