RDB yashyikirije abahoze mu bikorwa byangiza Pariki ya Nyungwe inzu za miliyoni 36Frw

Yanditswe na Evariste Nsengimana
Kuya 28 Nyakanga 2018 saa 07:59
Yasuwe :
0 0

Ikigo cy’igihugu cy’Iterambere, RDB, kuri uyu wa Gatanu cyashyikirije inzu zifite agaciro ka miliyoni 36 Frw, imiryango 10 yimuwe mu nkengero za Pariki rya Nyungwe, mu Murenge wa Kitabi ho mu Karere ka Nyamagabe.

Ni inzu zigezweho zifite ibikoni, ubwiherero, ibigega bifata amazi n’ibindi, zahawe imiryango 10 igizwe n’abantu 48, bari batuye mu nkengero za Pariki ya Nyungwe, bakagira uruhare mu bikorwa biyangiza birimo guhiga, gutema, gutwika ibiti n’ibindi.

Iki gikorwa kiri mu by’ingenzi RDB yateguye bibanziriza umuhango wo kwita izina abana b’ingagi, kizaba ku wa 7 Nzeri uyu mwaka.

Mukandoli Domitille, umwe mu baturage bashikirijwe inzu, yashimiye RDB, avuga ko uretse kuba bungutse ahantu heza ho gutura, bizanabarinda ibibazo baterwaga no kuba mu nkengero z’ishyamba rya Nyungwe.

Ati “Twabaga impande y’ishyamba rya Nyungwe ariko aha ni heza cyane narahishimiye. Aho twabaga mu ishyamba rya Nyungwe, twarahingaga inyamaswa zikatwonera.”

Uwimbabazi Clarisse yavuze ko batarimurwa iruhande rwa Nyungwe bumvaga batazashobora kuba ahandi ariko ubu barishimira imibereho myiza bafite.

Yagize ati “Ku Mushabarara twavomaga mu kabande ariko aha hari amazi, batwubakiye amazu meza atandukanye n’ayo twari dufite. Aha hari amashuri hafi, nta kibazo dufite [...] ibyiza tubona ubu, twabonye kuba mu ishyamba twari twarahombye.”

Yakomeje agira ati “Iyo umuntu yakoraga ikosa kuri Pariki ya Nyungwe byaharirwaga abahatuye ariko ubu turaryama tugasinzira, tugakanguka tujya ku murimo. Sinahasubira ahubwo nashishikariza n’abahasigaye kuhava bakaza i Rwanda.”

Aba baturage bahuriza ku kuba barahoraga bahangayitse bashyinjwa kugira uruhare mu kwangiza Nyungwe.

Umuyobozi Mukuru wungirije ushinzwe ubukerarugendo no kubungabunga Pariki muri RDB, Belise Kariza, yavuze ko izo nzu bahawe zubatswe mu mafaranga ava mu bikorwa by’ubukerarugendo bya Pariki.

Ati “Nk’ubutumwa ni ukwereka abatuye mu nkengero z’ishyamba rya Pariki ko ibagirira akamaro. Nk’ubu iyo tudashobora kubungabunga pariki nk’uko twabikoze neza, izi nzu ntabwo twari kubasha kuzigeraho. Ubutumwa twabaha ni ugukomeza kubungabunga Pariki kuko ibagirira akamaro, ikanakagirira igihugu.”

Guverineri w’Intara y’Amajyepfo, Mureshyankwano Marie Rose, yasabye abaturage kwita ku bikorwa bashyikirijwe kandi bakanagendera kure ibikorwa byo kwangiza pariki ya Nyungwe.

Ati “Ubwo rero navuga ngo RDB idufashije gukemura ibibazo bibiri, icy’abaturage bashobora kwishora mu bikorwa byo kwangiza pariki ya Nyungwe tukabungabunga ibidukikije ariko nanone idufashije kugira ngo abaturage bacu babone amacumbi meza asobanutse, bave muri ntuye nabi.”

Aka gace kimuwemo abaturage, kari gasanzwemo imiryango 26, ubu gasigayemo 16 nayo izimurwa uko ubushobozi buzaboneka. Umushinga wo kubaka inzu bimuriwemo wamaze imyaka ibiri kuva 2015 kugera na 2017.

Uretse kuba RDB yarabahaye ibiribwa n’ibikoresho by’ibanze, yabijeje ko hari umuterankunga yababoneye uzabafasha mu mishinga igamije kuzamura imibereho yabo.

Uyu mushinga wo kubakira iyi miryango ubaye uwa 610 RDB ukoze ugamije gufasha abaturage bakikije Pariki ya Nyungwe kuva mu 2005, yashowemo amafaranga hafi miliyari 4Frw mu Turere dukikije Nyungwe, 29 ikaba yarakorewe muri Nyamagabe igashorwamo asaga miyoni 500Frw.

Iyi miryango yashyikirijwe inzu zifite agaciro ka miliyoni 36 Frw
Imiryango 10 igizwe n’abantu 48 yahawe inzu zo guturamo
Umuyobozi Mukuru wungirije ushinzwe ubukerarugendo no kubungabunga Pariki muri RDB, Belise Kariza yavuze ko izi nzu zavuye mu musaruro w'ubukerarugendo
Guverineri Mureshyankwano yashimye igikorwa cya RDB cyo gusangiza abaturage inyungu iva mu bukerarugendo

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza