Kiliziya ya Rwamagana umutware Rwabutogo yatundiye amatafari, Perezida Kagame akayisengeramo yujuje imyaka 100

Yanditswe na Hakizimana Jean Paul
Kuya 14 Nzeri 2019 saa 01:16
Yasuwe :
0 0

Imyaka 100 irashize Kiliziya Gatorika Paruwasi ya Rwamagana, yaragijwe umwamikazi w’imitsindo ishinzwe.

Iyi kiliziya iherereye muri Diyoseze ya Kibungo, ikaba ari iya 12 mu zashinzwe bwa mbere mu Rwanda nyuma ya Save yashinzwe mu 1900, Zaza, Nyundo, Rwaza, Mibirizi, Kabgayi, Runda, Rulindo, Kansi, Kigali, Rambura na Rwamagana mu 1919.

Yihariye amateka arimo kubyara izindi kiliziya zikomeye cyane zirimo nka Kiziguro, Musha, Mukarange, Rukara n’izindi, yihariye kandi amateka yo kubakwa mu butaka bwari ubw’umutware wategekaga igice cy’Ubuganza witwaga Rwabutogo Francisco.

Kimonyo Jean Baptiste w’imyaka 97 uri mu bavutse nyuma y’imyaka itatu iyogezabutumwa ritangiye mu Buganza, avuga ko yakuze asanga abamisiyoneri baratangiye kugenda impande n’impande bigisha abaturage ndetse ngo ni nabo babavuraga indwara zitandukanye, bakanabigisha gusoma no kwandika.

Akomeza agira ati “Mbere tutarabona kiliziya twasengeraga mu nzu y’ibyatsi yabaga hariya ku muhanda, nyuma hatangijwe igikorwa cyo kubaka kiliziya, uruhare rwacu nk’abakiristu twatundaga amatafari abandi bakubaka, imbaho zayubatse za ribuyu. Twazikuraga muri Congo, aho zazanwaga n’ibimodoka by’abamisiyoneri.”

Akomeza avuga ko nyuma yo kubona iyi kiliziya hakurikiyeho kubaka amashuri hirya no hino, ibitaro n’ibindi bikorwa remezo byatumaga abakiristu barushaho kwiyumvamo kiliziya bitewe n’iterambere yabagezagaho.

Umutware yikoreye amatafari yo kubaka kiliziya

Rwabutogo Francisco ni umwe mu babatirijwe i Kabgayi akaba umutware wo mu Buganza. Iyogezabutumwa ritangiye i Rwamagana yemeye gutanga ubutaka bwabagaho inka ze kugira ngo aribwo bukorerwaho umurimo w’Imana.

Ubwo hafatwaga icyemezo cyo kubaka iyi kiliziya, ngo abaturage ntabwo babyumvaga neza kugeza ubwo umutware yimanukiye atangira kwikorera amatafari bihinduka byacitse muri rubanda kuko bitari bisanzwe.

Kimonyo Jean Baptiste ati “Abaturage ntabwo babyumvaga neza ukuntu bajya kwikorera amatafari yo kubaka kiliziya, umutware ahitamo kwimanukira afata ingata yikorera amatafari yo kubakisha kiliziya, abaturage babona byacitse niko guhita bamanuka ku bwinshi batanga umusanzu wabo. Buriya no kubaka kuriya kiliziya niwe wabitanzeho ibitekerezo ndetse n’imitako myinshi irimo niwe wayishyizemo.”

Padiri Mukuru wa Paruwasi ya Rwamagana, Ingabire Jean Marie Theophille, avuga ko mu itangira, ibikorwa bya mbere byari iyamamaza vanjiri, kogeza inkuru nziza ya Yezu Kristu, gutagatifuza, kuyobora abantu mu nzira nzima zirimo kubatizwa no guhabwa andi masakaramentu n’ibindi.

Akomeza avuga ko kuva iyi kiliziya yagera i Rwamagana yitaye mu kwigisha abanyarwanda gusoma no kwandika, amashuri yashinzwe akaba yaratanze inkunga ikomeye mu kuzamura ireme ry’uburezi kugera no muri iki gihe.

Ati “Dufite ibigo byo mu mashuri abanza byinshi, tukagira ayisumbuye, ay’imyuga, tukagira na kaminuza byose bibereyeho guteza imbere uburezi twavuga nka St Aloys, College Marie Reine de la Paix, Kaminuza y’ubuganga, HVP Gatagara, aho dufasha abana bafite ubumuga kwiga guhera mu mashuri abanza kugeza barangije n’ayisumbuye ku buryo bigirira umumaro.”

Akomeza avuga ko mu bijyanye n’ubuvuzi naho batasigaye inyuma ati“Murabona biriya bitaro bya Rwamagana nubwo ubu biyoborwa na leta ariko abihayimana nibo babitangije kandi n’ubu baracyabitangamo umusanzu.”

Perezida Kagame yasengeye muri iyi paruwasi anahatanga umusanzu

Ku itariki 25 Ukuboza 2009 ubwo hizihizwaga umunsi mukuru wa Noheri, Umukuru w’Igihugu n’umuryango we basengeye muri iyi kiliziya bakirwa na Musenyeri Kizito Bahujimihigo wayoboraga Diyosezi ya Kibungo, nyuma Perezida Kagame atanga umusanzu watumye iyi kiliziya irushaho gusa neza.

Mu ijambo yahavugiye yasize abemereye inkunga yo kububakira uruzitiro rwa kiliziya, ndetse abemerera no gukora imbuga nini y’iyi kiliziya kugira ngo irusheho gukomeza gusa neza, yatanze amafaranga yatumye imbuga nini y’iyi kiliziya itunganywa ku buryo nta gitaka kikiharangwa.

Padiri Mukuru Ingabire ashimira Umukuru w’Igihugu ku nkunga yabemereye ndetse ikanaboneka igakoreshwa neza bigatuma kiliziya irushaho kugaragara neza.

Anashimira abakiristo bagiye basengera muri iyi kiliziya ku nkunga zabo zitandukanye zatumye iyi kiliziya ikomeza gutera imbere ndetse n’ibikorwa bakora bigatera imbere.

Kuri ubu Paruwasi ya Rwamagana ifite abakiristo ibihumbi 15 901 bayibarizwamo, kuvugurura iyi kiliziya biri gukorwa n’abakiristu nyuma y’imyaka 100 bimaze gutwara miliyoni 60 z’amafaranga y’u Rwanda.

Umuhango wo kwizihiza iyi yubile y’imyaka 100 ukaba uteganyijwe tariki 21 Nzeri uyu mwaka.

Imbuga ya Kiliziya ya Rwamagana yubatswe ku nkunga ya Perezida Kagame
Kimonyo w'imyaka 97 avuga ko nyuma yo kuzuza kiliziya hanubatswe amashuri, amavuriro n'ibindi bikorwa bizana iterambere
Umutware Rwabutogo Francisco yatanze ubutaka bwari bwubatseho ibiraro by'inka ze kugira ngo bwubakweho kiliziya
Umutware Rwabutogo n'umugore we basezeraniye muri kiliziya ya Rwamagana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza