Papa Francis yageze muri Mozambique mu ruzinduko rw’amahoro n’ubwiyunge

Yanditswe na Ferdinand Maniraguha
Kuya 5 Nzeri 2019 saa 11:45
Yasuwe :
0 0

Papa Francis yaraye ageze muri Mozambique ku mugoroba wo kuri uyu wa Gatatu, aho uruzinduko rwe rugamije guteza imbere amahoro n’ubwiyunge muri icyo gihugu cyakunze kwibasirwa n’intambara, ubukene na ruswa.

Iki gihugu cyahoze gikolonijwe na Portugal cyaguye mu ntambara mu myaka 15 ishize ariko hari icyizere ko iyo ntambara igiye kujya ku musozo nyuma y’amasezerano Perezida Filipe Nyusi yasinyanye n’umutwe wa Renamo utavuga rumwe na Leta.

Papa Francis yakiriwe na Perezida Nyusi ubwo yari ageze ku kibuga cy’indege i Maputo, nyuma y’urugendo rw’amasaha 10 Papa yari amaze avuye i Vatican.

Yakiriwe n’ibihumbi by’abakristu Gatolika bamwakirije indirimbo n’imbyino gakondo.

Ni nako byari bimeze ku mihanda imodoka yatwaye Papa yanyuzemo mu murwa mukuru.

Kuri uyu wa Kane biteganyijwe ko Papa agirana ibiganiro na Perezida Nyusi.

Akiri mu ndege, Papa Francis yabwiye abanyamakuru ko yizeye ko uruzinduko rwe ruzabyara umusaruro, mu gihe muri Mozambique bateganya amatora mu Ukwakira 2019. Hari ubwoba ko ayo matora ashobora kubamo imvururu.

Mu butumwa yegeneye abatuye Mozambique mbere yo kugera muri icyo gihugu yagize ati “Muri mu masengesho yanjye. Ndabasaba kwifatanya nanjye mu isengesho kugira ngo Imana data wa twese abahe ubwiyunge bwa kivandimwe muri Mozambique no muri Afurika hose ari wo musingi ukomeye w’amahoro arambye.”

Manuela Maiga, inzobere mu binyabuzima akaba umwe mu bakora ibikorwa by’ubutabazi yatangarije Reuters ko uruzinduko rwa Papa rwitezweho kuzana amahoro mu gihugu.

Ati “Abagatolika twumva ko ari umugabo ufite icyerecyezo ushobora gufasha Mozambique kongera icyizere no kwibagirwa ibituma turwana byose.”

Byitezwe ko mu biganiro agirana n’abayobozi ba Mozambique kuri uyu wa Gatanu, haraganirwa ku mahoro.

Nyuma yo kuva muri Mozambique, Papa Francis azakomereza uruzinduko muri Madagascar no mu birwa bya Maurice.

Uruzinduko rwa Papa muri Mozambique rufite intego y’amahoro, icyizere n’ubwiyunge.

Mu minsi itatu azamara muri icyo gihugu, Papa Francis araba acumbitse mu rugo rw’intumwa ya Papa muri Mozambique.

Ibihumbi by'abakiristu byabukereye kwakira Papa Francis muri Mozambique
Papa yakirwa n'abana ubwo yageraga i Maputo
Papa Francis yakirwa mu cyubahiro na Perezida Nyusi wa Mozambique
Abakiristu babukereye kwakira Papa Francis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza