Mushikiwabo yabajijwe uko kandidatire ye yakiriwe, dipolomasi y’u Rwanda n’ahazaza ha OIF

Yanditswe na Ishimwe Israel
Kuya 25 Nzeri 2018 saa 04:09
Yasuwe :
0 0

Hasigaye iminsi 17 ngo uzicara ku Ntebe y’Ubunyamabanga bw’Umuryango Mpuzamahanga w’Ibihugu bikoresha Ururimi rw’Igifaransa (OIF) mu myaka ine iri imbere amenyekane.

Uyu mwanya uhataniwe na Minisitiri w’Ububanyi n’Amahanga, Ubutwererane n’Ibikorwa by’Umuryango wa Afurika y’Uburasirazuba, Mushikiwabo Louise n’Umunya-Canada, Michaëlle Jean uwumazeho imyaka ine.

Amatora azabera mu nama ya OIF izateranira i Erevan muri Arménie ku wa 11-12 Ukwakira 2018.

Kandidatire ya Mushikiwabo yashyigikiwe na Perezida Emmanuel Macron w’u Bufaransa, ibihugu byo muri Afurika Yunze Ubumwe (AU) n’ahandi mu mfuruka zose yakoreyemo ingendo yiyamamaza.

Mushikiwabo umaze imyaka icyenda ayobora Minisiteri y’Ububanyi n’Amahanga y’u Rwanda, aheruka gutangaza ko yifitiye icyizere cyo kwegukana intsinzi.

Mushikiwabo ni umunyapolitiki wavukiye i Jabana mu Karere ka Gasabo, ku wa 22 Gicurasi 1963. Ahanze amaso Inama y’Inteko Rusange ya Loni iri kubera i New York izamufasha gukomeza gushaka amajwi.

Minisitiri Mushikiwabo yaganiriye na Jeune Afrique asubiza ibibazo ku cyerekezo cye muri OIF n’imibanire y’u Rwanda n’u Bufaransa, ibihugu byakunze kurebana ay’ingwe.
Jeune Afrique: Kandidatire yawe muri OIF yaratunguranye. Uvuga iki ku kuba warasunikiwe kwiyamamaza n’u Bufaransa ndetse ubusabe bukaba bwaranyujijwe kuri Maroc?

Mushikiwabo: Kandidatire yaganiriweho n’ibihugu by’inshuti nifuje kudatangaza, byiyongeraho u Bufaransa. Nabiganiriye na Perezida Kagame n’abagize Guverinoma dusanga atari igitekerezo kibi. Igihe kirageze ngo tugire uruhare rufatika mu miryango tubarizwamo.

Jeune Afrique: Abayobozi b’u Rwanda bakiriye bate kumva ko ushyigikiwe na Perezida Macron?

Mushikiwabo: Baratunguwe, baranishima. Mu bihe byashize Francophonie yagereranywaga n’u Bufaransa kandi ntabwo twari dufitanye umubano mwiza.

Jeune Afrique: Iyi kandidatire yaba ari inzira yo gusoza amakimbirane cyangwa iy’ubwiyunge hagati yanyu?

Mushikiwabo: Igaragaza ubushake bwo kugira uruhare mu muryango u Rwanda rubarizwamo kuva mu myaka ishize ariko rutashamadukiye kwinjiramo kubera imibanire mibi n’u Bufaransa.

Mu myaka ishize, igihugu cyanjye cyakomeje kwiyubaka no gusigasira ibyagezweho. Ni umwanya wo kugira uruhare rukomeye mu miryango turimo. Ni yo mpamvu twasubiye mu Muryango w’Ubukungu mu Karere ka Afurika yo Hagati (CEEAC). Ni ibimenyetso by’ubushake bwa politiki na dipolamasi.

Jeune Afrique: Mu myaka icyenda umaze muri Minisiteri y’Ububanyi n’Amahanga ni iki dipolomasi y’u Rwanda yagezeho?

Mushikiwabo: Twarazamutse mu bijyanye na politiki n’ubukungu. Twafunguye za ambasade muri Aziya no mu Burasirazuba bwo Hagati. Ubu duharariwe muri Singapore, Séoul, Abu-Dhabi n’ahandi.

Twanashyize imbaraga mu bikorwa byacu mu bice byose bya Afurika. Dipolomasi yacu yaragutse n’ibikorwa byayo biriyongera mu buryo bufatika. Turateganya gufungura Ambasade nshya muri Mozambique, Zimbabwe na Maroc.

Jeune Afrique: Mu 2014, Afurika ntiyahiriwe n’umwanya muri OIF kuko yari ihagarariwe n’abakandida bane. Kuri iyi nshuro kandidatire yanyu ishobora gushyigikirwa bisesuye na AU?

Mushikiwabo: Icyiyongera ku ruhare rw’u Rwanda ku mugabane ndetse no muri AU, kuba ibihugu bya Afurika binshigikiye bigaragaza inzira igana ku bumwe. Ni ibihe by’amavugurura no kwihuza.

Afurika yamenye ko mu gihe yunze ubumwe, ishobora gutsinda nkuko yafashije Tedros Adhanom Ghebreyesus wo muri Ethiopie kuyobora OMS. Uko iminsi yicuma ni ko ku ruhando mpuzamahanga Afurika izagira ijwi rimwe.

Jeune Afrique: Utekereza iki ku mikorere ya Michaëlle Jean? Ni ibiki wanoza mu byo yakoze uramutse utowe?

Mushikiwabo: Nirinze kwibanda ku bitekerezo byo kwiyamamaza biharabika Umunyamabanga Mukuru uriho. Icyo navuga ni uko numva mfite igitutu cy’ibihugu by’ibinyamuryango bikeneye kubona OIF ifite imbaraga kandi ibegera.

Mfite ubushake, umurava n’ubunararibonye. Abayobozi benshi ba Afurika n’abandi bashaka kunshyigikira ngo twongerere imbaraga umuryango wacu. Nyuma yo gukorera igihugu kimwe, kwita kuri 84 biri mu byo nifuza.

Jeune Afrique: Igihe u Rwanda rwemezaga Icyongereza nk’ururimi rwo gukoresha mu burezi, Perezida Kagame yavuze ko ‘‘Duha agaciro ururimi rufasha abana bacu guhangana kandi ruzadufasha mu cyerekezo cy’iterambere ry’igihugu.’’ Ibi mubihuza mute n’umwanya muri kwiyamamariza?

Mushikiwabo: Mu Rwanda nta guhangana kw’Igifaransa n’Icyongereza guhari. Ibyacu ntibyihariye kuko nizera ko turi ibihugu umunani muri OIF birimo na Canada bikoresha Igifaransa n’Icyongereza.

Icyongereza ni ururimi rw’ikoranabuhanga, ishoramari, imbuga nkoranyambaga kandi niko Isi imeze. Ntidukwiye kwibagirwa ko igihugu kiri muri Afurika y’Uburasirazuba, akarere gakoresha Icyongereza.

Jeune Afrique: Ni iki kigaragaza ukwiganza kw’Igifaransa mu Rwanda?

Mushikiwabo: Igifaransa gifite umwanya mu Rwanda nk’umurage. Ubuzima bushingiye ku muco hari aho buhurira n’Igifaransa. Twemera ko indimi ebyiri zakoreshwa nta kibazo. Ndagira ngo mbabwire ko umwanya w’Igifaransa utahawe akato mu Rwanda aho inyandiko zemewe n’ubutegetsi zandikwa mu Kinyarwanda, Icyongereza n’Igifaransa.

Jeune Afrique: U Rwanda rwaba rwaratanze umusanzu warwo muri OIF?

Mushikiwabo: Twarabikoze. Murabizi ko imisanzu itangwa mu miryango mpuzamahanga atari ibintu bishya. Akenshi usunikirwa gutanga umusanzu bitewe n’inyungu witeze kuvana mu muryango. Nzakora ibishoboka byose ku buryo buri gihugu muri OIF kizabigiramo uruhare.

Igifaransa cyemewe n’amategeko mu bihugu 29 ku Isi, aho muri byo 22 ari ibyo muri Afurika. Ibindi bitari ibya Afurika bikoresha uru rurimi ni nk’u Bubiligi, Canada, u Bufaransa, Haiti, Luxembourg, u Busuwisi na Vanuatu. Gikoreshwa kandi no mu birwa nka Saint Lucia, Dominica na Monaco.

Mu butegetsi bw’u Rwanda hakoreshwa indimi zirimo Icyongereza, Ikinyarwanda, Igiswahili n’Igifaransa ari nacyo gikoreshwa na benshi mu gihugu.

Umuryango wa Francophonie washinzwe mu 1970, urakomeye cyane kuko uhuza ibihugu bivuga Igifaransa, aho igenzura riheruka mu 2014 ryerekanye ko kivugwa na miliyoni 274 mu migabane itanu y’Isi.

Mushikiwabo Louise ni we mukandida wa Afurika ku buyobozi bwa OIF

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza