Kuvuga uvanga indimi abantu batumva mu itumanaho bifatwa nko kubasakuriza

Yanditswe na Vital Karangwa Jr.
Kuya 20 Gashyantare 2018 saa 07:40
Yasuwe :
3 1

Ubwanditsi: Vital Karangwa Jr., ni umwanditsi mukuru (Chief Editor) wa Radio Flash na Flash TV. Ibikubiye muri iyi nyandiko ni ibitekerezo bwite bye, ntaho bihuriye n’igitangazamakuru akorera.

Hamaze iminsi havugwa ikibazo cy’abantu bavanga indimi mu gihe bari gutanga imbwirwaruhame mu nama zitandukanye, abavuga ubutumwa cyangwa se abaganira bisanzwe.

Mu itumanaho kuvanga indimi nyamara mu bo uri kubwira harimo abatazumva tubyita urusaku, muri make uba uri kubasakuriza.

Tuvuga ko kuvanga indimi kandi ubizi neza ko mu bo uri kubwira harimo abatazumva ari ukutita ku byo uri kuvuga, kuba utabitekerejeho rimwe na rimwe tukavuga ko ari no gusuzugura ururimi.

Dukurikije igisobanuro gisanzwe ijambo urusaku risobanurwa nk’ikintu cyose kivuga cyane kikabangamira abantu mu matwi. Ariko nyamara mu itumanaho igisobanuro cy’urusaku kirenze igisanzwe cyizwi na benshi.

Mu itumanaho ijambo urusaku risobanurwa nk’ikintu icyo aricyo cyose kivangira ubutumwa ku buryo uko buvuye ku wabutanze atari ko bugera ku wo bugenewe.

Urugero twafata hano ni ukuganiriza abaturage runaka maze ukajya uvangamo indimi z’amahanga batumva. Mu itumanaho tuvuga ko icyo gihe uba uri gusakuriza abo ubwira. Ikintu cyose kigenda kikavangira ubutumwa watanze bukagera ku wo bugenewe budasobanutse agatangira kwibaza ku gisobanuro cyabwo cyangwa rimwe na rimwe akabusobanura uko utabishakaga ni ikosa rikomeye mu itumanaho.

Ubundi ibi byakabaye bidakozwe na nyirugutanga ubutumwa bigakorwa nibura n’ibyuma cyangwa izindi mpamvu. Abiga itangazamakuru bababuza kuzigera bakoresha amagambo akomeye mu rurimi urwo arirwo rwose. Aha hari ubwo usanga nk’abanyamakuru bakoresha indimi z’amahanga bakoresha amagambo aremereye kumva wenda rimwe na rimwe bumva ko aribwo ababateze amatwi bumva ubuhanga bwabo, cyangwa ugasanga abakoresha nk’Ikinyarwanda barakoresha amagambo akomeye cyane atapfa kumvwa na buri wese. Ibi nabyo mu itumanaho tubyita urusaku kuko bituma ubutumwa bugera ku wo bugenewe budasobanutse.

Hari ibindi bintu bitandukanye mu itumanaho dufata nk’urusaku: urugero igihe uri kuvuga gacye, kuvuga utitsa ngo abantu bakumve neza, kuvuga udidimanga n’ibindi. Ibi nabyo tubishyira mu gatebo k’urusaku.

Guha umuntu ubutumwa umutuka, umubwira nabi, umukorera ivangura rishingiye ku bintu bitandukanye n’ibindi. Urugero uti “abakobwa niko mwabaye nta bwenge mugira, abahungu muri injiji, n’ibindi nabyo mu itumanaho bifatwa nk’urusaku kuko aho kugira ngo umuntu agutege amatwi arafata umwanya agerageza kwirwanaho akwereka ko ibyo uri kuvuga wibeshya.

Urundi rusaku rusa n’uru maze kuvuga ni ukubwira abantu bashonje. Urugero kwigisha abanyashuri saa sita cyangwa na nyuma yaho kandi batararya nabyo tubifata nko guta inyuma ya Huye mu itumanaho kuko baba batakumva.

Hari abavuga ko amagambo yose atari ko wayabonera Ikinyarwanda

Sindi umukozi w’Inteko y’Umuco n’Ururimi ariko abavuga ko kuvanga indimi bikarangira ubutumwa bwabo butumviswe neza ari ukubura Ikinyarwanda sinemeranya nabo.

Ufashe umwanya ukumva imbwirwaruhame z’Umukuru w’Igihugu cy’u Rwanda, Paul Kagame uzasanga Ikinyarwanda avuga kiba gitomoye ku buryo ubutumwa bugera ku bo bwagenewe ijana ku ijana nta gihindutse.

Hari ikintu cyiza akora abitewe no kuba azi abo ari kubwira. Niba ari abaturage ariko hari n’abandi bantu nk’abanyamahanga batumva ikinyarwanda, uzasanga akora imbwirwaruhame mu cyongereza hanyuma asubire inyuma ayivuge no mu Kinyarwanda kugira ngo n’abandi bose bumvireho. Kuki we abishobora?

Ubusanzwe mu iyigandimi tuvuga ko iyo usanze hari ijambo ry’amahanga ushatse kuvuga kandi ritari mu rurimi uri gukoresha ushobora kurivuga muri urwo rurimi rw’amahanga hanyuma ukagenekereza ku buryo nibura abo uri guha ubutumwa bumva icyo washatse kuvuga kuko nanjye ndabyemera ko hari aho Ikinyarwanda gikennye amagambo.

Impuguke mu mu itumanaho zatanga ubufasha

Uko imyaka igenda yicuma niko akamaro k’itumanaho karushaho kumvikana no guhabwa agaciro. Ubu ibigo byinshi bifite abo bita impuguke mu itumanaho. Izi mpuguke ni nk’izindi zose, ni nkuko wavuga impuguke mu kubaka imihanda, impuguke mu ishoramari n’abandi.

Ni abantu b’abahanga batanga inama bakanatanga amahugurwa mu bintu bakora. Gusa hari bamwe batarumva akamaro k’aba bantu neza bityo ngo banabegere.

Hari abumva ko bashinzwe gutumira abanyamakuru cyangwa kuvugana n’itangazamakuru gusa. Bariya bantu ni abahanga cyane mu itumanaho cyane ko baba barahawe akazi binyuze mu ipiganwa bakabitsindira.

Mbere yo kujya gutanga ikiganiro runaka muri rubanda uba ugomba kumugisha inama y’imvugo uza gukoresha n’uko ubyitwaramo. Nyuma y’ikiganiro uba ugomba kumubaza uko wabyitwayemo n’ibyo abona bikwiye gukosorwa, ukabimusaba mu nyandiko n’ubutaha ukazabyibuka.

Ugomba gukoresha uburyo bwose ntagutinye. Hari ubwo usanga aba bantu bagishwa inama igihe habaye ikibazo gusa kandi bataragishijwe inama mbere ngo babe banakirinda.

Aba bantu usibye gukora gahunda y’itumanaho ry’umwaka wose baba bagomba no guhabwa umwanya bagakora icyo twita igenzuratumanaho mu kigo.

Ubu ni uburyo bwo kugenzura uko ikigo gitanga cyangwa cyakira ubutumwa haba mu bakozi imbere cyangwa mu bantu b’inyuma. Ese umuyobozi mukuru w’ikigo atanga ubutumwa ate mu bakozi? Ese arabikoza? Ese bose ntibamutinya? Ese ntibabona aje bose bakikanga? Ese iyo umukozi yirukanywe ubwo butumwa butangwa bute mu bandi bakozi? Ese barasobanurirwa cyangwa bose basigara mu cyoba bakumva ko ejo ari bo bazakurikiraho?

Ibi byose byose bisaba itumanaho ryiza. Binatuma nta rusaku nkuko twarusobanuye hejuru ruza mu butumwa butangwa. Aha yuzuzanya n’umukozi ushinzwe abakozi. Ibi wenda tuzabigarukaho birambuye mu nyandiko y’ubutaha.

Vital Karangwa Jr. amaze igihe mu itangazamakuru ryo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza