Pasiteri Kamanzi wari Umuhuzabikorwa wa Rwanda Shima Imana yasezeweho bwa nyuma (Amafoto&Video)

Yanditswe na Ishimwe Israel
Kuya 3 Kanama 2018 saa 10:26
Yasuwe :
0 0

Pasiteri Kamanzi Théophile wayoboraga Eglise Apostolique pour le Réveil au Rwanda (EARR) akaba n’Umuhuzabikorwa w’Igiterane Rwanda Shima Imana, yasezeweho bwa nyuma kuri uyu wa Gatanu, tariki ya 3 Kanama 2018.

Yasezeweho n’abantu batandukanye barimo abo mu muryango we, abakirisitu yari abereye umushumba n’abavugabutumwa barimo Umuyobozi w’Itorero Zion Temple Celebration Centre ku Isi, Apôtre Dr Paul Gitwaza; Pasiteri Emma Ntambara; umugore wa Apôtre Masasu, Pasiteri Lydia Umulisa Masasu, Umuyobozi wa Women Foundation Ministries, Apôtre Kabera Alice Mignone n’abandi. Wanitabiriwe n’abaturutse hanze mu bihugu byo mu Karere ka Afurika y’Uburasirazuba bakoranye ndetse akabafasha kuvuga ubutumwa bashize amanga.

Umuhango wo kumusezeraho mu cyubahiro watangiriye iwe mu rugo Cosmos i Nyamirambo saa Mbili ahari hateraniye abagize umuryango we, inshuti ze n’abo babanye mu bihe bitandukanye.

Ibihumbi by’abakirisitu bateraniye mu Rusengero rwa Apostolique Kabeza ahatangiwe ubuhamya bushimangira ko Pasiteri Kamanzi yari "umugabo w’umunyakuri, ujya inama kandi ukunda gusenga." Yashyinguwe mu irimbi ry’i Rusororo ku mugoroba.

Pasiteri Kamanzi w’imyaka 65 yatangiye kuremba mu mpera z’umwaka ushize ariko akomerezwa cyane mu ntangiriro za Mutarama 2018. Yavurijwe mu Buhinde muri Gicurasi, aho yamaze ukwezi yitabwaho n’inzobere zo muri icyo gihugu.

Pasiteri Kamanzi yitabye Imana ahagana saa tanu n’iminota 50 mu ijoro ryo ku wa 29 Nyakanga 2018, azize uburwayi bwa kanseri y’igifu. Yaguye mu bitaro bya Kaminuza bya Kigali, CHUK aho yari amaze icyumweru arwariye.

Amashusho yihariye mu gusezera Pasiteri Kamanzi i Rusororo

Umuyobozi w'Ihuriro ry'Amatorero mu Rwanda, Rwanda Evangelical Alliance, Rev. Dr Gahungu Bunini (uwa kabiri iburyo), Apôtre Dr Paul Gitwaza n'abandi bashyira indabo ku mva
Abahagarariye Ihuriro ry'Amatorero mu Rwanda, Rwanda Evangelical Alliance bifatanyije n'umuryango wa Kamanzi mu muhango wo kumuherekeza
Abana bo muri Eglise Apostolique pour le Réveil au Rwanda (EARR) Kabeza basezera kuri nyakwigendera
Kamanzi David ashyira indabo ku mva y'umubyeyi we. Yasabwe kuzaba umugabo akagera ikirenge mu cye
Apôtre Dr Paul Gitwaza yabanye na nyakwigendera mu ivugabutumwa mu biterane bya Rwanda Shima Imana
Imva yashyizwemo umubiri yasengewe ngo yezwe
Pasiteri Patrick Twagirayesu yavuze ko Pasiteri Kamanzi yazamuwe ku rundi rwego kuko ijuru rye yaritangiriye mu Isi
Umuyobozi w'Ihuriro ry'Amatorero mu Rwanda, Rwanda Evangelical Alliance, Rev. Dr Gahungu Bunini, yavuze ko itorero ribuze umuntu w'intwari
Ibihumbi by'abantu baherekeje Pasiteri Kamanzi
Pasiteri Ntakamurenga Théophile yavuze ko Pasiteri Kamanzi Abarundi bamufata nk’umubyeyi wabo kuko yabafashije mu bihe bitandukanye
Umuyobozi w'Itorero Zion Temple Celebration Centre ku Isi, Apôtre Dr Paul Gitwaza, yasenze mbere yuko umuhango wo gushyingura utangira
Abaherekeje Pasiteri Kamanzi basize ku mva indabo zigaragaza ko azabahora ku mutima
Pasiteri Emma Ntambara mu baherekeje Pasiteri Kamanzi

UKO UMUHANGO WO GUSEZERA PASITERI KAMANZI MU RUSENGERO WAGENZE

-  Abaje guherekeza Pasiteri Kamanzi berekeje i Rusororo aho yashyinguwe mu cyubahiro.

Abiganjemo abashumba baherekeje Pasiteri Kamanzi
Apôtre Kabera Alice Mignone yasenze asabira umuryango wasigaye gukomerera mu Mwami

15:00: Umuhango wo gusezera Pasiteri Kamanzi waberaga muri Eglise Apostolique urasojwe. Apôtre Kabera Alice Mignone niwe wasenze isengesho risoza.

Mushiki wa Pasiteri Kamanzi yavuze ko "bishimiye ko musaza wabo yagiye mu ijuru"
Kamanzi Ibabaza Aude yavuze ko umubyeyi wabo yabigishaga ijambo ry'Imana
Umugore wa Pasiteri Kamanzi, Umulisa Médiatrice yavuze ko umugabo we yamubereye inshuti, umutware n'umushumba mwiza
Prof Kalisa Mbanda yashimiye ababanye n'umuryango mu bihe bikomeye

-  Prof Kalisa Mbanda uyobora Komisiyo y’Igihugu y’Amatora mu ijambo ry’uhagarariye umuryango yavuze ko Pasiteri Kamanzi yicishaga bugufi kandi ntiyizamuye mu cyubahiro nk’abandi banyedini. Yavuze ko Imana yisubije ibyo yari yatanze.

Umulisa yari yarasabye Imana ko umugabo we yazatabaruka ahibereye

-  Umugore wa Pasiteri Kamanzi, Umulisa Médiatrice yavuze ko umugabo we yamubereye inshuti, umutware n’umushumba.

Yagize ati ‘‘Mu Ukuboza nkuko bavuze ko yakundaga abana (abakirisitu), hari uwamusabye ko bajya kwisuzumisha muri CHUK baza gusanga afite ikibazo ku gifu. Bamuhaye imiti bamubwira kugaruka mu minsi itanu. Basanze igisebe kiri kwiyongera bamusaba kubagwa vuba. Abanyetorero bakusanyije ubushobozi bwo kujya kumuvuriza hanze. Yabwiye abashumba kutabwira abana uburwayi bwe ngo abakirisitu badakuka umutima. Ari mu kinya Imana yamubwiye uko agomba kwigisha itorero guhinduka no kubabwira inyigisho ziboneye. Icyantangaje ni uko no mu burwayi bwe yakoraga umurimo.”

Yakomeje ati “Twagiye mu bitaro bamuvura isepfu yari yamufashe ngo adakomeza kubabara ndetse twabonaga bigenda neza. Nafataga ko ashobora gutaha cyangwa akabaho. Abana barambwiraga bati ntashobora gutaha hari ibyo atarakora. Nababwiye ko ibintu byinshi yabikoze. Yasabye pasiteri umwe kujya gusengera abana be kuko yumvaga nta mbaraga afite. Yarimo ategura, buri kintu cyose ku buryo atashye mu mahoro.”

Umulisa yari yarasabye Imana ko umugabo we yazatabaruka ahibereye. Yavuze ko uwo munsi yari yamubajije ihishurirwa yagize amuhamiriza ko ashaka gutaha.

-  Ubuhamya bw’umugore n’abana ba Pasiteri Kamanzi

Kamanzi Ibabaza Aude yagize ati “Data yadukundaga cyane kandi sitwe twenyine ahubwo hari abandi bana yareraga. Birababaje ko barumuna banjye batazagira amahirwe yo kubona umubyeyi ubarera ariko Imana irahari. Data yari umubyeyi mwiza, yari pasiteri wacu. Twagiraga amahirwe yuko yatwigishaga ijambo. Imana imuhe iruhuko ridashira.”

-  Mushiki wa Pasiteri Kamanzi yavuze ko yishimiye ko musaza wabo yari umuntu ukomeye mu gihe batari babizi.

Yagize ati “Ntabwo musaza wanjye yakemera kuryama muri iyi sanduku. Byahise binyereka ko umwana wa mama na data ari mu ijuru.”

-  Umukwe wa Pasiteri Kamanzi, Amani Semy, yavuze ko akimenya indwara ya sebukwe yumvise bikomeye ariko ntiyiheba.

Yagize ati “Numvaga nakira nzamubera umushoferi nkajya mutwara mu butumwa. Umunsi wa mbere numvaga nkuko Imana yazuye Razaro ari buzuke. N’uyu munsi twagiye muri morge numva ko ari buzuke. Umusaza yari inshuti yanjye magara. Waba uri umwana cyangwa umuntu mukuru mwabaga inshuti. Namubwiraga ikibazo nkumva ko agiye kugisengera cyamaze gukemuka. Mama turahari kandi tuzakomeza tubabe hafi.”

Pasiteri Mukabaranga Leah wo muri Eglise Apostolique pour le Réveil au Rwanda (EARR) yavuze ko babuze umugabo w’intwari wari umujyanama ukomeye

-  Uyu muhango witabiriwe n’abavugabutumwa bo mu Rwanda n’abo hanze barimo abakomoka muri Uganda. Muri bo harimo umugore wa Apôtre Ndagijimana Joshua Masasu, Lydia Umulisa Masasu, Umuyobozi wa Women Foundation Ministries, Apôtre Kabera Alice Mignone n’abandi.

Apôtre Mignone Kabera yitabiriye umuhango wo gushyingura Pasiteri Kamanzi
Pasiteri Umulisa Lydia Masasu wo muri Restoration Church mu baherekeje Pasiteri Kamanzi
Pasiteri Kamanzi yavuzwe nk'umugabo waranzwe n'ubutwari
Pasiteri Kamanzi Théophile yasezeweho avugwa imyato
Uyu muhango witabiriwe n'abiganjemo abavugabutumwa bakomeye mu Rwanda no hanze yarwo
Pasiteri Patrick Joshua Twagirayesu uyobora Itorero Calvary Temple ni we wabwirije ijambo ry'Imana

-  Pasiteri Kamanzi yimikiwe inshingano z’ubushumba ku wa 19 Mutarama 1994. Nyuma ya Jenoside yakorewe Abatutsi mu 1994, yongeye kubaka Itorero rya Eglise Apostolique ryarimo abantu umunani bari barasigiwe ibikomere byo ku mubiri n’umutima. Yahise atangira umurimo mu bihe bigoye kugeza ubu rimaze kubyara amatorero 32. Mu 1998 nibwo yatorewe kuba Umuvugizi wa Eglise Apostolique.

Umubiri wa Pasiteri Kamanzi winjizwa mu rusengero
Bishop Birindabagabo Alexis uhagarariye Umuryango wa Peace Plan uhuriramo amatorero ya Gikirisitu mu Rwanda, ari nawo utegura igiterane cya Rwanda Shima Imana

-  Abavugabutumwa bakoranye umurimo w’Imana muri Uganda bavuze uko babanye na Pasiteri Kamanzi mu ivugabutumwa bakoranye mu gihe kirekire.

Umwe yagize ati “Turi kumwe n’umuryango kandi tuzakomeza ubufatanye muri byose. Twizeye ko hakiri ibyiringiro by’ahazaza. ”

Pasiteri Antoine Rutayisire yiseguye kuba atarahise atabara umuryango wa Kamanzi

-  Rev Pasiteri Rutayisire Antoine yiseguye ko atahise atabara umuryango wa Kamanzi kuko atari yamenye amakuru

Yagize ati “Icyo dukundira Imana ni uko ifata abantu ba nta kigenda ikabahindura amaturufu. Bibiliya iratubwira ngo nujya ahantu hari ikiriyo hajye hakubera ishuri. Twigane Kamanzi ngo imirimo yakoraga tugendere mu micyo ye. ”

-  Abantu benshi bari basendereye Urusengero rwa Eglise Apostolique mu gihe hanze hashinzwe amahema, hanashyirwa indangururamajwi mu gufasha abandi kumva uko umuhango wagenze umunota ku wundi.

Abaririmbyi batanze ubutumwa bushimangira ko Kamanzi yagiye mu ijuru
Umurambo wa Pasiteri Kamanzi uvanwa iwe mu rugo i Nyamirambo

Amafoto yo gusezera Pasiteri Kamanzi mu rugo i Nyamirambo

Pasiteri Kamanzi Théophile yasezeweho bwa nyuma
Umuyobozi wa Komisiyo y'Igihugu y'Amatora, Prof Kalisa Mbanda (ibumoso), mu basezeye nyakwigendera
Kamanzi David ari mu bana bane Pasiteri Kamanzi yasize

12:00: Umuhango wo gusezera Pasiteri Kamanzi wabereye ku Rusengero rwa Apostolique i Remera. Witabiriwe n’abantu batandukanye biganjemo abakirisitu b’itorero yari abereye Umushumba, abo bakoranye umurimo w’Imana barimo abayobozi bo mu Muryango wa PEACE PLAN n’izindi nzego zitandukanye.

Mu buhamya bwatanzwe hibanzwe ku bihe by’ingenzi byaranze ubuzima bwa Kamanzi, umugabo ufatwa na benshi nk’umubyeyi mu buryo bwa roho n’ubw’umubiri.

Ubuhamya bw’abakozi b’Imana babanye na Pasiteri Kamanzi

Perezida w’Ihuriro ry’Amatorero y’abavutse ubwa Kabiri mu Rwanda (Forum of Born Again Churches in Rwanda-FOBACR), Pasiteri Sengoga Joël bakoranye yavuze ko ikiza ku isonga mu byamuranze ari ubunyamugayo.

Yagize ati "Yari umugabo urangwa n’ukuri. Yakubwiraga ukuri akakureba mu maso, iyo yatangiraga kuvuga Igifaransa wamenyaga ko yatangiye kurakara. Yari afite umutima wagutse, yari umubyeyi mwiza atari iby’ab’ubu babyara abantu bose. ”

Yakomeje avuga ko yari umuntu ukunda gusenga, wagiye agikenewe ngo abere benshi icyitegererezo mu buzima bwabo.

Yagize ati “Gutwara Kamanzi byari nko guhamagara. Gutwara Kamanzi ni ubutumwa bukomeye ku itorero. Abantu bishingikirije Isi, nta bundi butumwa buvugwa. Bisa n’aho kujya mu ijuru bitakigezweho."

Yavuze ko itorero risigaye risuzuguritse, ryabuze amaraso ya Kirisitu, ikintu cy’agaciro cyari mu ijuru Imana yatanze. Yagize ati “Tubuze umugabo, tubuze uwari utubereye icyitegererezo, dusigaranye ibigarasha.”

Bishop Birindabagabo Alexis uhagarariye Peace Plan yagize ati “Nkibonana na Pasiteri Kamanzi yarambwiye ngo ndagira ngo negure ku buyobozi bwa Rwanda Shima Imana. Yari umuntu usenga, abasenga bagira imbaraga zidasanzwe. Ku wa Mbere mu gitondo nibwo umwana yambwiye ko inshuti yanjye yatashye. Narababaye ariko menya ko atashye kuko Imana isarura ibyeze. Yari azi gutanga inama kandi akagirwa inama. Ndihanganisha umuryango mbabwira ko Kamanzi yagiye mu ijuru.”

Mu butumwa umuryango we wamugeneye bifurije uyu mugabo w’agaciro iruhuko ridashira.

Umugore we Umulisa Médiatrice yagize ati ‘‘Wambereye inshuti, umutware, umushumba, izi nkingi eshatu nazirindiwemo imiyaga ihungabanyije ingo nyinshi. Ndakurahiye ko ibyo wanyigishije, ibyo wambwirije, ibyo nakumvanye n’ibyo nakubonanye aribyo nzakora. Wirirwe kuko ni igihe gito tukongera kubonana.

Umwe mu bana be witwa Kamanzi Ibabaza Aude yagize ati “Ntiwigeze uvuga ko ugiye kugenda. Wagiye vuba ariko ndishimira ko ubu uri ahantu heza, hatarangwa imibabaro ahubwo hari amahoro. Turagukunda.”

Amateka avunaguye ya Pasiteri Kamanzi

Pasiteri Kamanzi Théophile yavukiye i Byumba ku wa 23 Ukwakira 1953. Yari imfura mu bana icyenda mu muryango wa Kamanzi Aloys na Cyamazinga Marguerite.

Yize amashuri abanza i Buhambe muri Byumba mu 1959, ayakomereza i Nyagahanga muri Kibungo, ayasoreza i Gatare muri Zone ya Masisi muri Repubulika Iharanira Demokarasi ya Congo.

Amashuri Makuru yayize i Masisi muri Institut Bustani. Akirangiza yahise ataha mu Rwanda mu 1977. Yakoze mu Icapiro ry’Igihugu (Imprimerie Nationale du Rwanda) no muri Imprimerie Sieva aho intambara yamusanze akaza no gufungwa mu byitso mu gihe cy’amezi atandatu.

Pasiteri Kamanzi yarokokeye Jenoside yakorewe Abatutsi mu 1994 ku Kicukiro Zinia, mbere yo kwimurirwa i Byumba.

Pasiteri Kamanzi wari utuye i Nyamirambo Cosmos, yasezeranye na Umulisa Médiatrice mu 1987; babyaranye abana bane, barimo abakobwa batatu (Kamanzi Ibabaza Aude, Kamanzi Arielle, Kamanzi Rebecca) n’umuhungu umwe Kamanzi David. Yasize abuzukuru babiri.

Kuva mu 1995 yiyemeje kuba Umukozi w’Imana muri Eglise Apostolique pour le Réveil au Rwanda (EARR), yatorewe kuriyobora nyuma ya Jenoside. Iri torero rifite amashami agera kuri 32 hirya no hino mu gihugu.

Pasiteri Kamanzi yabaye Umuyobozi Mukuru Rwanda Shima Imana. Yari Visi Perezida w’Ihuriro ry’Amatorero y’abavutse ubwa Kabiri mu Rwanda (Forum of Born Again Churches in Rwanda-FOBACR) n’Umuhuzabikorwa wa Rwanda Shima Imana. Mu buzima bwe yaranzwe n’ubwitonzi, kubaha no guca bugufi ndetse n’urukundo.

Pasiteri Kamanzi Théophile wari Umuhuzabikorwa wa Rwanda Shima Imana yasezeweho mu cyubahiro
Umugore wa Pasiteri Kamanzi, Umulisa Médiatrice yavuze ko umugabo we yamurinze imiyaga ihungabanya izindi ngo
Hasomwe ijambo ry'ihumure ku muryango wasigaye
Umuhango wo guherekeza Pasiteri Kamanzi witabiriwe n'abantu b'ingeri zitandukanye
Pasiteri Kamanzi yashimwe ko yaranzwe n’ubwitonzi, kubaha no guca bugufi no kugira urukundo

Kanda hano urebe andi mafoto menshi

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza