Umunyafurika y’Epfo yahawe gucunga Akagera Game Lodge

Yanditswe na Herve Ugirumukunda
Kuya 12 Ukwakira 2017 saa 11:00
Yasuwe :
0 0

Ikigo cy’Igihugu cy’Ubwiteganyirize (RSSB) cyashinze sosiyete Mantis y’Umunyafurika y’Epfo gucunga no kumenyekanisha Akagera Game Lodge mu gihe cy’imyaka icumi.

RSSB yizeye ko Akagera Game Lodge nimara guhabwa Mantis Collection, izarushaho kumenyekana ku rwego mpuzamahanga, abayisura bakiyongera kandi bigafasha n’Abanyarwanda kwigishwa uburyo bugezweho bwo kwita kuri ba mukerarugendo.

Umuyobozi Mukuru Ushinzwe Ubukerarugendo mu Kigo cy’Igihugu cy’Iterambere, RDB, Belise Kaliza, yavuze ko bahisemo Mantis Collection kuko ari ikigo gihuje na Leta y’u Rwanda intego yo kubungabunga ibidukikije.

Yaize ati “ Twishimiye gutangira urugendo rwo kuzamura Akagera Game Lodge dufatanyije na Mantis Group. Ni intambwe ikomeye yerekana gahunda ya Leta y’u Rwanda yo kuzamura ubukerarugendo. Ni byiza cyane ko amahame ya Mantis Group ajyanye cyane na gahunda z’iterambere z’u Rwanda.”

Umuyobozi wa Mantis Collection akaba ari nawe wayishinze, Adrian Gardiner, yavuze ko asanzwe afite abakiriya mpuzamahanga bayoboka amacumbi acunga ari mu bindi bihugu, akazabakurura ngo baze bihereje ijisho ku byiza nyaburanga biri mu mu Rwanda.

Yagize ati “ Maze imyaka icumi ngenderera u Rwanda nkanahakorera gahunda nyinshi. Ni igihugu cyimirije imbere ubukerarugendo. Dusanzwe dufite abakiriya mpuzamahanga benshi, twiyemeje kubareshya bakazanasura Akagera Game Lodge.”

Akagera Game Lodge isanzwe ari umutungo wa RSSB. RDB ivuga ko ubu ari ryo cumbi rikomeye muri Parike y’Akagera kuko andi ari amahema acumbikira ba mukerarugendo ahanini biyemeje kureba inyamaswa n’ibidukikije babyegereye.

Iri cumbi riherereye ku nkombe z’ikiyaga Ihema, rikagira ibyumba 64 bishobora kwakira inama n’abanyacyubahiro kandi uwayisuye aba afite amahirwe yo kubona inyamaswa zitembera cyane cyane nijoro.

Amasezerano Mantis yahawe arimo n’inshingano yo kwigisha Abanyarwanda uburyo bugezweho bwo kwakira ba mukerarugendo.

Adrian Gardiner washinze Mantis ni inzobere akaba n’impirimbanyi mu bikorwa byo kubungabunda ibidukikije muri Afurika y’Epfo. Kuri ubu ikigo cye gifite amacumbi ya za parike gicunga hirya no hino ku Isi. Uyu mugabo asobanura ko yahisemo izina Mantis (Man and NATure Is Sustainable) kugira ngo yerekane ko umuntu n’ibidukikije ari magirirane.

Adrian Gardiner, Umuyobozi wa Mantis Collection igiye gucunga Akagera Game Lodge n'Umuyobozi Mukuru Ushinzwe Ubukerarugendo muri RDB, Belise Kaliza bahererekanya amasezerano
Akagera Game Lodge ni umutungo wa RSSB
Akagera Game Lodge ni ryo cumbi ry'ibanze riri muri Pariki y'Akagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza