Ibigo bisanzwe bishobora gutangira kwemererwa kwakira imisoro y’uturere

Yanditswe na Mathias Hitimana
Kuya 8 Kanama 2018 saa 01:06
Yasuwe :
0 0

Nyuma y’imyaka ine Ikigo cy’Imisoro n’Amahoro (RRA) gisinyanye amasezerano n’uturere mu kudukusanyiriza imisoro, hagiye gushyirwaho uburyo bushya bwo kuyikusanya bushobora no kwemerera ibindi bigo gukora izi nshingano.

Mu 2014 nibwo RRA yasinyanye amasezerano n’uturere ngo ijye ikusanya imisoro ku mitungo itimukanwa, ipatanti n’imisoro ku bukode bw’inzu, biza kugera ku misoro yose n’amahoro byakwaga n’uturere.

Izi mpinduka zatangajwe mu cyumweru gishize ubwo abadepite batoraga itegeko rigena inkomoko y’umutungo w’inzego z’ubutegetsi zegerejwe abaturage rihindura iryo mu Ukuboza 2011.

Perezida wa Komisiyo y’Ingengo y’Imari n’Umutungo by’Igihugu, Mukayuhi Rwaka Constance yagize ati “Urwego ruzajya rubikora ruzajya rushyirwaho n’Iteka rya Minisitiri w’Intebe kandi runagene igiciro cyo kugira ngo icyo kigo kizabikora gishobore gukora ako kazi, kuko ubundi wasanganga hari ukutumvikana hagati y’inzego z’ibanze na RRA, bavuga bati ‘igiciro ni kirekire’ ariko ubu bizigirwa hamwe ku rwego rw’igihugu hashyirweho ibipimo rusange.”

Komiseri Mukuru wa RRA, Richard Tusabe, yabwiye itangazamakuru ko igenwa ry’urwo rwego ruzajya rukusanya imisoro y’uturere bizazana n’izindi mpinduka.

Yagize ati “Ubu noneho itegeko riratanga uburenganzira ko uturere twatanga izo nshingano ku kigo runaka; ibyo rero bikuyeho urujijo ngo ese ‘mubikora mukoresheje irihe tegeko’. Ibyo ni ibigenda binoza imikoranire n’imikoranire y’inzego kugira ngo twuzuzanye.”

Kuva aho gukusana imisoro y’uturere bishyiriwe mu nshingano za RRA, byatanze umusaruro ushimishije mu ngano y’amafaranga yinjira ndetse n’uburyo bikorwamo.

Tusabe yakomeje agira ati “Dusinyana amasezerano n’uturere ngira ngo hashize imyaka ine icyo gihe amafaranga yakirwaga n’uturere yose yari miliyari 37 Frw, uyu munsi turateganya kugera kuri miliyari 60 Frw, urumva ko tugiye gukuba hafi kabiri mu gihe kitagera ku myaka irindwi.”

Muri iri tegeko ni naho hagaragajwe impinduka mu misoro ku mutungo utimukanwa, aho umusoro ku butaka wasimbuye amahoro yishyurwaga ku butaka kuri metero kare ukava ku gipimo cyari hagati ya 30 Frw na 80 Frw ukagera hagati ya 0-300 Frw; naho ku musoro w’inzu idatuwemo na nyirayo ukava kuri 0.1% ukagera kuri 1%.

Perezida wa Komisiyo y'Ingengo y'Imari n'Umutungo by'Igihugu mu Mutwe w'Abadepite Mukayuhi Rwaka Constance asobanura impinduka ku bijyanye n'ikusanywa ry'imisoro yo mu turere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza