"Abashyigikiye urwango na Jenoside bakwiye kumenyekana"

Yanditswe na Tom Ndahiro
Kuya 8 Werurwe 2018 saa 02:33
Yasuwe :
0 1

Abanyarwanda baca umugani ngo ‘Nyakibi ntarara bushyitsi’. Ni umugani wasobanura ko umuntu wasabitswe n’ingengabitekerezo mbi adashobora kwihishira. Mu nyandiko zizakurikirana, mbere y’icyunamo cyo kwibuka Jenoside yakorewe Abatutsi ku nshuro ya 24, tuzerekana abo ba Nyakibi batarara bushyitsi n’uko bakorana.Kutamenyekana kwabo bibaha imbaraga, ibitekerezo byabo bikaroga urubyiruko.

Ku itariki ya 27 Nyakanga 2017, Umudepite w’Umubiligi witwa Gilles Foret, yashyikirije Inteko Ishinga Amategeko y’Igihugu cye umushinga w’Itegeko ryo guhana icyaha cyo guhakana no gupfobya Jenoside yakorewe Abatutsi mu Rwanda.
Uko uwo mushinga uteye n’ibisobanuro byatanzwe ku mpamvu iryo tegeko rikwiye kubaho, ni ibintu byumvikana ku muntu wese wumva ko ari ngombwa gukumira no guhana icyaha cya Jenoside.

Uko byumvikana ku muntu wese wumva ububi bwa Jenoside nk’icyaha, si ibya bose. Hari abo uwo mushinga wababaje, by’umwihariko ishyirahamwe ryitwa Jambo Asbl rikorera mu Bubiligi.

“Jambo” yanze kurara bushyitsi

Ku itariki ya 29 Nzeri 2017, Jambo Asbl yashyikirije “dosiye” iyo Nteko Ishinga Amategeko y’u Bubiligi bagaragaza kutishimira iyo ntambwe yo gushaka gushyiraho itegeko rihana icyo cyaha. Ndetse byageze n’aho iyo Nteko ishyiraho itariki ya 1 Werurwe 2018 nk’umunsi w’Inteko kuzaza kumva “Impungenge” za Jambo Asbl mu ruhame.
Icyo gikorwa cyaje kuburizwamo n’Inteko Ishinga Amategeko y’Ababiligi nyuma ya Leta y’u Rwanda n’abantu batari bake bamaganye iryo shyano ryari rigiye kuba.

Ndaryita ishyano kubera ko Jambo Asbl nubwo bavuga ko baharanira Uburenganzira bwa Muntu, ni ishyirahamwe ryashyiriweho gushyigikira abajenosideri rishyizweho n’abana b’abajenosideri bazwi n’abatazwi hamwe n’abayihakana bakanayipfobya ku mugaragaro.

Ababiligi bamaze gutera utwatsi icyemezo cyo guha ijambo Jambo Asbl, ku itariki ya 24 Gashyantare 2018, uwitwa Gustave Mutware Mbonyumutwa yashyize umukono ku itangazo rigenewe abanyamakuru agaragaza akababaro ku kuba barahawe akato.Ikimwaro cyamuteye kuvuga ko ngo nubwo bakumiriwe kugera inyarurembo, bishimiye ko ngo bamenyekanye, ari bo n’icyo baharanira.

Bakeneye kumenyekana?

Reka tubababwire. Niba Jambo Asbl icyo ikeneye ari ukumenyekana, reka imenyekane koko. Icya mbere gikwiye kumenyekana ni uko ako gatsiko kiyita ko gaharanira amahoro kamenyekana neza ko ahubwo karengera abajenosideri bamwe muri bo barengera ababyeyi babo.

Leta y’u Rwanda yakoze ibishoboka byose ngo icyaha icyo ari cyo cyose, harimo na Jenoside kibe gatozi. Ihame ry’ingenzi ni uko nta cyaha cy’inkomoko. Ntawe ukomoka ku mubyeyi w’umujenosideri ukwiye kuzira cyangwa guhorana ipfunwe by’icyaha atakoze. Ariko nabwo ntihanagire n’uwumva jenoside ari umurage w’umuryango.

Jambo Asbl ibyo ntibikozwa. Yashinzwe n’abakuze bumva ibyo ababyeyi babo bakoze ari gakondo idakwiye guhungabana.

Ku itariki ya 5 Werurwe 2018, Gustave Mbonyumutwa bamutoreye kuyobora inama y’ubuyobozi ya Jambo Asbl. Gustave ni umuhungu w’umujenosideri Shingiro Mbonyumutwa mwene Dominique Mbonyumutwa uri mubatangije Jenoside mu Rwanda. Gustave Mbonyumutwa yasimbuye ku buyobozi Natacha Abingeneye. Uwo akaba umukobwa wa Juvenal Uwilingiyimana wari umwe mubashinze umutwe w’Interahamwe zari ku isonga mu gutsemba Abatutsi mu Rwanda mu 1992-94.

Ndahera kuri Shingiro Mbonyumutwa umwana wa mbere wa Dominique Mbonyumutwa na Sophia Nyirabuhake. Mvuge no ku rubyaro rwe kuko ruri mu bari ku isonga yo gukwiza ingengabitekerezo kirimbuzi.

Ku wa 3 Nzeri 2008 Radio na Televisiyo Mbiligi y’abakoresha ururimi rw’Igifaransa izwi nka Radio-Télévision Belge de la Communauté Française (RTBF), mu kiganiro cyayo cyitwa “Questions à la Une” (inkuru igezweho) yatambukije ikiganiro kivuga ku banyarwanda b’abajenosideri bari mu Bubiligi.

Icyo kiganiro bacyise “Les génocidaires rwandais sont-ils parmi nous?” bisonanura ngo “Abajenosideri b’Abanyarwanda baturimo?” Ni ikiganiro cyibazaga impamvu abantu nk’abo baba babarimo. Mubavuzwe babarimo ni Shingiro Mbonyumutwa.

Ku itariki ya 1 Ukwakira 2008, Shingiro yandikiye abayobozi ba RTBF n’uwateguye icyo kiganiro aribo Bwana Marc Bouvier, Jean-Pierre Jacquemin na Madamu Marianne Klaric. Shingiro yasabye uburenganzira bwo kwiregura, agaragaza ko ngo ibyo bamuvuzeho ko yagize uruhare muri Jenoside atari byo ari ukumubeshyera.

Kimwe n’abandi bajenosideri bose n’inshuti zabo, muri iyo baruwa ya Shingiro agaragaza ko ngo FPR ari yo bicanyi we n’abo bahuje politiki barengana. Yihakanye ibyo yavugiye kuri Radiyo Rwanda ku itariki ya 21 Mata 1994 ashishikariza Abahutu kurimbura Abatutsi nk’uburyo bwo kwirwanaho. Byari mu kiganiro cyayobowe n’umunyamakuru w’interahamwe witwa Jean Baptiste Bamwanga.

Iyo mbwirwaruhame iri mu bitabo byinshi n’inyandiko zo mu Rukiko Mpuzamahanga Mpanabyaha rwa Arusha (TPIR/ICTR). Abagabo atanga ni ibyanditswe ku mbuga za murandasi z’abo bahuje ibitekerezo nka Gaspard Musabyimana na Joseph Matata.

Uretse n’iyo mbwirwaruhame y’urwango kuri Radiyo Rwanda, Shingiro yari umwe mu bategetsi bashyize umugambi wa Jenoside mu bikorwa nk’umwe mu bari ku isonga rya MDR-Pawa ndetse akaba n’umuyobozi w’ibiro (Directeur de Cabinet) wa Minisitiri w’Intebe wa Guverinoma y’Abajenosideri, Kambanda Jean.

Ibyo kuburana amatakirangoyi si ibya Shingiro gusa. Abana be nabo babimazemo igihe. Uretse ibyo bakorera muri Jambo Asbl n’izindi mbuga bashatse kubishyira mu Nteko Ishinga Amategeko y’Ababiligi baranabigerageje mu nkiko.

Mu mwaka w’2010, Gustave Mbonyumutwa, watorewe kuyobora Jambo Asbl kugeza mu 2020, yagiye Arusha muri ICTR nk’umutangabuhamya gushinjura umujenosideri Mathieu Ngirumpatse wari perezida wa MRND. Ngirumpatse yakatiwe gufungwa ubuzima bwe bwose busigaye.

Uko byagenze ni ah’ubutaha kuko biracyaza…

Umushakashatsi Tom Ndahiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza