00:00:00 IGIHE NETWORK KN KINYARWANDA EN ENGLISH FR FRANCAIS

Korali La Source y’i Rubavu yasohoye indirimbo ihamagarira abantu kwisunga Yesu

Yanditswe na Ntabareshya Jean de Dieu
Kuya 9 Nzeri 2021 saa 11:12
Yasuwe :
0 0

Korali La Source yo mu Karere ka Rubavu yasohoye indirimbo yise “Isoko”, ikangurira abantu guhungira kuri Yesu kuko ari we mazi amara inyota. Ni iya kabiri iri kuri album yayo ya gatatu yitegura kumurika.

“Isoko” ni indirimbo yuzuyemo amagambo agaragaza ko abari kuri Yesu Kirisitu batazigera bagira inyota, agamije kongera imbaraga mu bantu bataye ibyiringiro.

Abaririmbyi ba Korali La Source bahamagarira buri wese guhungira muri Kirisitu kuko ari we soko y’ukuri.

Iyi ndirimbo ni iya kabiri kuri album ya gatatu nyuma y’indirimbo iyi korali iheruka gushyira hanze yakoranye na Korali Bethlehem yo ku Gisenyi yiswe “Ukomeye ni Yesu wenyine”.

Umutoza w’Indirimbo muri Korali La Source, Baraka Gédéon, yabwiye IGIHE ko iyo ndirimbo bayishyize ahagaragara muri ibi bihe bya Covid-19 bagamije gukangurira abantu guhinduka no guhungira kuri Yesu kuko bamwe basa n’abasubiye inyuma.

Yagize ati “Muri iyi ndirimbo harimo ubutumwa buhamagarira abantu kuza kuri Kirisitu, igaragaza ko uwagiriwe ubuntu bwo kubana na we atongera kugira inyota kandi Yesu atangira ubuntu.”

Yakomeje agira ati “Ibi bihe turimo, usanga buri wese yarasubiye inyuma ku buryo n’uwasengaga usanga yarasubiye inyuma gato naho utarasengaga we yagiye ahabi kurushaho. Iyi ni indirimbo yongera kubahamagarira kuza muri kristo kuko umwisunze wese ashobora kugira ubuzima bwiza.”

Yavuze ko abakunzi b’indirimbo ziramya zikanahimbaza Imana badakwiye guheranwa n’agahinda cyangwa ngo bumve bari mu bwigunge kuko bari kubategurira ibyiza birimo indirimbo umunani bitegura gushyira hanze kandi biteguye gukorana n’abandi bahanzi bakomeye.

Korali La Source igizwe n’urubyiruko rwo muri ADEPR Mbugangari, mu Karere ka Rubavu, rukunda Imana kandi rufite ubushake bwo gukora umurimo wo kubwiriza ubutumwa mu buryo bw’indirimbo.

Iyi korali imaze gusohora indirimbo nyinshi zinyuranye zirimo “Ntiwigeze udutererana”, “Tuzanye Inkuru Nziza” n’izindi.

-  Umva indirimbo nshya ya Korali La Source

-  “Ntiwigeze udutererana” ni indirimbo yakunzwe mu 2020

-  Indirimbo Korali La Source iheruka gusohora yitwa “Ukomeye ni Yesu wenyine”

Korali La Source y'i Rubavu yashyize indirimbo nshya hanze yise "Isoko" igamije kongerera abihebye ibyiringiro
Iyi korali iri mu zizamukanye ingoga mu muziki uhimbaza Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .