RDB igiye guhemba abantu 10 b’indashyikirwa mu mitangire ya serivisi

Yanditswe na IGIHE
Kuya 3 Ukwakira 2017 saa 10:41
Yasuwe :
0 0

U Rwanda rwifatanyije n’amahanga mu kwizihiza icyumweru cyahariwe imitangire ya serivisi nziza, igikorwa kigamije kugaragaza uruhare rwazo mu iterambere rusange ry’igihugu n’iry’isi.

Iki cyumweru ngarukamwaka cyatangiye ku mugaragaro kuri uyu wa Mbere, tariki ya 2 Ukwakira 2017, gifite insanganyamatsiko igira iti “Twubake icyizere mu batugana”.

Mu Rwanda by’umwihariko, iki cyumweru kiri kwizihizwa mu bigo bya Leta n’iby’igenga mu kurushaho guhaza ukwifuza kw’ababigana.

Kuri uyu wa Kabiri, tariki ya abayobozi b’Ikigo cy’Igihugu cy’Iterambere (RDB), mu rwego rwo kugaragaza uko iry’igihugu rijyana na serivisi nziza, abayobozi bakuru bayo bamanutse mu biro na bo baganiriza abakiliya banatanga serivisi ku babagana.

RDB igaragaza ko ubu ari uburyo bwiza bwo gufasha abakiliya gutanga amakuru kuri serivisi bahabwa bituma ikigo runaka kikosora muri serivisi gitanga.

Muri iki cyumweru na nyuma yacyo, RDB izakomeza ubukangurambaga bugamije kurushaho gukangurira ibigo gutanga serivisi zinoze igihe cyose. Ibi bizajyana no kubafasha gukemura ibibazo bikigaragara mu mitangire ya serivisi bizatuma hashakwa umuti urambye wo kubirandura burundu.

RDB irateganya guhemba abantu 10 bagize uruhare mu kunoza imitangire ya serivisi batowe ku rwego rw’igihugu mu gikorwa kizaba ku wa Gatanu, tariki ya 6 Ukwakira 2017.

Umuyobozi Mukuru Wungirije ushinzwe ibikorwa muri RDB, Emmanuel Hategeka, yagize ati “Dufite gahunda yo gushimira abantu b’intangarugero. Mu by’ukuri tugomba kuba inyangamugayo, tukavugisha ukuri. Icyo wemereye umuntu ukagikora bitakunda ukamuha impamvu. Tuzahemba abitwaye neza, batowe n’abandi Banyarwanda hakoreshejwe ikoranabuhanga n’imbuga nkoranyambaga bagaragaweho serivisi nziza kurusha abandi. Aba rero tuzabashimira by’umwihariko uko bakira ababagana.”

Umuyobozi Mukuru Wungirije ushinzwe ibikorwa muri RDB, Emmanuel Hategeka

Abatoranyijwe bazahembwa ndetse banatambagizwe igihugu muri Tembera u Rwanda.

Abakozi ba RDB banaganirijwe kurushaho guha agaciro ababagana, ndetse ari nayo mpamvu nabo bamanutse kugira ngo babahe urugero rw’uko bigomba kugenda.

Yagize ati “Iki cyumweru twifatanya n’abandi ku isi yose. Duha agaciro guha serivisi abatugana duhereye ku bakozi bacu.”

Yakomeje avuga ko imibare ihari igaragaza ko imitangire myiza ya serivisi itaragera ku rwego rukenewe mu nzego za Leta n’izabikorera kuko abakiliya bagaragaje ko batishimira uko bakirwa.

Yagize ati “Ibigo bigomba gutanga icyizere ku babigana, kugira umurava mu byo bakora, kuzuza inshingano no gukemura ibibazo, no kwemera kunengwa ugashaka uko wabikemura.”

Iki cyumweru mu Rwanda kiri kwizihizwa hibandwa ku bukangurambaga bwa ‘NaYombi’ bugamije gukuza umuco wo gutanga serivisi mu gihugu. Uyu mwaka ni uwa gatanu hizihizwa icyumweru cyahariwe serivisi nziza mu bukangurambaga bwa ‘NaYombi’ mu kuzamura imitangire ya serivisi mu nzego zose z’igihugu.

Raporo iheruka gushyirwa ahagaragara n’Ihuriro Mpuzamahanga ry’ubukungu (World Economic Forum) yashyize u Rwanda ku mwanya wa kabiri muri Afurika mu bijyanye no kunoza imitangire ya serivisi. Mu ngingo ya gatanu ya raporo u Rwanda ruri ku mwanya wa 41 ku isi n’amanota 5.0 kuri 7 mu bijyanye no gushyiraho ingamba zo kwimakaza ihame rya serivisi nziza.

Icyumweru cyahariwe serivisi nziza cyatangiye kwizihizwa ku rwego rw’isi mu 1991 muri Leta Zunze Ubumwe za Amerika.

Uwahageraga yakirwaga nk'umwami
Umuyobozi ushinzwe Ubukerarugendo muri RDB, Belize Kariza, na we yamanutse ajya gutanga serivisi
Belize Kariza areba uko bagenzi be bakorana muri RDB batanga serivisi
Umuyobozi Mukuru Wungirije ushinzwe ibikorwa muri RDB, Emmanuel Hategeka, areba uko serivisi zitangwa
Abagana RDB bahawe serivisi zinoze, bahamagara na bagenzi babo
Hategeka yanaganirije abakozi ba RDB abakangurira kurushaho guha agaciro ababagana
Hari benshi baparitse imodoka baza gusaba serivisi muri RDB
RDB yahaye ibihembo abakozi bayo babaye indashyikirwa mu gutanga serivisi nziza
Hategeka yavuze ko serivisi zikwiye guhabwa agaciro ahantu hose

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza