Mgr Rukamba yavuze ku biganiro bishobora kugeza ku kwemerera abafite abagore kuba abapadiri

Yanditswe na Rabbi Malo Umucunguzi
Kuya 6 Ukwakira 2019 saa 02:52
Yasuwe :
0 0

Abepiskopi Gatolika baturutse muri Amerika y’Epfo bakoraniye i Vatikani, ngo bahanahane ibitekerezo ku ngingo zinyuranye zireba Kiliziya, by’umwihariko mu gice cya Amerika y’Epfo kizwi nka Amazonie.

Mu byumweru bitatu biri imbere uhereye kuri uyu wa 6 Ukwakira 2019, abasenyeri bagera kuri 260 bo muri Amerika y’Epfo bazigira hamwe ibibazo bijyanye n’ihindagurika ry’ikirere, abimukira n’ivugabutumwa.

Inyandiko igaragaza ibizaganirwaho izwi nka Instrumentum Laboris, iriho n’igitekerezo gikomeje kugibwaho impaka, hibazwa niba muri Amazonie bishobora kwemerwa ko abagabo bakuze kandi bafite abagore, bakwemererwa guhabwa isakaramentu ry’ubusaserdoti. Ni igice cyugarijwe n’ubuke bw’abapadiri, kugeza ubwo abaturage 85 % badahabwa misa uko bikwiye.

Umushumba wa Diyosezi Gatolika ya Butare akaba na Perezida w’Inama y’Abepiskopi mu Rwanda, Mgr Philippe Rukamba, yavuze ko nubwo ari ibiganiro bigikomeza, ari uburyo bushoboka ahamaze kugaragara ikibazo cy’ubuke bw’abapadiri.

Ati “Ni ibintu abantu batekerezaho cyane muri iki gihe kubera ko u Burayi, Amerika y’Epfo batangiye kugira ikibazo gikomeye cy’abapadiri bato. Ubundi kuba umupadiri ni ubutumwa umuntu agira, akoherezwa kwigisha ijambo ry’Imana, gutagatifuza abantu, kuyobora Kiliziya, buriya hari n’aho abapadiri bahari barashatse cyane nko mu mico yo muri Aziya, hari abapadiri bafite abagore, gusa babyemera kare, bagashyingirwa.”

“Ni ibintu bivugwa cyane kubera icyo kibazo, abantu bamwe bakavuga bati ‘ariko turabura abapadiri kandi hari abantu wenda bashaka kuba abapadiri ari abantu bakuru’. Noneho rero ntabwo biremezwa, ni ibintu abantu batekerezaho kuko kudashaka, umuntu ashobora kuba padiri yaranashatse nk’uko mu mico imwe n’imwe muri za Liban n’ahandi mu bagatolika ihari. Ariko ubu nta kintu cyari cyagerwaho, ni ibitekerezo gusa.”

Musenyeri Rukamba yavuze ko hari kenshi biba nk’abapasiteri b’abaporoso bahinduka abagatolika, ngo hari ubwo mu bihugu bimwe bemererwa kugumana abagore babo kandi bakaba abapadiri aho byemewe, cyangwa bagashakirwa izindi nshingano muri Kiliziya.

Gusa muri iki gice cya Kiliziya Gatolika u Rwanda ruherereyemo, umuco uhari ni uw’uko abapadiri badashaka abagore.

Mgr Rukamba yakomeje ati “Nko mu minsi ishize habaye ikibazo gikomeye mu Bangilikani, [kiliziya] ibemerera kuza, bari bafite n’abakirisitu babo bazanye, barakomeza bababera abashumba, barashatse.”

Gusa ingingo yo kwemerera abantu bafite abagore kuba abapadiri ngo ntaho iragera yemezwa, ni uko yumvikana nk’ishishikaje abantu cyane, ariko ngo n’iyo abasenyeri muri Amazonie babyemeza, bizasaba ko Papa abiha umugisha abanje gutumiza sinode yagutse, igizwe n’abasenyeri bahagarariye abandi mu bihugu byose ku Isi.

Mgr Rukamba ati “Bishobora no kuba bibera mu gice kimwe runaka, ariko Isi yose igomba kubimenya, bigomba kwemezwa. Papa ni wo murimo we wo guhuza abantu bose, gutuma [habaho] ubumwe hagati y’abakristu, kandi bigenze bityo urabona ko baba bavuye mu buryo bumwe bwo kubaho bajya mu bundi, ni ikintu rero cyasaba ko abantu bicara bakaganira.”

Umuhanga mu bijanye n’amadini, Prof. Linda Woodhead MBE, yabwiye BBC ko nubwo iyo ngingo hari abatayivugaho rumwe, bidakwiye ko bibagirwa ko Kiliziya Gatolika ari umuryango ugenda uhinduka, bijyanye n’uko imyaka igenda ishira.

Ati "Igenda ihinduka buri gihe, ariko bikaba mu bwitonzi, ibanje kwitegereza neza amateka n’imyemerere yayo.”

Bitekerezwa ko mu gihe abarongoye bakwemererwa guhabwa ubusaserdoti muri Amazonie, no mu tundi duce dukennye abapadiri bishobora kuba gutyo. Gusa ngo hari n’ubwo ahandi babona ibisubizo byihariye ku kibazo cy’ubuke bw’abapadiri.

Gusa ngo hari n’impungenge ko abubatse bemerewe isakaramentu ry’ubusaseredoti, bishobora no gutuma n’ahatari ikibazo cy’abapadiri babyifuza, cyane ko ingingo yo kwemerera abapadiri gushaka abagore yakomeje gutindwaho cyane.

Musenyeri Rukamba avuga ko kwemerera abagabo bashatse kuba abapadiri bizafata igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza