Banki y’Isi yashyize u Rwanda mu bihugu birindwi bya Afurika bifite ubukungu bwihagazeho

Yanditswe na Cyprien Niyomwungeri
Kuya 11 Ukwakira 2017 saa 09:56
Yasuwe :
0 0

Raporo ya ‘Africa’s Pulse’ ikorwa na Banki y’Isi kabiri mu mwaka, yagaragaje ko u Rwanda n’ibindi bihugu bitandatu bya Afurika bifite ubukungu bwihagazeho bugakomeza gutera imbere ku kigero kiri hejuru ya 4.9% kugera kuri 7.1%.

Iyi raporo y’isesengura rigagaragaza uko ubukungu bw’ibihugu bya Afurika bihagaze yasohotse kuri uyu wa Gatatu, igaragaza ko ubukungu bwa Afurika yo munsi y’Ubutayu bwa Sahara bushobora kuzamuka kuri 2.4% mu 2017.

Itsinda ry’ibihugu bifite ubukungu bukomeje kwihagararaho, rigizwe n’ibihugu birindwi byihariye 16% by’umusaruro mbumbe w’akarere ka Afurika yo munsi y’ubutayu bwa Sahara; ibyo ihugu ni u Rwanda, Ethiopia, Tanzania, Côte d’Ivoire, Kenya, Mali, na Senegal.

Imibare yerekana ko ibikorwa by’ubukungu muri ibi bihugu byateye imbere bikava ku izamuka ry’umusaruro mbumbe wa 4.9% hagati ya 1995-2008 bikazamuka kugera kuri 7.1% mu 2015-2017.

Umuyobozi ushinzwe ishami ry’ubukungu muri Banki y’Isi, Albert Zeufack, yavuze ko nubwo bidahagije, ubukungu bwa Afurika yo munsi y’ubutayu bwa Sahara buzazamuka muri uyu mwaka ku kigero cya 2.4% bivuye kuri 1.3% umwaka ushize kubera impamvu zirimo kudahindagurika kw’ibiciro ku masoko mpuzamahanga.

Yagize ati “Ibi bizaterwa n’impamvu z’uko ku masoko mpuzamahanga nta hindagurika ry’ibiciro byabaho, ishoramari n’ubucuruzi bwiyongereye n’iterambere ry’isoko ry’imari n’imigabane mu bihugu.”

Yongeyeho ko ibi bizunganirwa no kuba ibihugu bikize muri Afurika yo munsi y’ubutayu bwa Sahara, Nigeria na Afurika y’Epfo byaragerageje kuzahura ubukungu bwabyo no kuba hari ibihugu byinshi birimo kurwana intambara yo gutera imbere mu buryo bufatika.

Izamuka ry’ubukungu bw’isi muri rusange naryo rishobora kuzatiza imbaraga izamuka ry’ubukungu bwa Afurika, ku buryo buzazamuka ku gipimo ya 3.2% mu 2018 na 3.5% mu 2019.

Umuyobozi w'ishami ry'ubukungu muri Banki y'Isi, Albert Zeufack

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza