U Rwanda rwahembwe nk’igihugu gikurura ba mukerarugendo kurusha ibindi muri Afurika

Yanditswe na Herve Ugirumukunda
Kuya 11 Ukwakira 2017 saa 08:39
Yasuwe :
0 0

U Rwanda rwahawe igihembo cy’igihugu gikurura abakerarugendo kurusha ibindi ku mugabane wa Afurika, mu bihembo bya World Travel Awards, byatanzwe ku wa Kabiri tariki ya 10 Ukwakira 2017.

Ni ibihembo bihabwa ibihugu, amahoteli, kompanyi z’indege n’ibindi byabaye indashyikirwa mu bukerarugendo hirya no hino ku Isi.

Nyuma yo kwakira icyo gihembo, Umuyobozi w’Ikigo cy’Igihugu cy’Iterambere, RDB, Clare Akamanzi, yashimiye Perezida Paul Kagame kubera ubuyobozi bwe bwiza bwiyemeje guteza imbere urwego rw’ubukerarugendo.

Yagize ati “Twishimiye kwakira iki gihembo mu izina ry’u Rwanda. Nshimiye by’umwihariko Perezida Paul Kagame ku bw’icyerekezo cye cyo guteza imbere ubukerarugendo.”

Mu kwegukana iki gihembo, u Rwanda rwanikiye ibihugu byari bihanganye birimo, Botswana, Misiri, Kenya, Malawi, Maroc, Mozambique, Namibia, Nigeria, Afurika y’Epfo, Tanzania, Uganda na Zambia.

Hoteli ya Radisson Blu Hotel and Convention Centre nayo yahembewe kuba hoteli ya mbere ikorerwamo inama ikomeye kurusha izindi muri Afurika ndetse na hoteli nshya y’agahebuzo yashinzwe muri uyu mwaka ku mugabane.

Uwatangije ibihembo bya World Travel Awards, Graham Cooke, yashimiye u Rwanda uko rwateguye ibirori byatangiwemo ibyo bihembo.

Ati “Nashimishijwe cyane no gusura u Rwanda ku nshuro ya mbere. Twahembye indashyikirwa mu bukerarugendo bwa Afurika kandi nshimiye abatsinze bose. U Rwanda rwakiriye neza cyane ibi birori rushimangira ukuri ko ari igihugu kigenda kirushaho kuba inyenyeri imurikira Afurika.”

Ku rwego rw’imbere mu gihugu

Ibindi bigo byegukanye ibihembo bya World Travel Awards, kubera kwitwara neza kurusha ibindi mu Rwanda ni Kigali Marriott Hotel yabaye Hoteli ya mbere y’ubucuruzi ikaba n’iberanye n’umujyi kurusha izindi mu gihugu.

Kigali Serena Hoteli yahawe igihembo cya hoteli ifite izina rikomeye kurusha izindi mu Rwanda, ikaba inafite icyumba cy’abanyacyubahiro cya mbere cyiza.

Sosiyete ya Kigali Car Rentals nayo yahize izindi zikora ubucuruzi bwo gutiza imodoka, Nyungwe House ihemberwa kuba icumbi ryiza ry’ubukerarugendo bwo mu ishyamba, Primate Safaris iba iya mbere ikora ubucuruzi bwo kuyobora abakerarugendo, naho Satguru ihiga izindi sosiyete zicuruza amatike y’indege mu Rwanda.

Leta y’u Rwanda yafashe iya mbere mu guteza imbere ubukerarugendo nka kimwe mu byinjiza cyane mu mutungo w’igihugu, inazamura gahunda y’ubukerarugendo bushingiye ku kwakira inama mpuzamahanga (MICE) ari nayo mpamvu Kigali Convention Centre yahawe igihembo.

Kuri ubu u Rwanda rwihaye intego y’uko mu 2024 inyungu ruvana mu bukerarugendo izaba yikubye kabiri ikagera kuri miliyoni $800 mu mwaka ivuye kuri miliyoni $404 yinjiye mu mwaka ushize.

Umuyobozi Mukuru ushinzwe Ubukerarugendo muri RDB, Belize Kaliza, aherutse kuvuga ko bimwe mu bizatuma ibyo bishoboka ari ukumenyekanisha igihugu mu mahanga, ibyiza nyaburanga by’igihugu bikamamazwa hakoreshejwe imbuga nkoranyambaga.

RDB ivuga ko inyungu iva mu bukerarugendo yiyongeraho 10% buri mwaka, ariko intego ikaba ari uko izajya yiyongeraho 25% buri mwaka.

U Rwanda rwahawe igihembo cy’igihugu gikurura abakerarugendo kurusha ibindi ku mugabane wa Afurika
Ni ibihembo bihabwa ibihugu, amahoteli, kompanyi z’indege n’ibindi byabaye indashyikirwa mu bukerarugendo hirya no hino ku Isi
Hoteli ya Radisson Blu Hotel and Convention Centre yahembewe kuba hoteli ya mbere ikorerwamo inama ikomeye kurusha izindi muri Afurika

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza