Perezida Kagame agiye gusesa Umutwe w’Abadepite

Yanditswe na Mathias Hitimana
Kuya 7 Kanama 2018 saa 08:38
Yasuwe :
0 0

Mu gihe Abanyarwanda begereza umunsi nyir’izina w’itora ry’abadepite, biteganyijwe ko mu gihe gito Perezida Paul Kagame asesa Inteko Ishinga amategeko, Umutwe w’abadepite, nk’uko biteganywa n’Itegeko Nshinga.

IGIHE yabonye amakuru ko Inteko Ishinga Amategeko umutwe w’abadepite, izaseswa ku wa Kane tariki 9 Kanama 2018 mu gihe ibikorwa byo kwiyamamaza ku bakandida bashaka kuba abadepite bizatangira ku wa 13 Kanama bikageza ku wa 1 Nzeri 2018.

Itegeko Nshinga rya Repubulika y’u Rwanda ryo mu 2003 ryavuguruwe mu 2015, mu ngingo ya 79 rivuga ko Umutwe w’Abadepite useswa ku mpamvu z’amatora, bikozwe na Perezida wa Pepubulika.

Rigira riti “Ku mpamvu z’amatora, Perezida wa Repubulika asesa Umutwe w’Abadepite hasigaye nibura iminsi mirongo itatu (30) kandi itarenga iminsi mirongo itandatu (60) ngo manda y’abawugize irangire.”

Itegeko ngenga rigenga amatora ryo ku wa 21 Kamena 2018 rigena ko manda y’abadepite itangira ‘ku munsi barahiriyeho’, iryaribanjirije ryo ku wa 19 Kamena 2010 naryo rikaba ryaravugaga uko, ngo “manda y’Abadepite ni imyaka itanu uhereye umunsi barahiriyeho.”

Bivuze ko bitewe n’uko Abadepite bagize Inteko uyu munsi barahiye ku wa 4 Ukwakira 2013, itariki nk’iyo muri uyu mwaka ari bwo manda yabo izarangira, bihwanye n’iminsi 59 isigaye ubaze uhereye uyu munsi, bityo gusesa Umutwe w’Abadepite bikaba byemewe.

Gutora abadepite bashya biteganyijwe ku wa 2 Nzeri 2018 uhereye ku Banyarwanda batuye muri diaspora, abari imbere mu gihugu batore ku wa 3 Nzeri 2018 kandi nta “kuntu amatora yaba abadepite basanzwe bakiri mu nteko” nk’uko Komisiyo y’Amatora ibigaragaza.

Kuri uyu wa Mbere nibwo iyo Komisiyo yatangaje ko mu bantu 539 batanze kandidatire mu matora y’Abadepite uyu mwaka, 521 babyemerewe, 18 ntibuzuze ibisabwa.

Mu badepite bari kurangiza manda, 41 binjiyemo ku itike y’Umuryango FPR-Inkotanyi hamwe n’indi mitwe ya politike byifatanyije; barindwi ba PSD na batanu ba PL. Aba bose bakuzuza imyanya 53 ihatanirwa n’imitwe ya politiki n’abakandida bigenga.

Kuri abo hiyongeraho 24 bahagarariye abagore, babiri bahagarariye urubyiruko n’umudepite umwe uhagarariye abafite ubumuga.

Umutwe w’Abadepite wari uyobowe na Donatille Mukabalisa wo muri PL, wari ufite akarusho ku Isi ko kugira umubare munini w’abagore. Mu badepite 80, abagabo ni 29 mu gihe abagore ari 51, bangana na 63, 7%.

Abadepite bashya hashobora kuzagaragaramo amazina nka Sheikh Musa Fazil Harelimana wigeze kuba Minisitiri w’Umutekano, gusa hazavamo andi akomeye nka Nkusi Juvenal, Emmanuel Mudidi, Mutimura Zeno, Kayiranga Rwasa Alfred n’abandi.

Imirimo y’Inteko ishinga amategeko yahagaritswe

Mu gihe bategereje guseswa, kuri uyu wa Mbere tariki 6 Kanama Inteko Rusange y’Umutwe w’Abadepite yakoranye, yemeza inyandikomvugo z’inama z’Inteko Rusange n’inyandiko zivunaguye z’inama z’Inteko Rusange, isoza igihembwe cya kabiri gisanzwe cy’umwaka wa 2018.

Muri icyo gihembwe cyatangiye ku wa 5 Kamena 2018, abadepite batoye amategeko 33 ndetse amwe muri yo yamaze gusohoka mu igazeti ya leta, batora n’imishinga y’amategeko icyenda.

Perezida w’Umutwe w’Abadepite, Mukabalisa Donatille, yashimye imibanire myiza yaranze Abadepite muri iyi manda y’imyaka itanu guhera mu 2013-2018, avuga ko ubufatanye bwatumye bakora byinshi.

Yagize ati “Ibyo twagezeho muri icyo gihe cyose tubikesha ubufatanye hagati yacu, gukorera hamwe twuzuzanya, tugaragaza umurava, bikaba byaradufashije kugera ku musaruro ushimishije kandi tubikesha imikoranire myiza yaturanze n’izindi nzego.”

Ku rundi ruhande Sena nayo yasoje igihembwe itoye amategeko atatu, yemeza abayobozi 17 bari mu nzego z’ubucamanza, ifata n’imyanzuro ku bibazo binyuranye yagiye isuzuma.

Perezida wa Sena Bernard Makuza yabwiye abasenateri ati “Turabashimira ubwitange n’umurava, cyane cyane n’ubuhanga iyi mirimo ikoranwa, tukaba nta gushidikanya ko bizakomeza cyane cyane mu gihe tuzaba dutangiye igihembwe gikurikiraho, ubwo tuzaba dutangiye umwaka wa nyuma wa manda yacu izarangira mu 2019.”

Inteko rusange ya Sena yanemeje ko guhera ku wa 10 Kanama abasenateri bazajya mu kiruhuko cy’umwaka wa 2018.

Depite Emmanuel Mudidi na Mporanyi Theobald (babanza) ntibazagaragara mu Mutwe w'Abadepite utaha
Ubwo Perezida Kagame yafataga ifoto y'urwibutso hamwe n'abadepite b'abagore ubwo bari bamaze kurahira mu 2013
Mukabalisa yatorewe kuyobora Umutwe w'Abadepite ahita anarahirira izo nshingano
Ubwo abadepite barahiriraga kwinjira mu Nteko Ishinga Amategeko ku wa 4 Ukwakira 2013
Depite Nyirarukundo Ignacienne (ibumoso) ni umwe mu barahiye mu 2013
Iyi nteko Ishinga amategeko, Umutwe w'Abadepite, yari igizwe n'abagore hafi 64%
Ubwo abadepite barahiriraga imbere ya Perezida Kagame mu 2013
Aba badepite basoje manda y'imyaka itanu batangiye mu 2013

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza