00:00:00 IGIHE NETWORK KN KINYARWANDA EN ENGLISH FR FRANCAIS

Cogebanque yasoje ubukangurambaga bwa "Tugendane" itanga ibihembo birimo moto

Yanditswe na Dufitumukiza Salathiel
Kuya 31 Kanama 2021 saa 09:15
Yasuwe :
0 0

Cogebanque yashyize akadomo ku bukangurambaga bwiswe “Tugendane” yari imazemo amezi atatu ishishikariza abayigana gukoresha ikoranabuhanga basaba serivisi zitandukanye.

Ni umuhango wabereye ku Cyicaro cyayo Gikuru kiri mu Mujyi wa Kigali kuri uyu wa 31 Kanama 2021, ahatangiwe moto, igare, televiziyo nini (flat screen), frigo na telefoni enye zigezweho (smartphones). Byahawe abanyamahirwe baheruka gutombora.

Ubwo bukangurambaga bwatangiranye n’isiganwa ry’amagare rya Tour du Rwanda muri Gicurasi 2021.

“Tugendane” yari igamije kurushaho korohereza abakiliya ba Cogebanque kubona serivisi z’imari hifashishijwe ikoranabuhanga.

Abagana iyi banki bashishikarijwe gukoresha ikoranabuhanga ririmo Mobile banking aho bakanda *505# kuri telefoni iyo ariyo yose; gushyira apulikasiyo ya Coge mBank muri smartphone, kwiyandikisha muri Internet banking, gutunga amakarita ya Cogebanque mastercard (debit, credit na prepaid) byatumye bagira uburenganzira bwo kwishyura no guhaha mu Rwanda no ku Isi hose, cyangwa bakifashisha Smart cash card.

Ubu bukangurambaga bwasojwe hamaze gutangwa moto ebyiri, amagare atatu, frigo enye, televiziyo enye na telefoni umunani.

Iyamuremye Antoine ushinzwe Iyamamazabikorwa muri Cogebanque yatangaje ko umusaruro wabwo wagaragaye cyane, by’umwihariko bijyanye no kuba ibihe by’icyorezo cya COVID-19 byaratumye amasaha yo gufungura ibikorwa agabanuka.

Ati “Urebye imibare ukareba n’igihe nk’iki mu kwezi mu mwaka ushize mu kwezi kwa gatanu, ukwa gatandatu n’ukwa karindwi, uko abantu bakoreshaga ikoranabuhanga byiyongereyeho hejuru ya 23% mu 2021. Ikindi ni uko abatonda imirongo ku mashami ya Cogebanque bagabanutse, bigaragaza ko basigaye biha serivisi.”

Kayonga Joel ushinzwe Ubucuruzi muri Cogebanque yasobanuye ko ubwo bukangurambaga bwari bukenewe cyane ko kimwe mu bifasha kwirinda ikwirakwira ry’icyorezo ari ukudahuriza abantu benshi hamwe.

Yakomeje ati “Cogebanque yiyemeje korohereza abakiliya kugera ku mafaranga yabo bakagira n’ibyo bakorera kuri konti zabo aho baba bari hose n’igihe icyo ari cyo cyose. Birumvikana ko binajyanye n’icyerekezo igihugu gifite cyo kubaka ubukungu buzira guhererekanya amafaranga mu ntoki, ibintu nka banki dushyigikira twivuye inyuma.”

Utabajimana Rugerinyange Assumpta ni we washyikirijwe moto ku munsi wa nyuma wa Tugendane. Nyuma y’umwaka umwe akoresha ikoranabuhanga rya Cogebanque, yashimangiye ko yabonye serivisi nziza.

Ati “Nkoresha ikoranabuhanga haba mu kwishyura lisansi kuri sitasiyo, muri resitora,ku kibuga cy’indege no kwishyura ibintu mu mahanga.”

Kayijamahe Muhirwa Eric watsindiye televiziyo, we amaze imyaka 14 akorana na Cogebanque.

Iyo asobanura imikoranire nayo abivuga mu magambo ane gusa. Ati “Bagiye bampa serivisi nziza.”

Yemeje ko gukoresha ikoranabuhanga byamurinze gusesagura no kugendana ibifurumba by’amafaranga, akabasha kwizigama kurushaho kandi mu buryo butekanye.

Kuva Cogebanque yakwemerwa mu Rwanda mu 1999 imaze kuhagira amashami 28 ayifasha kugeza serivisi ku bayigana. Ifite ATM 36, aba-agents barenga 600 bafasha abayigana gufunguza konti, kubitsa no kubikuza. Banatanga izindi serivisi zirimo izifashisha ikoranabuhanga binyuze muri Internet Banking, Mobile Banking n’amakarita ya MasterCard (Debit, Credit na Prepaid) yifashishwa mu kwishyura no kubikuza ahantu harenga miliyoni 36 ku Isi yose.

Kayijamahe Muhirwa Eric (iburyo) watsindiye televiziyo amaze imyaka 14 akorana na Cogebanque
Utabajimana Rugerinyange Assumpta ni we washyikirijwe moto ku munsi wa nyuma wa "Tugendane"
Utabajimana Rugerinyange Assumpta yishimiye guhabwa moto, aha yayishyikirizwaga na Kayonga Joel ushinzwe Ubucuruzi muri Cogebanque
Ubukangurambaga bwa "Tugendane" bwasojwe hatanzwe moto ebyiri
Ibihembo byatanzwe birimo televiziyo ya rutura n'igare
Umunyamahierwe watsindiye igare ibumoso hasozwa ubukangurambaga bwa Tugendane
Umwe muri bane batsindiye telefoni ibumoso mu bukangurambaga bwa Tugendane ubwo yayishyikirizwaga busozwa
Gusoza ubukangurambaga bwa Tugendane byabereye ku Cyiocaro Gikuru cya Cogebanque ahari hatumiwe ibitangazamakuru binyuranye
Iyamuremye Antoine ushinzwe Iyamamazabikorwa muri Cogebanque yatangaje ko umusaruro wa "Tugendane" wagaragaye cyane binyuze mu bwiyongere bw'abitabiriye gukoresha serivisi z'ikoranabuhanga

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .