Kigali Marriott Hotel yibutse inzirakarengane za Jenoside yakorewe Abatutsi (Amafoto)

Yanditswe na Ishimwe Israel
Kuya 12 Mata 2019 saa 02:13
Yasuwe :
0 0

Abakozi n’abayobozi ba Kigali Marriott Hotel, bibutse inzirakarengane zazize Jenoside yakorewe Abatutsi mu 1994 yahitanye ubuzima bw’abarenga miliyoni mu minsi 100.

Uwo muhango wabereye kuri Kigali Marriott Hotel ku wa 11 Mata 2019; witabiriwe n’abayobozi bo mu nzego za leta, iz’umutekano n’abahagarariye imiryango iharanira inyungu z’abacitse ku icumu.

Mu buhamya bwe, Umurangamirwa Ange ukora muri Marriott Hotel, yavuze uko yarokotse, agasigarana na mukuru we mu muryango w’abantu barindwi.

Jenoside yabaye ari kwa nyirakuru i Nyamirambo, umunsi wo gutaha uhurirana n’ihanurwa ry’indege ya Habyarimana abura uko asubira iwabo mu Bugesera.

Yagize ati “Jenoside igana ku musozo ubwo nari ndyamye hamwe na nyogokuru, marume n’umugore we, umuntu yadusanze mu nzu, njye mpita niyorosa uburingiti. Numvise yagiye, ndabyuka nsanga yabarashe bose bapfuye. Nari negamiye kuri nyogokuru nsanga bamurashe mu mutwe.’’

Umurangamirwa ufite umwana umwe yavuze ko yahungiye mu baturanyi bagenda bamuhanahana, kugeza agejejwe mu kigo cy’imfubyi cyari ku Gitega cy’Umufaransa witwaga Papi aho yarokokeye.

Nyuma ya Jenoside yakorewe Abatutsi, u Rwanda rwari ruhanganye no kongera kubaka ubumwe n’ubwiyunge bw’Abanyarwanda.

Umuyobozi Mukuru wa Kigali Marriott Hotel, Rex A.G.Nijhof, yashimye abaharaniye uburenganzira bwa muntu.

Yagize ati “Mu izina rya Marriott International twifatanyije n’Abanyarwanda bose kwibuka inzirakarengane za Jenoside yakorewe Abatutsi mu 1994.Nifatanyije n’abarokotse n’abana babo biyemeje kubaka ubuzima bwabo nubwo banyuze mu bikomeye. Mu kwibuka niho dushobora kubakira ahazaza heza.’’

Yakomeje ati “Ndashimira Abanyarwanda bose bahagurutse bakagaragaza umurava mu guharanira uburenganzira bwa muntu.’’

FPR yashimwe kureka izina ry’ubutsinzi rya RPA, igafata irihuza bose

Umusesenguzi muri Politiki akaba n’umushakashatsi, Dr. Aggée Mugabe, yasobanuye ko inzira y’ubwiyunge u Rwanda rwanyuzemo ashimangira ko itari yoroshye.

Yagize ati “Kwiyunga nyuma ya Jenoside si nk’uk’umugabo n’umugore babyutse batongana, abakozi bavuganye nabi, abaturanyi baserereye kuko byo ni amakimbirane mato. Ni urugendo rukomeye kandi bigoye kugeraho. Abashakashatsi bakomeye bavuze ko Jenoside ari icyaha umuntu atahana.’’

Jenoside yagize ingaruka zatumye abayikorewe basigarana ibikomere ku mubiri n’umutima ku buryo bitari byoroshye kubyomora no kongera kunga abantu, bakavugana, bagatahiriza umugozi umwe.

Habarurwa abagore barenga ibihumbi 250 bafashwe ku ngufu, bakomotsweho n’abana basaga 2000. Mu 1999, mu babyeyi bafashwe amaraso abagera kuri 67% basanganywe SIDA.

Dr. Mugabe yavuze ko ingamba zafashwe mu guteza imbere ubwiyunge zirimo ‘Kwibuka, guha agaciro abishwe muri Jenoside, kwigisha ingaruka z’imiyoborere mibi, gusigasira amateka, ubumwe n’ubwiyunge, kumenya amakuru ku byabaye no gufasha kugena politiki zibereye abaturage’.

Muri uru rugendo hanashyizweho Komisiyo y’Igihugu y’Ubumwe n’Ubwiyunge, inkiko Gacaca zaburanishije imanza zigera kuri miliyoni ebyiri, Ikigega cya FARG gitera inkunga abarokotse Jenoside batishoboye, itorero ry’igihugu, Ndi Umunyarwanda n’ibindi.

Yavuze ko ‘‘Hanashyizweho gahunda zivana abaturage mu bukene nka Girinka ngo babane mu mahoro. Ubu turishimira ko Abanyarwanda babanye mu ituze.’’

Yashimye icyemezo cya FPR Inkotanyi yafashe izina rya RPA ryari iry’ubutsinzi ikarireka, ikitwa RDF yahaye ikaze buri wese.

Umunyamabanga Nshingwabikorwa w’Umurenge wa Nyarugenge, Ingabire Fanny, yavuze ko kwibuka ari ugusubiza agaciro abazize Jenoside.

Yagize ati “Ibi bihe bituma ababyiruka bamenya icyo Jenoside aricyo bakanirinda ko yakongera kubaho. Nyuma ya Jenoside abacitse ku icumu nta cyizere bari bafite ariko ubu bafatanyije n’abandi kubaka igihugu. Icyo twizeza ni uko abagizwe incike n’imfubyi za Jenoside yakorewe Abatutsi igihugu kibafite ku mutima.’’

Yashimye ingabo zabohoye igihugu cyari mu kaga ariko ubu kikaba cyifuzwa na buri wese.

Muri Werurwe 2019, abakozi ba Kigali Marriott Hotel, basuye abagore bibumbiye muri ‘Association Tubahumurize’ igizwe n’abagore bafashwe ku ngufu muri Jenoside n’abandi bafite ibibazo bitandukanye barabahumuriza babaha n’inkunga y’ibiribwa, ibinyobwa, n’ibikoresho by’isuku n’ibindi.

Abakozi n’abayobozi ba Kigali Marriott Hotel bibutse inzirakarengane za Jenoside yakorewe Abatutsi mu 1994
Ineza Aline yavuze umuvugo ushimangira ko u Rwanda rwavuye ahabi none rwiyubatse
Irakoze Abdul abaza ikibazo
Kuva Marriott Hotel yafungurwa mu Ukwakira 2016, ni ubwa gatatu yibutse Jenoside imaze imyaka 25 ihagaritswe n’Ingabo za FPR Inkotanyi
Mugabo James ukora muri Marriott Hotel yabajije ingamba leta ifitiye abakora imirimo nsimburagifungo, barekurwa bakongera gukora ibyaha
Nshimiye Aimable ni we wari umusangiza w'amagambo muri uwo muhango
Umuhango wo kwibuka ni umwanya wo guha agaciro inzirakarengane za Jenoside zishwe zizizwa ubusa
Umunyamabanga Nshingwabikorwa w’Umurenge wa Nyarugenge, Ingabire Fanny, yavuze ku bari hanze y'igihugu basebya u Rwanda bandika ibitari byo asaba urubyiruko kubavuguruza bifashishije imbuga nkoranyambaga
Umurangamirwa Ange (uwa kabiri iburyo) yatanze ubuhamya bw’uburyo yarokotse Jenoside asoza atanga ihumure ko bitazongera kuko igihugu kiyobowe neza
Umusesenguzi muri Politiki akaba n’umushakashatsi, Dr. Aggée Mugabe, yasobanuye ko inzira y’ubwiyunge u Rwanda rwanyuzemo itari yoroshye
Umuyobozi Mukuru wa Kigali Marriott Hotel, Rex A.G.Nijhof, ni we watangije igikorwa cyo gucana urumuri rw'icyizere
Umuyobozi w’Umuryango uharanira Inyungu z’Abacitse ku icumu rya Jenoside (IBUKA) mu Karere ka Nyarugenge, Gafaranga Omar, yavuze ko ibikorwa byo kwibuka mu ntangiriro byari bikomeye kuko byafatanywaga no gutaburura imibiri y'abazize Jenoside
Umuyobozi Mukuru wa Kigali Marriott Hotel, Rex A.G.Nijhof, yashimye Abanyarwanda bahagurutse bagaharanira uburenganzira bwa muntu
Urumuri rutazima ni ikimenyetso cy'icyizere cy'Abanyarwanda
Uwo muhango wanitabiriwe n'abahagarariye inzego z'umutekano

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza