Apôtre Rwandamura na Pasiteri Ntambara batumiwe mu giterane cy’ububyutse i Gikondo

Yanditswe na Sengurebe Joel
Kuya 3 Kanama 2018 saa 07:48
Yasuwe :
0 0

Itorero rya UCC (United Christian Church), Ishami rya Gikondo riyobowe na Bishop Margaret Rwandamura ryahurije abavugabutumwa b’abanyabitangaza barimo Apôtre Charles Rwandamura na Pasiteri Emma Ntambara mu giterane cy’ububyutse kizamara iminsi umunani.

Iki giterane kigiye kuba ku nshuro ya munani cyiswe “Revival conference’’ bishatse kuvuga “Igiterane cy’Ububyutse’’, giteganyijwe kubera i Gikondo hagati ya tariki ya 5-12 Kanama 2018.

Intego yacyo ni ukuyobora abantu inzira y’agakiza binyuze mu kubaturwa ingoyi y’ibyaha no guhindurirwa amateka.

Revival conference izahuriramo abavugabutumwa bakomeye barimo Apôtre Charles Rwandamura uyobora amatorero ya UCC mu Rwanda, umugore we Bishop Margaret Rwandamura, umunyabitangaza Pasiteri Emma Ntambara, Apôtre Karamira Jane na Pasiteri Mugema Thomas.

UCC Gikondo yanatumiye abaririmbyi basigiwe gusakaza ubutumwa bwiza barimo Kingdom of God Ministries, Korali Imigezi y’Ubugingo n’Ijwi ry’Ubuhanuzi ya UCC Kabuga, Itsinda rya Planet Shakers, UCC Gikondo Worship Team na Blessed Generation ya UCC Niboye.

Mu kiganiro na IGIHE, Umushumba w’Itorero rya UCC Gikondo, Bishop Margaret Rwandamura, yatangaje ko iki giterane bagihaye intego yihariye yo gusengera abacogoye ku rugendo.

Yagize ati ‘‘Uyu mwaka wa 2018 twahaye igiterane intego dusanga mu gitabo cya Yesaya 40:29-31 hagira hati ‘Ni yo iha intege abarambiwe kandi utibashije imwongeramo imbaraga, abasore b’imigenda bazacogora baruhe, n’abasore bazagwa rwose ariko abategereza Uwiteka bazasubizwamo intege nshya, bazatumbagira mu kirere bagurukishe amababa nk’ibisiga, baziruka be kunanirwa, bazagenda be gucogora.”

Yakomeje ati “Muri iki giterane tuzasenga Imana tuyisaba guha abantu imbaraga ndetse tunayisaba ngo ibagarurire ibyo Satani yabanyaze n’ibyariwe n’inzige byose ibigarure. Turizera tudashidikanya ko Imana itazabura kwiyereka abazayegera muri aya masengesho y’ububyutse.’’

Bishop Margaret Rwandamura yavuze ko ibiterane birindwi biheruka byatanze umusaruro ufatika.

Yagize ati ‘‘Umusaruro urahari, uragaragara ku mpande zombi. Twabonye abantu bakizwa bakava mu byaha, abandi Imana ibahindurira amateka nko kubona akazi, ubucuruzi buraguka, abatabyara babona urubyaro, abarwayi bagakira indwara ndetse n’itorero rikaguka bitewe n’ububyutse.”

Apôtre Charles Rwandamura ari mu bategerejwe muri iki giterane

Revival conference izatangira tariki ya 5 Kanama, isozwe ku wa 12 Kanama 2018, izabera i Gikondo kuri United Christian Church (UCC) mu Ishuri ryisumbuye rya APAPE. Iki giterane kizajya gitangira saa kumi z’umugoroba gisozwe saa moya n’igice z’ijoro (16h00 Pm -19:30 Pm.)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza