Abanyarwanda boroherejwe gutembera Pariki y’Akagera, Nyungwe no kuzamuka Bisoke

Yanditswe na Ferdinand Maniraguha
Kuya 1 Kanama 2018 saa 10:37
Yasuwe :
1 0

Guhera muri uku kwezi kwa munani, abanyarwanda bagiye koroherezwa gusura ibyiza bitatse u Rwanda, bahereye muri Pariki y’Akagera, Nyungwe ndetse no ku gasongero k’ikirunga cya Bisoke.

Ni gahunda yatangijwe na sosiyete itembereza ba mukerarugendo Home Rwanda Safaris, kugira ngo abanyarwanda ndetse n’abanyamahanga bamenye ibyiza by’u Rwanda babashe no kubimenyesha abandi.

Umuyobozi Mukuru wa Home Rwanda Safaris, Tuyigire Aimable, yabwiye IGIHE ko ari gahunda izaha umwihariko n’abanyeshuri bari mu biruhuko.

Yagize ati “Tariki 11 z’ukwezi kwa munani tuzajyana abantu gutembera muri Pariki y’Akagera. Nituvayo, tariki 18 tuzajya muri Nyungwe ku kiraro kiri mu kirere, naho tariki 25 tujye kurira ikirunga cya Bisoke.”

Yongeyeho ati “Twashyize ku giciro kiri hasi kugira ngo tworohereze abantu bose ndetse n’abanyeshuri bari mu biruhuko.”

Kujya muri Pariki imwe umuntu bizamusaba kwishyura 35 000 Frw, abantu babiri (couple) bishyure 45 000 Frw naho umunyamahanga yishyure amadolari 110.

Tuyigire yavuze ko abanyeshuri bafite ikarita y’ishuri bo bazagabanyirizwa bakishyura 30 000 Frw buri umwe.

Muri ayo mafaranga hazaba harimo itike y’urugendo, ibyo kurya bya saa sita ndetse n’utwo guhekenya (snacks). Harimo kandi amafaranga yo kwinjira muri pariki n’umuntu uzafasha abakerarugendo gusobanukirwa ibyiza biri muri pariki.

Tuyigire avuga ko bateguye uru rugendo nyuma yo kubona ko abanyarwanda bifuza gusura ibyiza by’iwabo ariko ababibafashamo ari bake.

Ati “Twasanze hakirimo ikibazo cy’uko nta bantu batanga iyo serivisi, nibwo twavuze duti ‘niba dufite ubumenyi mu bijyanye n’ubukerarugendo, ni gute twagerageza gufatanya n’igihugu cyacu kugira ngo abanyarwanda bamenye ibyiza igihugu gifite.Usanga kenshi byitwa ngo ni iby’abanyamahanga kandi batagomba kuturusha ibyacu.”

Yakomeje avuga ko mu gihe abanyarwanda bazaba bazi neza ibyiza biri mu gihugu cyabo, bizafasha mu gukurura abanyamahanga benshi.

Amatike ari kugurishirizwa ku biro bya Home Rwanda Safaris kuri Champion Hotel i Remera cyangwa kuri 0788206999.

Udusumbashyamba ni zimwe mu nyamaswa zishimishije ziboneka muri Pariki y'Akagera
Canopy Walkway ni ikiraro cyubatse mu kirere muri Pariki ya Nyungwe gifasha ba Mukerarugendo kwitegereza no kureba ibyiza nyaburanga birimo ibiti, inyoni n'izindi nyamaswa
Ku gasongero ka Bisoke hariyo ikiyaga gikundwa na ba mukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza